ವಿಹಾನ್‌ ಗೌಡ - ಹಿತಾ ಚಂದ್ರಶೇಖರ್‌ ನಟಿಸಿರುವ '1/4 ಕೇಜಿ ಪ್ರೀತಿ' ಸಿನಿಮಾ ಇಂದು ರಾಜ್ಯಾದ್ಯಂತ ತೆರೆ ಕಾಣುತ್ತಿದೆ. ಇದೊಂದು ಟ್ರಾವೆಲ್‌ ಸ್ಟೋರಿ ಚಿತ್ರವಾದ್ದರಿಂದ ನಿರೀಕ್ಷೆ ಮೂಡಿಸಿದೆ. ಈ ವಿಶೇಷಗಳ ಕುರಿತು ನಿರ್ದೇಶಕ ಸತ್ಯ ಶೌರ್ಯ ಸಾಗರ್‌ ಲವಲvk ಜತೆ ಮಾತನಾಡಿದ್ದಾರೆ. - ಶರಣು ಹುಲ್ಲೂರು ಪಯಣದಲ್ಲಿ ಸಾಗುವ ಪ್ರಣಯ ಕತೆಗಳನ್ನು ಇಟ್ಟುಕೊಂಡು ಕನ್ನಡದಲ್ಲಿ ಸಿನಿಮಾ ಮಾಡಿರುವುದು ತೀರಾ ಅಪರೂಪ. ಅಂಥದ್ದೊಂದು ಕತೆ ಇಟ್ಟುಕೊಂಡು ಹಿತವಾದ ಪ್ರೇಮ ಸಿನಿಮಾ ಮಾಡಿದ್ದೇನೆ ಎಂದು '1/4 ಕೇಜಿ ಪ್ರೀತಿ' ನಿರ್ದೇಶಕ ಸತ್ಯ ಶೌರ್ಯ ಸಾಗರ್‌ ಹೇಳಿದ್ದಾರೆ. ಸಾಮಾನ್ಯವಾಗಿ ಟ್ರಾವೆಲ್‌ ಎಂದರೆ ಎಲ್ಲರಿಗೂ ಇಷ್ಟ. ಅದರ ಜತೆಯಲ್ಲಿ ಪ್ರೀತಿಯೂ ಸೇರಿಕೊಂಡರೇ ಆ ಫೀಲೇ ಬೇರೆ. ಇದು ನನ್ನ ನಿರ್ದೇಶನ ಮೊದಲ ಚಿತ್ರವಾದರೂ ರೆಗ್ಯುಲರ್‌ ಚಿತ್ರಗಳಿಗಿಂತ ವಿಭಿನ್ನವಾಗಿದೆ. ಹಾಗಾಗಿ ಪ್ರೇಕ್ಷಕರ ನೆಚ್ಚಿನ ಸಿನಿಮಾ ಇದಾಗಲಿದೆ ಎಂದು ಅವರು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ. ಹಲವು ವಿಶೇಷತೆಗಳನ್ನು ಹೊತ್ತು ಬರುತ್ತಿರುವ ಸಿನಿಮಾದಲ್ಲಿ ಪ್ರೇಕ್ಷಕರಿಗೆ ಥ್ರಿಲ್‌ ನೀಡುವಂತಹ ಅಂಶಗಳು ಏನಿವೆ? ಎಂಬ ಪ್ರಶ್ನೆಗೆ ನಿರ್ದೇಶಕರು ಉತ್ತರ ಕೊಟ್ಟಿದ್ದು ಹೀಗೆ, 'ಈ ಸಿನಿಮಾದಲ್ಲಿ ಒಂದು ಫ್ರೇಮ್‌ ಕೂಡ ರಿಪೀಟ್‌ ಆಗುವುದಿಲ್ಲ. ಸಿನಿಮಾ ಶುರು ಆಗುವುದು ಕಾಲೇಜ್‌ನಿಂದಾದರೂ, ಆ ನಂತರ ಕತೆ ಲವ್ಲಿಯಾಗಿ ಟ್ರಾವೆಲ್‌ ಮಾಡುತ್ತದೆ. ಹಾಗಾಗಿ ಪ್ರತಿ ದೃಶ್ಯವನ್ನು ಜಾಗರೂಕತೆಯಿಂದ ಕಟ್ಟಲಾಗಿದೆ. ಲೊಕೇಶನ್ಸ್‌ ಕೂಡ ಫ್ರೆಶ್‌ ಆಗಿದ್ದು, ಇಡೀ ಸಿನಿಮಾ ಹೊಸ ರೀತಿಯಲ್ಲಿ ಕಾಣಿಸಲಿದೆ' ಅಂತಾರೆ ನಿರ್ದೇಶಕರು. ಸಿನಿಮಾದ ಕತೆ ಮಾತ್ರವಲ್ಲ, ಸಿನಿಮಾಟೋಗ್ರಫಿ ಕೂಡ ಕಣ್ಣಿಗೆ ಮುದ ನೀಡುತ್ತದೆಯಂತೆ. ಶೂಟಿಂಗ್‌ ಮಾಡುವಾಗ ಅರ್ಧ ದಿನ ಮಳೆ ಆಗುತ್ತಿದ್ದ ಕಾರಣದಿಂದಾಗಿ ಪ್ರತಿ ಫ್ರೇಮ್‌ ಸುಂದರವಾಗಿ ಕಾಣಿಸುತ್ತದೆಯಂತೆ. ತಮಾಷೆಯಿಂದ ಶುರುವಾಗುವ ಈ ಸಿನಿಮಾದಲ್ಲಿ ಜಗಳ, ಸಣ್ಣ ಕಾಂಪ್ರಮೈಸ್‌ ಹೀಗೆ ಅನೇಕ ತಿರುವುಗಳಿವೆ. ಪ್ರತಿ ಪಾತ್ರ ಕೂಡ ನೋಡುಗನಿಗೆ ರಿಲೇಟ್‌ ಆಗುತ್ತದೆ ಎಂದು ಅವರು ಹೇಳಿದ್ದಾರೆ. ಪಕ್ಕಾ ಕಮರ್ಷಿಯಲ್‌ ಸಿನಿಮಾ ಇದಾಗಿದ್ದು, ಸಿದ್ಧ ಚೌಕಟ್ಟಿನಲ್ಲಿ ಸಿನಿಮಾ ಮಾಡಿಲ್ಲವಂತೆ ನಿರ್ದೇಶಕರು. ಹಾಗಾಗಿ ರೆಗ್ಯುಲರ್‌ ಅನಿಸುವಂತಹ ಒಂದು ದೃಶ್ಯ ಕೂಡ ಈ ಸಿನಿಮಾದಲ್ಲಿ ಇಲ್ಲವಂತೆ. ರೀ ರೆಕಾರ್ಡಿಂಗ್‌ ಮತ್ತೊಂದು ಪ್ಲಸ್‌ ಪಾಯಿಂಟ್‌. ಈ ಸಿನಿಮಾದ ಮೂಲಕ ಗಾಯಕ ಚೇತನ್‌ ಸಂಗೀತ ನಿರ್ದೇಶಕರಾಗಿದ್ದಾರೆ. ನಾಯಕ ವಿಹಾನ್‌ ಗೌಡ ಮತ್ತು ನಾಯಕಿ ಹಿತಾ ಚಂದ್ರಶೇಖರ್‌ ಶೂಟಿಂಗ್‌ ಮುನ್ನ ರಿಹರ್ಸಲ್‌ ಮಾಡಿದ್ದಾರೆ. ಹಾಗಾಗಿ ಅವರಿಗೂ ಸಿನಿಮಾ ವಿಭಿನ್ನ ಅನುಭವ ನೀಡಿದೆ. ಕಾರು ರೇಸ್‌ ಬಗ್ಗೆ ಅಗಾಧ ಆಸಕ್ತಿ ಹೊಂದಿರುವ ಎ.ಬಿ.ರಾಜೀವ್‌ ತಮ್ಮ ಲಾಂಗ್‌ ಡ್ರೈವ್‌ ಫಿಲ್ಮ್ಸ್ ಲಾಂಛನದ ಮೂಲಕ ಚಿತ್ರವನ್ನು ನಿರ್ಮಾಣ ಮಾಡಿದ್ದಾರೆ. ಹಾಡುಗಳನ್ನು ಬರೆಯುವ ಮೂಲಕ ಯೋಗರಾಜ್‌ ಭಟ್‌ ಚಿತ್ರಕ್ಕೆ ಸಹಕಾರ ನೀಡಿದ್ದಾರೆ.
↧
ಪ್ರೀತಿಯೊಂದಿಗೆ ಪಯಣ
↧
