ಮುಂಬಯಿ: ಭಾರತ ಕ್ರಿಕೆಟ್‌ ತಂಡದ ನಾಯಕ ವಿರಾಟ್ ಕೊಹ್ಲಿ ಅವರು ಜಾಗತಿಕ ಕ್ರೀಡಾ ಪರಿಕರಗಳ ಪೂರೈಕೆದಾರ ಕಂಪನಿ ಜರ್ಮನಿ ಮೂಲದ ಪೂಮಾ ಜತೆ ಬರೋಬ್ಬರಿ 100 ಕೋಟಿ ರೂಪಾಯಿ ಒಪ್ಪಂದಕ್ಕೆ ಸಹಿ ಮಾಡಿದ್ದಾರೆ. ಇದರೊಂದಿಗೆ ಒಂದೇ ಕಂಪನಿಯ ಪ್ರಚಾರ ರಾಯಭಾರತ್ವಕ್ಕೆ 100 ಕೋಟಿ ರೂ. ಪಡೆದ ಭಾರತದ ಪ್ರಪ್ರಥಮ ಕ್ರೀಡಾಪಟು ಎಂಬ ಹೆಗ್ಗಳಿಕೆ ಗಳಿಸಿದ್ದಾರೆ. ಜಗತ್ತಿನೆಲ್ಲೆಡೆ ಕ್ರೀಡಾ ಪರಿಕರಗಳ ಮೂಲಕ ಬ್ರ್ಯಾಂಡ್‌ ಸೃಷ್ಟಿಸಿರುವ ಪೂಮಾ ಜತೆ ಟೀಮ್‌ ಇಂಡಿಯಾದ ಎಲ್ಲಾ ಪ್ರಕಾರಗಳ ನಾಯಕ ಕೊಹ್ಲಿ ಎಂಟು ವರ್ಷಗಳಿಗೆ ಒಪ್ಪಂದ ಮಾಡಿಕೊಂಡಿದ್ದಾರೆ. ಈ ಮೂಲಕ ಕೊಹ್ಲಿ, ಪೂಮಾದ ಜಾಗತಿಕ ರಾಯಭಾರತ್ವ ಹೊಂದಿರುವ ಜಮೈಕಾದ ಸ್ಟ್ರಿಂಟರ್‌ ಉಸೇನ್‌ ಬೋಲ್ಟ್‌ ಮತ್ತು ಅಸಫಾ ಪೊವೆಲ್‌, ಫುಟ್ಬಾಲಿಗ ಥಿಯರಿ ಹೆನ್ರಿ ಮತ್ತು ಒಲಿವರ್‌ ಗಿರೌಡ್‌ ಅವರ ಸಾಲಿಗೆ ಸೇರ್ಪಡೆಯಾಗಲಿದ್ದಾರೆ. ಎಂಟು ವರ್ಷಗಳಿಗೆ ಒಪ್ಪಂದ ಮಾಡಿಕೊಂಡಿರುವ 28 ವರ್ಷದ ಕೊಹ್ಲಿ, ರಾಯಭಾರತ್ವದಿಂದ ಕಂಪನಿಯ ಲಾಭಾಂಶದ ಮೇಲೆ ಇನ್ನಷ್ಟು ನಿಗದಿತ ಮೊತ್ತದ ಜತೆಗೆ ಇನ್ನಷ್ಟು ಹಣ ಪಡೆಯಲಿದ್ದಾರೆ. 100 ಕೋಟಿ ರೂಪಾಯಿ ನಿಗದಿತ ವೇತನದಲ್ಲಿ ವಿರಾಟ್ ಕೊಹ್ಲಿ ವಾರ್ಷಿಕ 12ರಿಂದ 14 ಕೋಟಿ ರೂ. ಪಡೆಯಲಿದ್ದಾರೆ 'ಜಗತ್ತಿನ ಶ್ರೇಷ್ಠ ಅಥ್ಲೀಟ್‌ಗಳ ರಾಯಭಾರತ್ವ ಹೊಂದಿರುವ ಪೂಮಾ ಕಂಪನಿಯೊಂದಿಗೆ ನಾನು ಭಾಗವಾಗುತ್ತಿರುವುದು ಹೆಮ್ಮೆಯ ಸಂಗತಿ. ಪೂಮಾ ಉಸೇನ್‌ ಬೋಲ್ಟ್‌ ರಂತಹ ದಿಗ್ಗಜರೊಂದಿಗೆ ಒಪ್ಪಂದ ಮಾಡಿಕೊಂಡಿದೆ. ಜತೆಗೆ ಪೀಲೆ, ಮರಡೋನಾ, ಥಿಯರಿ ಹೆನ್ರಿ ಮತ್ತು ಇತರರೊಂದಿಗೆ ದೊಡ್ಡ ರಾಯಭಾರತ್ವದ ಇತಿಹಾಸ ಹೊಂದಿದೆ,' ಎಂದು ಕೊಹ್ಲಿ ಹೇಳಿದ್ದಾರೆ. ಸ್ಪೋಟ್ಸ್‌ ಮತ್ತು ಟಾಲೆಂಟ್‌ ನಿರ್ವಹಣಾ ಘಟಕಗಳೊಂದಿಗೆ ಬಹು ವರ್ಷಗಳ ಒಪ್ಪಂದ ಮಾಡಿಕೊಂಡಿರುವ ಸಚಿನ್‌ ತೆಂಡೂಲ್ಕರ್‌ ಮತ್ತು ಮಹೇಂದ್ರ ಸಿಂಗ್‌ ಧೋನಿ 100 ಕೋಟಿ ರೂ. ಕ್ಲಬ್‌ ಸೇರಿದ್ದಾರೆ.
↧
ಪೂಮಾ ಜತೆ ಕೊಹ್ಲಿ 100 ಕೋಟಿ ಒಪ್ಪಂದ
↧