ಹೊಸದಿಲ್ಲಿ: ಜಪಾನಿನ ಟೋಕಿಯೋದಲ್ಲಿ ನಡೆಯಲಿರುವ 2020ರ ಒಲಿಂಪಿಕ್ಸ್‌ಗೆ ಅರ್ಹತಾ ಟೂರ್ನಿಯಾಗಿರುವ ಸಂಯುಕ್ತ ವಿಶ್ವ ಕಪ್‌ ಶೂಟಿಂಗ್‌ ಚಾಂಪಿಯನ್‌ಷಿಪ್‌ಗೆ ಭಾರತ ಆತಿಥ್ಯದ ಹಕ್ಕು ಪಡೆದಿದೆ. ಇದರೊಂದಿಗೆ ಜಾಗತಿಕ ಮಟ್ಟದ ಶೂಟಿಂಗ್‌ನಲ್ಲಿ ಗುರುತಿಸಿಕೊಳ್ಳುವ ಇರಾದೆಯಲ್ಲಿರುವ ಭಾರತಕ್ಕೆ ಮತ್ತಷ್ಟು ಉತ್ತೇಜನ ಸಿಕ್ಕಂತಾಗಿದೆ. ಹೊಸದಿಲ್ಲಿಯಲ್ಲಿ ನಡೆದ ಕಾರ್ಯಕಾರಿ ಮಂಡಳಿ ಸಭೆಯಲ್ಲಿ ಅಂತಾರಾಷ್ಟ್ರೀಯ ಶೂಟಿಂಗ್‌ ಕ್ರೀಡಾ ಒಕ್ಕೂಟ ಆತಿಥ್ಯದ ಹಕ್ಕಿಗಾಗಿ ಬಿಡ್‌ ಸಲ್ಲಿಸಿದ್ದ ಭಾರತೀಯ ರಾಷ್ಟ್ರೀಯ ರೈಫಲ್‌ ಸಂಸ್ಥೆ (ಎನ್‌ಆರ್‌ಐ)ಗೆ ಒಪ್ಪಿಗೆ ಸೂಚಿಸಿದೆ. ಸಂಯುಕ್ತ ವಿಶ್ವಕಪ್‌ ಶೂಟಿಂಗ್‌ ಚಾಂಪಿಯನ್‌ಷಿಪ್‌ ಶಾಟ್‌ಗನ್‌, ರೈಫಲ್‌ ಮತ್ತು ಪಿಸ್ತೂಲ್‌ ಸೇರಿದಂತೆ ಮೂರು ವಿಭಾಗಗಳನ್ನು ಒಳಗೊಂಡಿದೆ. 2019ರ ಈ ಆವೃತ್ತಿ ಟೋಕಿಯೊ ಒಲಿಂಪಿಕ್ಸ್‌ಗೆ ಕೋಟಾದಡಿ ಅರ್ಹತೆ ಪಡೆಯುವ ಟೂರ್ನಿಯಾಗಿದೆ. 'ಐಎಸ್‌ಎಸ್‌ಎಫ್‌ ಕಾರ್ಯಕಾರಿ ಮಂಡಳಿ ಭಾರತದಲ್ಲಿ 2019ರ ಸಂಯುಕ್ತ ವಿಶ್ವಕಪ್‌ ಶೂಟಿಂಗ್‌ ಚಾಂಪಿಯನ್‌ಷಿಪ್‌ ಆಯೋಜಿಸಲು ಆತಿಥ್ಯದ ಹಕ್ಕು ನೀಡಿದೆ' ಎಂದು ಎನ್‌ಆರ್‌ಎಐ ಮೂಲಗಳು ತಿಳಿಸಿವೆ. ಆತಿಥ್ಯದ ನಿರ್ಧಾರಕ್ಕೆ ಸಭೆಯಲ್ಲಿ ಒಕ್ಕೊರಲ ತೀರ್ಮಾನ ಕೈಗೊಳ್ಳಲಾಯಿತು.
↧
2019ರ ವಿಶ್ವಕಪ್‌ ಶೂಟಿಂಗ್‌ಗೆ ಭಾರತ ಆತಿಥ್ಯ
↧
