ಪಡಿತರ ಚೀಟಿ ಪರಿಶೀಲನೆ ಬೇಡ್ವೆ ಬೇಡ

ಹಾವೇರಿ: ಪಡಿತರ ಚೀಟಿ ಕೆಲಸಕ್ಕೆ ಮುಕ್ತಿಕೊಡಿ.. ಒತ್ತಡದ ಆತ್ಮಹತ್ಯೆಗೆ ಅಂತ್ಯ ನೀಡಿ.. ಈ ಮನ ಕಲಕುವ ಮನವಿ ಜಿಲ್ಲೆಯ ಗ್ರಾಮ ಲೆಕ್ಕಾಧಿಕಾರಿಗಳ ಸಂಘದ ಪದಾಧಿಕಾರಿಗಳದು.

ಪೂರ್ವ ನಿಗದಿಯಂತೆ ಕರ್ನಾಟಕ ರಾಜ್ಯ ಗ್ರಾಮ ಲೆಕ್ಕಾಧಿಕಾರಿಗಳ ಸಂಘದ ಜಿಲ್ಲಾ ಘಟಕದ ಪದಾಧಿಕಾರಿಗಳು ಸಾಮೂಹಿಕ ರಜೆ ಪಡೆದು ಬುಧವಾರ ನಗರದ ಜಿಲ್ಲಾಧಿಕಾರಿಗಳ ಕಚೇರಿ ಮುಂದೆ ಧರಣಿ ನಡೆಸಿದರು.

ಈ ವೇಳೆ ಮಾತನಾಡಿದ ಜಿಲ್ಲಾ ಘಟಕದ ಅಧ್ಯಕ್ಷ ಡಿ.ಎಂ. ಪಾಟೀಲ ಹಾಗೂ ಗೌರವಾಧ್ಯಕ್ಷ ಎಂ.ಸಿ. ಮೋಟಗಿ, ಗ್ರಾಮ ಲೆಕ್ಕಾಧಿಕಾರಿ ಎಂದರೆ ಆತನಿಗೆ ನಿಯೋಜಿಸಿದ ಊರು ಸೇರಿದಂತೆ ಅಕ್ಕಪಕ್ಕದ ಕನಿಷ್ಟ 2-3 ಊರುಗಳ ಎಲ್ಲ ಮಾಹಿತಿ ಜತೆಗೆ ಸರಕಾರದ ಎಲ್ಲ ಕಾರ್ಯಕ್ರಮಗಳ ಮಾಹಿತಿಯನ್ನು ತಹಸೀಲ್ದಾರ್‌ ಕಚೇರಿಗೆ ನೀಡಬೇಕು. ಬರದ ಸಂದರ್ಭದಲ್ಲಿ ಮುಂಗಾರ ಮತ್ತು ಹಿಂಗಾರು ಬೆಳೆ ಸಮೀಕ್ಷೆ ಕೈಗೊಂಡು ವರದಿ ನೀಡಬೇಕು. ವಿವಾಹ ನೋಂದಣಿ, ಜನನ-ಮರಣ ದಾಖಲಾತಿ, ಜನ-ಜಾನುವಾರು ಗಣತಿ, ಬೆಳೆ ಪಹಣಿ, ಜಮಾ ಬಂದಿ, ಸರಕಾರಿ ಜಮೀನು ಒತ್ತುವರಿ ತೆರವು, ಓಟಿಸಿ ಬೆಳೆ ಕಟಾವು ಪ್ರಯೋಗ, ಡಾಟಾ ಎಂಟ್ರಿ ಹೀಗೆ ದಿನದ ಇಪತ್ನಾಲ್ಕು ಗಂಟೆಗಳ ಕಾಲ ಕೆಲಸ ಮಾಡುವ ಪರಿಸ್ಥಿತಿಯಲ್ಲಿ ಇದ್ದೇವೆ. ಈಗ ಪಡಿತರ ಚೀಟಿ ಪರಿಶೀಲನೆ ಕೆಲಸವನ್ನು ಸಹ ಪಿಡಿಒ ಬದಲಿಗೆ ಗ್ರಾಮ ಲೆಕ್ಕಾಧಿಕಾರಿಗೆ ವಹಿಸಿದರೆ ನಮ್ಮ ಗತಿ ಏನು? ಈ ಒತ್ತಡದ ಕಾರಣಕ್ಕೆ ಮಾನಸಿಕವಾಗಿ ನೊಂದು ಮಹಿಳಾ ಗ್ರಾಮಲೆಕ್ಕಾಧಿಕಾರಿಗಳು ಆತ್ಮಹತ್ಯೆ ಮಾಡಿಕೊಳ್ಳುವ ಘಟನೆಗಳು ಹೆಚ್ಚುತ್ತಿವೆ.

ಪಡಿತರ ಚೀಟಿ ಪರಿಶೀಲನೆ ವೇಳೆ ಗ್ರಾಮ ಲೆಕ್ಕಾಧಿಕಾರಿಗಳ ಮೇಲೆ ದೈಹಿಕ ಹಲ್ಲೆಗಳು ನಡೆದು ಕುಟುಂಬವೇ ಆತ್ಮಹತ್ಯೆ ಮಾಡಿಕೊಳ್ಳುವ ಪರಿಸ್ಥಿತಿ ರಾಜ್ಯದ ಹಲವೆಡೆ ಸಂಭವಿಸಿವೆ. ಮಾತೃ ಇಲಾಖೆ ಕೆಲಸದ ಜತೆಗೆ ಆನ್‌ಲೈನ್‌ ಮೂಲಕ ಇನ್‌ಫುಟ್‌ ಸಬ್ಸಿಡಿ ಡಾಟಾ ಎಂಟ್ರಿ ಕೆಲಸ ಜತೆ ಪಡಿತರ ಚೀಟಿ ಪರಿಶೀಲನೆಯಿಂದ ಸಕ್ಕರೆ ಕಾಯಿಲೆ, ಬಿ.ಪಿ. ಹೆಚ್ಚಾಗಿ ವಿವಿಧ ರೋಗಗಳಿಗೆ ತುತ್ತಾಗುವ ಪರಿಸ್ಥಿತಿ ನಿರ್ಮಾಣವಾಗಿದೆ.

ಪಡಿತರ ಚೀಟಿ ಪರಿಶೀಲನೆ ಕೆಲಸ ಬೇಡವೇ ಬೇಡ. ಒತ್ತಡಕ್ಕೆ ಆತ್ಮಹತ್ಯೆ ಮಾಡಿಕೊಳ್ಳುವುದೂ ಬೇಡ. ನಮ್ಮ ಕೆಲಸ ನಮಗೆ ಪಡಿತರ ಚೀಟಿ ಪರಿಶೀಲನೆ ಬೇರೆಯವರಿಗೆ ವಹಿಸಿ ನಮ್ಮ ಇಲಾ ಖೆಯ ಕೆಲಸವನ್ನು ನೆಮ್ಮದಿಯಿಂದ ಮಾಡಲು ಅವಕಾಶ ಕೊಡಿ ಎಂದು ಹಕ್ಕೊತ್ತಾಯ ಮಂಡಿಸಿದರು.

ಗ್ರಾಪಂನಲ್ಲಿ ಬಿಲ್‌ ಕಲೆಕ್ಟರ್‌, ಆಪರೇಟರ್‌, ಕಂಪ್ಯೂಟರ್‌ ಆಪರೇಟರ್‌ ಹೀಗೆ ಕನಿಷ್ಟ 7-8 ಸಿಬ್ಬಂದಿ ಇದ್ದೇ ಇರುತ್ತಾರೆ. ಅವರಿಗೆ ಪಡಿತರ ಚೀಟಿ ಪರಿಶೀಲನೆ ಕೆಲಸ ಕಷ್ಟ ವಲ್ಲ. ಈ ಕೆಲಸವನ್ನು ಪುನಃ ಗ್ರಾಮ ಲೆಕ್ಕಾಧಿಕಾರಿಗಳಿಗೆ ವಹಿಸಿರುವ ಕಾರಣಕ್ಕೆ ನಿತ್ಯದ ಕೆಲಸ ಸ್ಥಗಿತಗೊಂಡು ಗ್ರಾಮಸ್ಥರು ಮನೆಗೆ ಬಂದು ಗಲಾಟೆ ಮಾಡುವುದು, ದಾರಿಯಲ್ಲಿ ಹಲ್ಲೆ ಮಾಡುವ ಪರಿಸ್ಥಿತಿ ನಿರ್ಮಾಣಗೊಂಡಿದೆ. ಈ ಹಿನ್ನೆಲೆಯಲ್ಲಿ ಕೂಡಲೇ ಸರಕಾರದ ಸುತ್ತೋಲೆ ಹಿಂಪಡೆಯಬೇಕು. ವಿವಿಧ ಬೇಡಿಕೆಗಳನ್ನು ಈಡೇರಿಸುವಂತೆ ಒತ್ತಾಯಿಸಿದರು. ತಮಗೆ ಆಗುತ್ತಿರುವ ನೋವು-ತೊಂದರೆ ಬಗ್ಗೆ ಜಿಲ್ಲಾಧಿಕಾರಿ ಜತೆ ಹೇಳಿಕೊಳ್ಳಲು ಗ್ರಾಮ ಲೆಕ್ಕಾಧಿಕಾರಿಗಳು ಮುಂದಾದರೂ ಅವಕಾಶ ನಿರಾಕರಿಸಿದರು.