ಮೊಹಾಲಿ ಟೆಸ್ಟ್ ಪಂದ್ಯದ ವೇಳೆ ತೊಡೆಯ ಸ್ನಾಯು ಸೆಳೆತಕ್ಕೊಳಗಾಗಿದ್ದ ಸ್ಟೇನ್, ಬೆಂಗಳೂರಿನ ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ನಡೆದ ಎರಡನೇ ಟೆಸ್ಟ್ ಪಂದ್ಯಕ್ಕೆ ಅಲಭ್ಯರಾಗಿದ್ದರು. ಇದೀಗ ನ.25ರಿಂದ ನಾಗ್ಪುರದಲ್ಲಿ ಆರಂಭವಾಗಲಿರುವ ಮೂರನೇ ಟೆಸ್ಟ್ ವೇಳೆ ಸ್ಟೇನ್ ಚೇತರಿಸಿಕೊಳ್ಳುವ ಸಾಧ್ಯತೆಗಳು ಕಡಿಮೆಯಿರುವುದರಿಂದ ಡಿ'ಲ್ಯಾಂಗ್ ಅವರನ್ನು ಕರೆಸಿಕೊಳ್ಳಲಾಗಿದೆ.
ಈ ಬಗ್ಗೆ ಪ್ರತಿಕ್ರಿಯೆ ನೀಡಿರುವ ದಕ್ಷಿಣ ಆಫ್ರಿಕಾ ತಂಡದ ಕೋಚ್ ರಸೆಲ್ ಡೊಮಿಂಗೊ, ''ಸದ್ಯದ ಸ್ಥಿತಿಯಲ್ಲಿ ನಮ್ಮಲ್ಲಿ ಮೊರ್ನೆ ಮಾರ್ಕೆಲ್, ಕಗಿಸೊ ರಬಾಡ ಮತ್ತು ಕೈಲ್ ಅಬಾಟ್ ಸೇರಿ ಸಂಪೂರ್ಣ ಫಿಟ್ ಆಗಿರುವ ಕೇವಲ ಮೂವರು ವೇಗದ ಬೌಲರ್‌ಗಳಿದ್ದಾರೆ. ಡೇಲ್ ಸ್ಟೇನ್ ಗಾಯದಿಂದ ಬಳಲುತ್ತಿರುವುದರಿಂದ ಅವರಿಗೆ ಮೀಸಲು ಆಟಗಾರನಾಗಿ ಡಿ'ಲ್ಯಾಂಗ್ ಅವರನ್ನು ತಂಡಕ್ಕೆ ಸೇರಿಸಿಕೊಂಡಿದ್ದೇವೆ,'' ಎಂದು ತಿಳಿಸಿದ್ದಾರೆ.
''ಡಿ'ಲ್ಯಾಂಗ್ ಅತಿ ವೇಗದಲ್ಲಿ ಬೌಲಿಂಗ್ ಮಾಡುವ ಸಾಮರ್ಥ್ಯ ಹೊಂದಿದ್ದಾರೆ. ಚೆಂಡು ರಿವರ್ಸ್ ಸ್ವಿಂಗ್‌ಗೆ ಸಹಕಾರಿಯಾಗುವ ಸಂದರ್ಭಗಳಲ್ಲಿ ಅವರು ಅತ್ಯಂತ ಪರಿಣಾಮಕಾರಿಯಾಗುತ್ತಾರೆ. ಒಂದು ಉತ್ತಮ ಸ್ಪೆಲ್ ಮೂಲಕ ಪಂದ್ಯವನ್ನು ನಮ್ಮ ಕಡೆ ತಿರುಗಿಸುವ ಸಾಮರ್ಥ್ಯ ಅವರಿಗಿದೆ,'' ಎಂದು ಡೊಮಿಂಗೊ ತಿಳಿಸಿದ್ದಾರೆ.
ಮರ್ಚೆಂಟ್ ಡಿ'ಲ್ಯಾಂಗ್, ಭಾರತ ವಿರುದ್ಧ ಟಿ20 ಹಾಗೂ ಏಕದಿನ ಸರಣಿ ಗೆದ್ದ ದಕ್ಷಿಣ ಆಫ್ರಿಕಾ ತಂಡದಲ್ಲಿದ್ದರು. 2011ರಲ್ಲಿ ಟೆಸ್ಟ್ ಕ್ರಿಕೆಟ್‌ಗೆ ಪದಾರ್ಪಣೆ ಮಾಡಿರುವ ಡಿ'ಲ್ಯಾಂಗ್, ಇಲ್ಲಿಯವರೆಗೆ ಕೇವಲ ಎರಡು ಟೆಸ್ಟ್ ಪಂದ್ಯಗಳನ್ನಾಡಿದ್ದು 9 ವಿಕೆಟ್ ಪಡೆದಿದ್ದಾರೆ.
ಹೊಸದಿಲ್ಲಿ: ಗಾಯದಿಂದ ಇನ್ನೂ ಚೇತರಿಸಿಕೊಳ್ಳದ ವೇಗಿ ಡೇಲ್ ಸ್ಟೇನ್ ಅವರಿಗೆ ಮೀಸಲು ಆಟಗಾರನಾಗಿ ಬಲಗೈ ವೇಗದ ಬೌಲರ್ ಮರ್ಚೆಂಟ್ ಡಿ'ಲ್ಯಾಂಗ್ ಅವರನ್ನು ಭಾರತ ಪ್ರವಾಸದಲ್ಲಿರುವ ದಕ್ಷಿಣ ಆಫ್ರಿಕಾ ಟೆಸ್ಟ್ ತಂಡಕ್ಕೆ ಸೇರಿಸಿಕೊಳ್ಳಲಾಗಿದೆ.