ಉದ್ದೇಶಿತ ರಸ್ತೆ ಸಾರಿಗೆ ಮತ್ತು ಸುರಕ್ಷೆ ವಿಧೇಯಕದಲ್ಲಿ ಮಹತ್ವದ ಬದಲಾವಣೆಗಳು ಹೊಸದಿಲ್ಲಿ: ಡ್ರೈವಿಂಗ್‌ ಲೈಸನ್ಸ್‌ ಹೊಂದಿರುವ ಪ್ರತಿ ಮೂವರಲ್ಲಿ ಒಬ್ಬನದು ನಕಲಿಯಾಗಿದೆ. ದೇಶದಲ್ಲಿ 5 ಕೋಟಿಗೂ ಹೆಚ್ಚಿನ ಬೋಗಸ್‌ ಲೈಸನ್ಸ್‌ಗಳಿವೆ ಎಂದು ಕೇಂದ್ರ ಸರಕಾರವೇ ಹೇಳಿದೆ. ರಸ್ತೆ ಸಾರಿಗೆ ಮತ್ತು ಸುರಕ್ಷೆ ವಿಧೇಯಕದಲ್ಲಿ ಬದಲಾವಣೆಗಳನ್ನು ತಂದು ಇದೆಲ್ಲವನ್ನೂ ನಿಯಂತ್ರಿಸುವುದಾಗಿ ಕೇಂದ್ರ ರಸ್ತೆ ಸಾರಿಗೆ ಸಚಿವ ನಿತಿನ್‌ ಗಡ್ಕರಿ ಭಾನುವಾರ ಹೇಳಿದ್ದಾರೆ. ಉದ್ದೇಶಿತ ವಿಧೇಯಕಕ್ಕೆ ಮುಂದಿನ ಸಂಸತ್‌ ಅಧಿವೇಶನದಲ್ಲಿ ಅಂಗೀಕಾರ ಪಡೆಯಲು ಗಡ್ಕರಿ ಉತ್ಸುಕತೆ ತೋರಿಸಿದ್ದಾರೆ. ಉದ್ದೇಶಿತ ವಿಧೇಯಕವು ಬೋಗಸ್‌ ಲೈಸನ್ಸ್‌ದಾರರಿಗೆ 10,000 ರೂ. ದಂಡ ವಿಧಿಸಲು ಮತ್ತು ಒಂದು ವರ್ಷ ಜೈಲು ಶಿಕ್ಷೆ ವಿಧಿಸಲು ಅವಕಾಶ ಕಲ್ಪಿಸುತ್ತದೆ. ಪ್ರಸ್ತುತ ದಂಡದ ಪ್ರಮಾಣ 500 ರೂಪಾಯಿ ಇದ್ದು, 3 ತಿಂಗಳು ಜೈಲು ಶಿಕ್ಷೆಗೆ ಅವಕಾಶವಿದೆ. ಅಪ್ರಾಪ್ತ ವಯಸ್ಸಿನ ತಪ್ಪಿತಸ್ಥರ ವಿರುದ್ಧವೂ ಕಠಿಣ ಕ್ರಮ ಜರುಗಿಸಲು ಉದ್ದೇಶಿತ ವಿಧೇಯಕದಲ್ಲಿ ಪ್ರಸ್ತಾಪಗಳಿವೆ. ಅಪ್ರಾಪ್ತ ವಯಸ್ಕನ ತಪ್ಪು ಸಾಬೀತಾದರೆ, ಆತನ ಪೋಷಕರು ಇಲ್ಲವೇ ವಾಹನದ ಮಾಲೀಕರಿಗೆ ಮೂರು ವರ್ಷಗಳ ಜೈಲು ಮತ್ತು 20,000 ರೂ. ದಂಡ ವಿಧಿಸಲು ಸಾಧ್ಯವಾಗಲಿದೆ. ಅಲ್ಲದೇ ವಾಹನದ ನೋಂದಣಿಯನ್ನೇ ರದ್ದುಗೊಳಿಸಬಹುದು. ಒಂದು ವೇಳೆ ಅಪ್ರಾಪ್ತ ವಯಸ್ಕನು ಅಪಘಾತವೆಸಗಿದ ಪಕ್ಷದಲ್ಲಿ ಎದುರಿನ ವ್ಯಕ್ತಿಯು ಸತ್ತರೇ, ಇಲ್ಲವೇ ಗಂಭೀರವಾಗಿ ಗಾಯಗೊಂಡರೆ ಅಪ್ರಾಪ್ತ ವಯಸ್ಕನಿಗೆ ಶಿಕ್ಷೆ ವಿಧಿಸಲು ಅವಕಾಶವಿದೆ. ರಸ್ತೆ ಅಪಘಾತಗಳಿಂದ ಪ್ರತಿ ವರ್ಷ 1.5 ಲಕ್ಷ ಜನರು ಸಾಯುತ್ತಿದ್ದಾರೆ. ಪಾರದರ್ಶಕ ಮತ್ತು ಆನ್‌ಲೈನ್‌ ವ್ಯವಸ್ಥೆ ಡ್ರೈವಿಂಗ್‌ ಲೈಸನ್ಸ್‌ ವಿತರಣೆಗೆ ಪಾರದರ್ಶಕವಾದ ಆನ್‌ಲೈನ್‌ ವ್ಯವಸ್ಥೆಯನ್ನು ಸರಕಾರ ಅನುಸರಿಸಲಿದೆ. ರಾಜಕಾರಣಿ ಅಥವಾ ಸೆಲಬ್ರಿಟಿ ಯಾರೇ ಆಗಲಿ ನಿಗದಿತ ಪರೀಕ್ಷೆಯಲ್ಲಿ ಉತ್ತೀರ್ಣರಾಗಿ ಲೈಸನ್ಸ್‌ ಪಡೆಯಬೇಕು. ಇದು ಸಂಪೂರ್ಣ ಪಾರದರ್ಶಕವಾಗಿ ಇರಲಿದೆ. ಬೋಗಸ್‌ ಲೈಸನ್ಸ್‌ಗಳನ್ನು ಪತ್ತೆ ಹಚ್ಚಲು ಮತ್ತು ಹೊಸ ಲೈಸನ್ಸ್‌ಗಳನ್ನು ವಿತರಿಸಲು ಆನ್‌ಲೈನ್‌ ವ್ಯವಸ್ಥೆಯನ್ನು ಬಳಸಲಿದ್ದೇವೆ ಎಂದು ಗಡ್ಕರಿ ಹೇಳಿದ್ದಾರೆ. ''ಪ್ರತಿಪಕ್ಷಗಳು ಪ್ರಾದೇಶಿಕ ಸಾರಿಗೆ ಕಚೇರಿಗಳಲ್ಲಿನ ಪಟ್ಟಭದ್ರ ಹಿತಾಸಕ್ತಿಗಳಿಗೆ ಮಣಿದು ವಿಧೇಯಕಕ್ಕೆ ತಡೆಯೊಡ್ಡುತ್ತಿವೆ. ಆದಾಗ್ಯೂ, ಮುಂದಿನ ಸಂಸತ್‌ ಅಧಿವೇಶನದಲ್ಲಿ ಉದ್ದೇಶಿತ ವಿಧೇಯಕಕ್ಕೆ ಅನುಮೋದನೆ ಸಿಗಲಿದೆ ಎನ್ನುವ ವಿಶ್ವಾಸ ನಮ್ಮದು,'' ಎಂದು ಗಡ್ಕರಿ ತಿಳಿಸಿದ್ದಾರೆ. ಭಾರತೀಯ ರಸ್ತೆಗಳಲ್ಲಿ ಸುರಕ್ಷೆಗೆ ಒತ್ತು ನೀಡಿ, ಡ್ರೈವಿಂಗ್‌ ಲೈಸನ್ಸ್‌ ವಿತರಣೆ ಸೇರಿದಂತೆ ಇತರೆ ಸಾರಿಗೆ ಇಲಾಖೆಯಲ್ಲಿ ಮಹತ್ವದ ಬದಲಾವಣೆಗಳಿಗೆ ಹೊಸ ವಿಧೇಯಕ ಸಹಾಯಕವಾಗಲಿದೆ --- ದೇಶದಲ್ಲಿನ 18 ಕೋಟಿ ಡ್ರೈವಿಂಗ್‌ ಲೈಸನ್ಸ್‌ಗಳಲ್ಲಿ 5.4 ಕೋಟಿ ಲೈಸನ್ಸ್‌ಗಳು ನಕಲಿ. ಪ್ರತಿ ಮೂವರಲ್ಲಿ ಒಬ್ಬನದು ನಕಲಿ ಲೈಸನ್ಸ್‌! ರಸ್ತೆ ಸುರಕ್ಷೆ ವಿಧೇಯಕದಲ್ಲಿ ಬದಲಾವಣೆ ತರಲು ಕೇಂದ್ರದ ಯತ್ನ. ಉದ್ದೇಶಿತ ನೂತನ ವಿಧೇಯಕದಲ್ಲಿ ದಂಡ ಮತ್ತು ಜೈಲು ಶಿಕ್ಷೆ ಪ್ರಮಾಣ ಹೆಚ್ಚಳ ವಿಧೇಯಕದ ಅನುಮೋದನೆ ನಂತರ 5,000 ನೂತನ ಡ್ರೈವಿಂಗ್‌ ಸೆಂಟರ್‌ಗಳನ್ನು ಆರಂಭಿಸಲು ಸರಕಾರದ ಚಿಂತನೆ. ವಿಧೇಯಕದ ಮೂಲಕ ಸೆಂಟ್ರಲ್‌ ಮೋಟಾರ್‌ ವೆಹಿಕಲ್‌ ಕಾಯ್ದೆ-1988ಕ್ಕೆ ಬದಲಾವಣೆ. ನಿಯಮ ಉಲ್ಲಂಘಿಸುವವರಿಗೆ ಕಠಿಣ ಶಿಕ್ಷೆ.
↧
ನಕಲಿ ಲೈಸೆನ್ಸ್‌ಗೆ 10 ಸಾವಿರ ದಂಡ?
↧