ಟೋಕಿಯೊ: ಜಪಾನ್‌ನ ಟೆಲಿಕಾಂ ಕಂಪನಿ ಸಾಫ್ಟ್‌ಬ್ಯಾಂಕ್‌ನ ಭಾರತ ಮೂಲದ ಸಿಒಒ ನಿಕೇಶ್‌ ಅರೋರಾ ಅವರು ಮಾರ್ಚ್‌ 31ಕ್ಕೆ ಅಂತ್ಯವಾದ ಆರ್ಥಿಕ ವರ್ಷದಲ್ಲಿ 500 ಕೋಟಿ ರೂ.ಗಳ(7.3 ಕೋಟಿ ಡಾಲರ್‌) ವೇತನ ಪ್ಯಾಕೇಜ್‌ ಪಡೆದಿದ್ದಾರೆ. ಕಳೆದ ಆರ್ಥಿಕ ವರ್ಷದಲ್ಲಿ ಅವರು ಬೋನಸ್‌ ಸೇರಿದಂತೆ 1.35 ಕೋಟಿ ಡಾಲರ್‌ ವೇತನ ಪ್ಯಾಕೇಜ್‌ ಪಡೆದಿದ್ದರು. ಈಗಾಗಲೇ ಜಪಾನ್‌ನಲ್ಲಿ ಹೆಚ್ಚಿನ ವೇತನ ಹೊಂದಿರುವ ಎಕ್ಸಿಕ್ಯೂಟೀವ್‌ ಎಂಬ ಹೆಗ್ಗಳಿಕೆಯನ್ನು ಅರೋರಾ ಹೊಂದಿದ್ದು, ಹೆಚ್ಚಿನ ವೇತನ ಪಡೆಯುವ ವಿಶ್ವದ ಉದ್ಯಮ ಪ್ರತಿನಿಧಿಗಳ ಪಟ್ಟಿಯಲ್ಲಿ ಒಬ್ಬರಾಗಿದ್ದಾರೆ. ಅವರ ಸಾಲಿನಲ್ಲಿ ಆ್ಯಪಲ್‌ ಕಂಪನಿಯ ಟಿಮ್‌ ಕುಕ್‌ ಮತ್ತು ವಾಲ್ಟ್‌ ಡಿಸ್ನಿಯ ಬಾಬ್‌ ಐಗರ್‌ ಮತ್ತಿತರ ಪ್ರತಿಷ್ಠಿತ ಗಣ್ಯರಿದ್ದಾರೆ. ಗೂಗಲ್‌ ತೊರೆದು ಉಪಾಧ್ಯಕ್ಷ ಮತ್ತು ಸಿಇಒ ಆಗಿ 48 ವರ್ಷದ ನಿಕೇಶ್‌ ಅವರು ಸೆಪ್ಟೆಂಬರ್‌ 2014ರಲ್ಲಿ ಸಾಫ್ಟ್‌ಬ್ಯಾಂಕ್‌ ಪ್ರವೇಶಿಸಿದ್ದರು. ಕಳೆದ ವರ್ಷದ ಮೇ ತಿಂಗಳಿನಲ್ಲಿ ಅವರು ಸಾಫ್ಟ್‌ಬ್ಯಾಂಕ್‌ ಅಧ್ಯಕ್ಷ ಮತ್ತು ಸಿಒಒ ಆಗಿ ಬಡ್ತಿ ಪಡೆದಿದ್ದರು. 35 ವರ್ಷಗಳ ಸಾಫ್ಟ್‌ಬ್ಯಾಂಕ್‌ ಇತಿಹಾಸದಲ್ಲಿ ಮೊದಲ ಸಲ 'ಅಧ್ಯಕ್ಷ' ಎನ್ನುವ ಪಟ್ಟವನ್ನು ಅವರು ಪಡೆದಿದ್ದರು. ನಿಕೇಶ್‌ ಅರೋರಾ ಅವರು ಬನಾರಸ್‌ ಹಿಂದೂ ವಿಶ್ವವಿದ್ಯಾಲಯದ ಪದವೀಧರರು. ಅರೋರಾ ನೇತೃತ್ವದ ಸಾಫ್ಟ್‌ಬ್ಯಾಂಕ್‌ ಭಾರತದಲ್ಲೂ ತನ್ನ ಕಾರ್ಯಾಚರಣೆ ನಡೆಸಿದ್ದು, ಇ-ಕಾಮರ್ಸ್‌ ವಲಯದ ಸ್ನ್ಯಾಪ್‌ಡೀಲ್‌.ಕಾಮ್‌, ಓಲಾ ಕ್ಯಾಬ್‌, ರಿಯಲ್‌ ಎಸ್ಟೇಟ್‌ ವಲಯದ ಹೌಸಿಂಗ್‌.ಕಾಮ್‌, ಹೋಟೆಲ್‌ ಬುಕಿಂಗ್‌ ಆ್ಯಪ್‌ ಒಯೊ ರೂಮ್ಸ್‌ ಮತ್ತು ಗ್ರೂಫರ್ಸ್‌ನಲ್ಲಿ ಹಣ ಹೂಡಿದೆ. ಭಾರತದಲ್ಲಿ ಸಾಫ್ಟ್‌ಬ್ಯಾಂಕ್‌ನ ಹೂಡಿಕೆ ನೂರು ಕೋಟಿ ಡಾಲರ್‌ ಅನ್ನು ದಾಟಿದ್ದು, ಅದನ್ನು ಸಾವಿರ ಕೋಟಿ ಡಾಲರ್‌ಗೆ ವಿಸ್ತರಿಸುವುದಾಗಿ ಸಾಫ್ತ್‌ಬ್ಯಾಂಕ್‌ ಹೇಳಿಕೊಂಡಿತ್ತು.
↧
ಸಾಫ್ಟ್‌ಬ್ಯಾಂಕ್‌ ಸಿಒಒಗೆ 500 ಕೋಟಿ ರೂ.ಗಳ ವೇತನ
↧