ಬ್ರೆಡ್‌ಗಳಲ್ಲಿನ ವಿವಾದಾತ್ಮಕ ರಾಸಾಯನಿಕ ಬಳಕೆಗೆ ತಡೆ

ಗ್ರಾಹಕರಲ್ಲಿ ವಿಶ್ವಾಸ ಮೂಡಿಸಲು ಬ್ರೆಡ್‌ ತಯಾರಿಕಾ ಸಂಘದ ಯತ್ನ, ಪೊಟ್ಯಾಷಿಯಂ ಬ್ರೋಮೇಟ್‌, ಅಯೋಡೇಟ್‌ಗೆ ಗುರುವಾರ ಮಧ್ಯರಾತ್ರಿಯಿಂದಲೇ ನಿರ್ಬಂಧ

ಹೊಸದಿಲ್ಲಿ: ಬ್ರೆಡ್‌ಗಳಲ್ಲಿ ಕ್ಯಾನ್ಸರ್‌ಗೆ ಕಾರಣವಾಗುವ ರಾಸಾಯನಿಕಗಳು ಕಂಡು ಬಂದಿವೆ ಎನ್ನುವ ದೂರುಗಳಿವೆ. ಈ ಹಿನ್ನೆಲೆಯಲ್ಲಿ ವಿವಾದಾತ್ಮಕ ರಾಸಾಯನಿಕಗಳಾದ ಪೊಟ್ಯಾಷಿಯಂ ಬ್ರೋಮೇಟ್‌ ಮತ್ತು ಪೊಟ್ಯಾಷಿಯಂ ಅಯೋಡೇಟ್‌ಗಳನ್ನು ತಮ್ಮ ಉತ್ಪನ್ನಗಳಲ್ಲಿ ಬಳಸದಿರಲು ಬ್ರೆಡ್‌ ತಯಾರಿಕಾ ಸಂಘ ನಿರ್ಧರಿಸಿದೆ.

ಗುರುವಾರ ಮಧ್ಯರಾತ್ರಿಯಿಂದಲೇ ಬ್ರೆಡ್‌ ಮತ್ತಿತರ ಬೇಕರಿ ಉತ್ಪನ್ನಗಳ ತಯಾರಿಕೆಯಲ್ಲಿ ಈ ರಾಸಾಯನಿಕಗಳ ಬಳಕೆಯನ್ನು ನಿಲ್ಲಿಸಲಾಗುವುದು. ಈ ಸಂಬಂಧ ದೇಶದ ಬ್ರೆಡ್‌ ಉತ್ಪಾದಕರಿಗೆ ಸೂಚನೆ ನೀಡಲಾಗಿದೆ ಎಂದು ಅಖಿಲ ಭಾರತ ಬ್ರೆಡ್‌ ಉತ್ಪಾದಕರ ಸಂಘ ತಿಳಿಸಿದೆ.

ಆದಾಗ್ಯೂ, ಸಿಎಇ ವರದಿಯನ್ನು ಪರಾಮರ್ಶಿಸುವಂತೆ ಕೇಂದ್ರ ಆಹಾರ ಸುರಕ್ಷೆ ಮತ್ತು ಗುಣಮಟ್ಟ ಪ್ರಾಧಿಕಾರವನ್ನು(ಎಫ್‌ಎಸ್‌ಎಸ್‌ಎಐ) ಸಂಘವು ಒತ್ತಾಯಿಸಿದೆ. ವೈಜ್ಞಾನಿಕ ಪರೀಕ್ಷೆಗಳು ಈ ಕುರಿತಾಗಿ ಇನ್ನಷ್ಟು ನಡೆಯಬೇಕಿದೆ ಎಂದಿದೆ. ಬ್ರಿಟಾನಿಯಾ, ಹಾರ್ವೆಸ್ಟ್‌ ಗೋಲ್ಡ್‌ನಂಥ ಪ್ರಮುಖ ಬ್ರೆಡ್‌ ಉತ್ಪಾದಕ ಕಂಪನಿಗಳೂ ಸೇರಿದಂತೆ 90 ಸಂಘಟಿತ ಕಂಪನಿಗಳನ್ನು ಈ ಸಂಘವು ಪ್ರತಿನಿಧಿಸುತ್ತದೆ.

''ರಾಜಧಾನಿ ನಗರ ದಿಲ್ಲಿಯಲ್ಲಿ ಮಾರಾಟವಾಗುವ ಬಹುತೇಕ ಬ್ರೆಡ್‌ಗಳಲ್ಲಿ ಕ್ಯಾನ್ಸರ್‌ ಕಾರಕ ರಾಸಾಯನಿಕಗಳು ಪತ್ತೆಯಾಗಿವೆ,'' ಎನ್ನುವ ಸಿಎಸ್‌ಇ(ವಿಜ್ಞಾನ ಮತ್ತು ಪರಿಸರ ಕೇಂದ್ರ) ವರದಿಯಿಂದ ಗ್ರಾಹಕರಲ್ಲಿ ಆತಂಕ ಮನೆ ಮಾಡಿತ್ತು. ಇದರ ಪರಿಣಾಮ ಬ್ರೆಡ್‌ಗಳ ಮಾರಾಟದಲ್ಲಿ ಶೇ.10ರಷ್ಟು ಇಳಿಕೆ ಕಂಡಿತ್ತು.

ಬ್ರೆಡ್‌ ಉತ್ಪನ್ನಗಳಲ್ಲಿ ವಿವಾದಿತ ಪೊಟ್ಯಾಷಿಯಂ ಬ್ರೋಮೇಟ್‌ ಬಳಕೆ ಕೈಬಿಡುವಂತೆ ಎಫ್‌ಎಸ್‌ಎಸ್‌ಎಐ ಈಗಾಗಲೇ ಹೇಳಿದ್ದು, ಮುಂದಿನ 6-7 ದಿನಗಳಲ್ಲಿ ಅಧಿಸೂಚನೆ ಹೊರಬೀಳಬಹುದು. ಅದಕ್ಕೂ ಮೊದಲೇ ಈ ರಾಸಾಯನಿಕಗಳ ಬಳಕೆಯನ್ನು ಕೈಬಿಡಲು ನಾವು ತೀರ್ಮಾನ ಕೈಗೊಂಡಿದ್ದೇವೆ,'' ಎಂದು ಅಖಿಲ ಭಾರತ ಬ್ರೆಡ್‌ ಉತ್ಪಾದಕರ ಸಂಘದ ಅಧ್ಯಕ್ಷ ರಮೇಶ್‌ ಮಾಗೊ ತಿಳಿಸಿದ್ದಾರೆ.

=========

ಕಳೆದ ಎರಡು ದಶಕಗಳಿಂದ ಪೊಟ್ಯಾಷಿಯಂ ಬ್ರೋಮೇಟ್‌ ಬಳಸುತ್ತಿದ್ದೇವೆ. ಇದರ ಬಳಕೆಗೆ ಎಫ್‌ಎಸ್‌ಎಸ್‌ಎಐ ಅವಕಾಶ ಸಹ ನೀಡಿತ್ತು. ಅಮೆರಿಕದಲ್ಲೂ ಇದರ ಬಳಕೆಯಾಗುತ್ತಿದೆ. ಆದರೆ ದಿಢೀರ್‌ ವಿವಾದ ಸೃಷ್ಟಿಯಾಗಿದೆ. ಆದಾಗ್ಯೂ, ಸಾರ್ವಜನಿಕ ಅಭಿಪ್ರಾಯವನ್ನು ಗೌರವಿಸಿ, ವಿವಾದಿತ ರಾಸಾಯನಿಕಗಳ ಬಳಕೆಯನ್ನು ಬ್ರೆಡ್‌ ತಯಾರಿಕೆಯಲ್ಲಿ ನಿಲ್ಲಿಸಿದ್ದೇವೆ. ಇದರ ಬದಲಿಗೆ ಸುರಕ್ಷಿತವಾದ ಕಿಣ್ವಗಳು ಸೇರಿದಂತೆ ಪರ್ಯಾಯಗಳನ್ನು ಬಳಸುತ್ತೇವೆ.

-ಆದಿಲ್‌ ಹುಸೇನ್‌, ಹಾರ್ವೆಸ್ಟ್‌ ಗೋಲ್ಡ್‌ ವ್ಯವಸ್ಥಾಪಕ ನಿರ್ದೇಶಕ

=======

ಭಾರತದಲ್ಲಿ ತಯಾರಾಗುವ ಬಹುತೇಕ ಕಂಪನಿಗಳ ಬ್ರೆಡ್‌ಗಳಲ್ಲಿ ಪೊಟ್ಯಾಷಿಯಂ ಬ್ರೋಮೇಟ್‌ ಬಳಕೆಯಾಗುತ್ತಿದ್ದು, ಅದಕ್ಕೆ ಈಗ ನಿಷೇಧ ಏರಲಾಗಿದೆ.

ಬ್ರೆಡ್‌ಗಳ ತಾಜಾತನ ಸಂರಕ್ಷಿಸಲು ಪೊಟ್ಯಾಷಿಯಂ ಬ್ರೋಮೇಟ್‌ ಅನ್ನು ಬಳಸಲಾಗುತ್ತದೆ.

ಬ್ರೆಡ್‌, ಬನ್‌, ಪಿಜ್ಜಾ, ಬರ್ಗರ್‌ ಸೇರಿದಂತೆ ಬೇಕರಿ ಪದಾರ್ಥಗಳಲ್ಲಿ ಕ್ಯಾನ್ಸರ್‌ಕಾರಕ ಪೊಟ್ಯಾಷಿಯಂ ಬ್ರೋಮೇಟ್‌ ಮತ್ತು ಪೊಟ್ಯಾಷಿಯಂ ಅಯೋಡೇಟ್‌ ಬಳಕೆಯಾಗುತ್ತಿದೆ ಎಂದು ಸಿಎಸ್‌ಇ ಎಚ್ಚರಿಸಿತ್ತು. ಈ ರಾಸಾಯನಿಕಗಳಿಂದ ಕ್ಯಾನ್ಸರ್‌ ಮತ್ತು ಥೈರಾಯ್ಡ್‌ ಕಾಯಿಲೆಗಳು ಬರುವ ಸಾಧ್ಯತೆ ಇದೆ. ಕಿಡ್ನಿಯಲ್ಲಿ ಗಡ್ಡೆ ಬೆಳೆಯುವ ಸಾಧ್ಯತೆ ಇದೆ ಎಂದು ಸಿಎಸ್‌ಇ ಹೇಳಿತ್ತು.

ಬ್ರಿಟನ್‌, ಕೆನಡಾ, ಆಸ್ಪ್ರೇಲಿಯಾ, ನ್ಯೂಜಿಲ್ಯಾಂಡ್‌, ಚೀನಾ, ಶ್ರೀಲಂಕಾ, ಬ್ರೆಜಿಲ್‌, ನೈಜೀರಿಯಾ, ಪೆರು ಮತ್ತು ಕೊಲಂಬಿಯಾ ದೇಶಗಳಲ್ಲಿ ಪೊಟ್ಯಾಷಿಯಂ ಬ್ರೋಮೇಟ್‌ಗೆ ನಿಷೇಧವಿದೆ.