ನಿರ್ದೇಶಕ ರಾಮ್‌ಗೋಪಾಲ್ ವರ್ಮಾ ಅವರಿಂದ 'ದಶಕದ ಸುಂದರಿ' ಎಂದು ಕರೆಸಿಕೊಂಡಾಕೆ ನತಾಲಿಯಾ ಕೌರ್. ವರ್ಮಾರ 'ಡಿಪಾರ್ಟ್‌ಮೆಂಟ್' ಹಿಂದಿ ಚಿತ್ರದ ಐಟಂ ಹಾಡಿಗೆ ಆಕೆ ಸೊಗಸಾಗಿ ಕುಣಿದಿದ್ದರು. ಹಾಗೆ ನೋಡಿದರೆ ಈ ಹಾಡಿಗೆ ಸನ್ನಿ ಲಿಯೋನ್ ಕುಣಿಯಬೇಕಿತ್ತು. ಆಗ ಸಿನಿಮಾಗಳಲ್ಲಿ ಸನ್ನಿ ಬಿಝಿಯಾಗಿದ್ದರಿಂದ ವರ್ಮಾ, ನತಾಲಿಯಾರಿಂದ ಕುಣಿಸಿದ್ದರು. ಇಲ್ಲಿನ ಯಶಸ್ಸು ಆಕೆಗೆ ತಮಿಳು, ತೆಲುಗಿನ ಐಟಂಗಳಲ್ಲಿ ಅವಕಾಶ ಕಲ್ಪಿಸಿತು. ಐಟಂ ಡಾನ್ಸ್‌ಗಳಲ್ಲಿ ಗುರುತಿಸಿಕೊಂಡ ನಟಾಲಿಯಾ ಇದೀಗ ನಾಯಕಿಯಾಗಿ ಬಡ್ತಿ ಹೊಂದಿದ್ದಾರೆ.
ಯೆಸ್, ಜಾನ್ ಅಬ್ರಹಾಂ ಹೀರೋ ಆಗಿ ನಟಿಸುತ್ತಿರುವ 'ರಾಕಿ ಹ್ಯಾಂಡ್‌ಸಮ್' ಹಿಂದಿ ಚಿತ್ರದಲ್ಲಿ ಇವರಿಗೆ ಪ್ರಮುಖ ಪಾತ್ರವಿದೆ. ಶ್ರುತಿ ಹಾಸನ್ ಇಲ್ಲಿ ನಾಯಕಿಯಾಗಿ ನಟಿಸುತ್ತಿರುವುದರಿಂದ ನತಾಲಿಯಾ ಪಾತ್ರದ ಬಗ್ಗೆ ಹೆಚ್ಚೇನೂ ಪ್ರಸ್ತಾಪವಾಗಿರಲಿಲ್ಲ. ಈ ಐಟಂ ಹುಡುಗಿ ಸನ್ನಿವೇಶವೊಂದರಲ್ಲಿ ಬಂದುಹೋಗಬಹುದಷ್ಟೆ ಎನ್ನಲಾಗಿತ್ತು. ಆದರೆ ಲೇಟೆಸ್ಟ್ ಮಾಹಿತಿಯನ್ವಯ ಪ್ರಮುಖ ಪಾತ್ರದಲ್ಲೇ ನತಾಲಿಯಾ ಅಭಿನಯಿಸುತ್ತಿದ್ದಾರೆ. ಇವರಿಗೆ ಏಳೆಂಟು ವರ್ಷದ ಹೆಣ್ಣಮಗುವಿನ ತಾಯಿಯ ಪಾತ್ರವಿದೆಯಂತೆ! 'ಚಿತ್ರದ ನಾಯಕಿಗೆ ಸರಿಸಮನಾದ ಪಾತ್ರವಿದು. ಖಂಡಿತವಾಗಿ ಈ ಚಿತ್ರ ನನ್ನ ಮುಂದಿನ ಸಿನಿಮಾ ಬದುಕಿಗೆ ದಿಕ್ಸೂಚಿಯಾಗಲಿದೆ' ಎನ್ನುವ ನತಾಲಿಯಾಗೆ ಐಟಂನಿಂದ ನಾಯಕಿಯಾಗಿ ಬಡ್ತಿ ಪಡೆದಿರುವ ಬಗ್ಗೆ ಖುಷಿಯಿದೆ.
ಮೊದಲು ಕುಣಿದದ್ದು ಕನ್ನಡ ಚಿತ್ರಕ್ಕೆ!
ಮಾಡೆಲಿಂಗ್ ಮೂಲದ ನತಾಲಿಯಾ ಮೊದಲ ಬಾರಿಗೆ ಕುಣಿದದ್ದು ಕನ್ನಡ ಚಿತ್ರಕ್ಕೆ. ಇಂದ್ರಜಿತ್ ಲಂಕೇಶ್ ನಿರ್ದೇಶನದಲ್ಲಿ ದಿಗಂತ್ ಅಭಿನಯಿಸಿದ್ದ 'ದೇವ್ ಸನ್ ಆಫ್ ಮುದ್ದೇಗೌಡ' ಚಿತ್ರದ ಐಟಂ ಹಾಡಿಗೆ ಹೆಜ್ಜೆ ಹಾಕಿದ್ದರು. ಈ ಚಿತ್ರದ ಬಿಡುಗಡೆಗೂ ಮುನ್ನ ರಾಮ್ ಗೋಪಾಲ್ ವರ್ಮಾರ 'ಡಿಪಾರ್ಟ್‌ಮೆಂಟ್' ಹಿಂದಿ ಚಿತ್ರದಲ್ಲಿ ಕುಣಿದಿದ್ದರು. ಈ ಹಾಡು ಅವರಿಗೆ ದೊಡ್ಡ ಯಶಸ್ಸು ತಂದುಕೊಟ್ಟಿತು. ನಾಗಾರ್ಜುನ ಅಭಿನಯದ 'ಭಾಯ್' ತೆಲುಗು ಚಿತ್ರದಲ್ಲೂ ಮಿಂಚಿದರು. ಇದೀಗ ಅವರು ಐಟಂ ಇಮೇಜ್‌ನಿಂದ ಕಳಚುವ ಹಾದಿಯಲ್ಲಿದ್ದಾರೆ. ನತಾಲಿಯಾ ಜನ್ಮನಾಮ ನತಾಲಿಯಾ ಪಿನ್ಹೇರೋ ಫಿಲಿಪ್ ಮಾರ್ಟಿನ್. ಬ್ರೆಜಿಲ್ ದೇಶದ ಪ್ರಜೆಯಾದ ಅವರ ತಂದೆ ಪಂಜಾಬಿ ಮೂಲದವರು. ತಾಯಿ ಪೋರ್ಚುಗೀಸ್. ಮಾಡೆಲಿಂಗ್‌ಗೆಂದು ಭಾರತಕ್ಕೆ ಬಂದಿಳಿದ ನತಾಲಿಯಾ ತಮ್ಮ ಹೆಸರಿನ ಮುಂದೆ ಪಂಜಾಬಿ ಸರ್‌ನೇಮ್ 'ಕೌರ್' ಸೇರಿಸಿಕೊಂಡು ದೇಸಿಯಾದರು. ಐಟಂನೊಂದಿಗೆ ಜನಪ್ರಿಯತೆ ಗಳಿಸಿದ ಬೆಡಗಿ ಇದೀಗ ನಟಿಯಾಗಿ ರೂಪುಗೊಳ್ಳುವ ಹಾದಿಯಲ್ಲಿದ್ದಾರೆ.
ಇವರೂ ನಾಯಕಿಯರಾದರು...
ಬ್ರೆಜಿಲ್ ಮಾಡೆಲ್ ಗೇಬ್ರಿಯಾಲಾ ಅವರನ್ನು ಟಾಲಿವುಡ್‌ಗೆ ಕರೆತಂದವರು ನಿರ್ದೇಶಕ ಪುರಿ ಜಗನ್ನಾಥ್. ಅವರ ನಿರ್ದೇಶನದಲ್ಲಿ ರವಿತೇಜಾ ನಟಿಸಿರುವ 'ದೇವುಡು ಚೇಸಿನಾ ಮನುಷುಲು' ಚಿತ್ರದ ಐಟಂನಲ್ಲಿ ಕುಣಿದಿದ್ದರು. ಇಲ್ಲಿನ ಯಶಸ್ಸು ಆಕೆಯನ್ನು ಅಜಿತ್‌ರ 'ಬಿಲ್ಲಾ 2'ನ ಐಟಂ ಹಾಡಿಗೆ ಕುಣಿಯುವ ಅವಕಾಶ ಕಲ್ಪಿಸಿತು. ಮುಂದೆ ಆಕೆ 'ಬಲ್ವಿಂದರ್ ಫೇಮಸ್ ಹೋಗಯಾ' ಹಿಂದಿ ಚಿತ್ರದೊಂದಿಗೆ ಹಿರೋಯಿನ್ ಆದರು. ಈ ವರ್ಷ ಆಕೆಯ ಮತ್ತೊಂದು ಬಾಲಿವುಡ್ ಸಿನಿಮಾ ತೆರೆಕಾಣುವ ಸೂಚನೆಯಿದೆ.
'ಆರ್ಯ 2' ತೆಲುಗು ಚಿತ್ರದ 'ರಿಂಗ ರಿಂಗ' ಐಟಂ ಹಾಡಿಗೆ ಕುಣಿದಿದ್ದ ಆ್ಯಡ್ರಿಯಾನಾ ದಿನಬೆಳಗಾಗುವುದರೊಳಗೆ ಮಿಂಚಿದ್ದರು. ಟಾಲಿವುಡ್ ಮೂಲಗಳ ಪ್ರಕಾರ ಸದ್ಯದಲ್ಲೇ ನಾಯಕಿಯಾಗಿ ಕಾಣಿಸಿಕೊಳ್ಳಲಿದ್ದಾರಂತೆ. 'ಏಜೆಂಟ್ ವಿನೋದ್', 'ರೌಡಿ ರಾಥೋಡ್' ಹಿಂದಿ ಸಿನಿಮಾಗಳು ಹಾಗೂ '100% ಲವ್' ತೆಲುಗು ಚಿತ್ರದ ಐಟಂಗೆ ಕುಣಿದಿದ್ದ ಮರ್ಯಮ್ ಝಕಾರಿಯಾಗೆ ಕೂಡ ನಾಯಕಿಯಾಗುವ ಅದೃಷ್ಟ ಒದಗಿಬಂದಿದೆ. ಪವನ್ ಕಲ್ಯಾಣ್ ಜತೆಗೆ 'ತೀನ್‌ಮಾರ್'ನಲ್ಲಿ ಕಾಣಿಸಿಕೊಂಡಿದ್ದ ಆಸ್ಟ್ರೇಲಿಯಾ ಮೂಲದ ಡಾನಾ ಮಾರ್ಕ್ಸ್, ಈ ಪಟ್ಟಿಗೆ ಸೇರಿಸಬಹುದಾದ ಮತ್ತೊಬ್ಬ ಚೆಲುವೆ.
ಐಟಂ ಡಾನ್ಸರ್ ನತಾಲಿಯಾ ಕೌರ್‌ಗೆ 'ರಾಕಿ ಹ್ಯಾಂಡ್‌ಸಮ್' ಹಿಂದಿ ಸಿನಿಮಾದಲ್ಲೊಂದು ಪ್ರಮುಖ ಪಾತ್ರವಿದೆ. ಐಟಂಗೆ ಕುಣಿಯಲು ಬಂದ ಬೆಡಗಿ ಹಿರೋಯಿನ್ ಆಗಿ ಬಡ್ತಿ ಹೊಂದಿದ್ದಾರೆ.