ಲಕ್ಷ ವೋಕ್ಸ್ ವ್ಯಾಗನ್ ಕಾರು ಹಿಂತೆಗೆತ ಸಂಭವ

ಹೊಸದಿಲ್ಲಿ: ಜರ್ಮನಿ ಮೂಲದ ಕಾರು ಉತ್ಪಾದಕ ವೋಕ್ಸ್‌ವ್ಯಾಗನ್ ಭಾರತದಲ್ಲಿ ತನ್ನ 1 ಲಕ್ಷ ಕಾರುಗಳನ್ನು ಹಿಂತೆಗೆದುಕೊಳ್ಳುವ ನಿರೀಕ್ಷೆ ಇದೆ. ಡೀಸೆಲ್ ಕಾರುಗಳ ಮಾಲಿನ್ಯ ತಪಾಸಣೆ ಪರೀಕ್ಷೆಯಲ್ಲಿ ವಂಚಿಸಿದ ಹಗರಣ ಎದುರಿಸುತ್ತಿರುವ ವೋಕ್ಸ್‌ವ್ಯಾಗನ್ ಆಗಿರುವ ತಪ್ಪನ್ನು ಸರಿಪಡಿಸಲು ಕ್ರಮ ತೆಗೆದುಕೊಳ್ಳುತ್ತಿದೆ. ಭಾರತದಲ್ಲಿ ನವೆಂಬರ್ 8ಕ್ಕೆ ಮೊದಲು ಹಿಂತೆಗೆತ ನಡೆಯುವ ಸಾಧ್ಯತೆ ಇದೆ. ಜಾಗತಿಕ ಮಟ್ಟದಲ್ಲಿ ಸುಮಾರು 1.1 ಕೋಟಿ ಕಾರುಗಳಲ್ಲಿ ಮಾಲಿನ್ಯ ತಪಾಸಣೆಯನ್ನು ದಿಕ್ಕುತಪ್ಪಿಸುವ ಸಾಫ್ಟ್‌ವೇರ್ ಅಳವಡಿಸಲಾಗಿದೆ ಎಂದು ಕಂಪನಿ ಒಪ್ಪಿಕೊಂಡಿತ್ತು. ಹಗರಣದ ಪರಿಣಾಮ ಕಳೆದ 15 ವರ್ಷಗಳಲ್ಲಿ ಮೊದಲ ಬಾರಿಗೆ ತ್ರೈಮಾಸಿಕ ಅವಧಿಯ ಫಲಿತಾಂಶದಲ್ಲಿ ನಷ್ಟ ದಾಖಲಿಸಿತ್ತು. ಭಾರತದಲ್ಲಿ ಆಮದು ಮಾಡಿರುವ ಕಾರುಗಳು ಹಾಗೂ ಇಲ್ಲಿ ತಯಾರಿಸಿರುವ 20 ಸಾವಿರ ಡೀಸೆಲ್ ಕಾರುಗಳನ್ನು ಕಂಪನಿ ಹಿಂತೆಗೆದುಕೊಂಡು ಸರಿಪಡಿಸುವ ಸಾಧ್ಯತೆ ಇದೆ.