ದೇಶದ ಪ್ರಮುಖ ಆಸ್ಪತ್ರೆಗಳ ಇತ್ತೀಚಿನ ಮಾಹಿತಿಯನ್ನು ಗಮನಿಸಿದರೂ, 2015ರಲ್ಲಿ ಮುಂಬಯಿಯೊಂದರಲ್ಲೇ ಸುಮಾರು 70,000 ರೋಬೋಟಿಕ್ ಸರ್ಜರಿಗಳಾಗಿವೆ. ಇದರಲ್ಲಿ ಹೆಚ್ಚಿನ ರೋಗಿಗಳು ವಿದೇಶಿಗರು. ದಿಲ್ಲಿಯಲ್ಲಿ ಸುಮಾರು 20,000 ಹಾಗೂ ಬೆಂಗಳೂರಿನಲ್ಲಿ 25,000ದಷ್ಟು ರೋಬೋಟಿಕ್ ಸರ್ಜರಿಗಳು ಕಳೆದ ವರ್ಷ ದಾಖಲಾಗಿವೆ.
''ಪ್ರತಿ ವಾರ ಕನಿಷ್ಠ ಇಬ್ಬರಾದರೂ ಹೊರದೇಶಗಳಿಂದ ಕರೆ ಮಾಡಿ ರೋಬೋಟಿಕ್ ಶಸ್ತ್ರಚಿಕಿತ್ಸೆಯ ಬಗ್ಗೆ ವಿಚಾರಿಸುತ್ತಾರೆ. ಕಳೆದ ಎರಡು ತಿಂಗಳಿನಲ್ಲಿ ವಿದೇಶಗಳ ಏಳು ರೋಗಿಗಳಿಗೆ ಪ್ರೋಸ್ಟ್ರೇಟ್ ಕ್ಯಾನ್ಸರ್‌ಗೆ ಶಸ್ತ್ರಚಿಕಿತ್ಸೆ ನಡೆಸಿದ್ದೇನೆ'' ಎನ್ನುತ್ತಾರೆ ಮುಂಬಯಿಯ ಸೈಫೀ ಆಸ್ಪತ್ರೆಯ ಡಾ. ಅನೂಪ್ ರಮಣಿ.
ಪ್ರಾಥಮಿಕ ಹಂತದಲ್ಲಿರುವ ಪ್ರೋಸ್ಟ್ರೇಟ್ ಕ್ಯಾನ್ಸರ್‌ಗೆ ರೋಬೋಟಿಕ್ ಸರ್ಜರಿ ಅತ್ಯುತ್ತಮ ಚಿಕಿತ್ಸೆ. 50 ವರ್ಷ ದಾಟಿದ ಪುರುಷರು ವರ್ಷಕ್ಕೊಮ್ಮೆ ಪಿಎಸ್‌ಎ ಪರೀಕ್ಷೆ ಮಾಡಿಸಬೇಕು ಎನ್ನುತ್ತಾರೆ ಅವರು.
ಮಧ್ಯಪೂರ್ವ ಹಾಗೂ ಆಫ್ರಿಕನ್ ದೇಶಗಳ ರೋಗಿಗಳು ರೋಬೋಟ್ ಅಸಿಸ್ಟೆಡ್ ಸರ್ಜರಿಗಳಿಗಾಗಿ ಸಾಮಾನ್ಯವಾಗಿ ಭಾರತವನ್ನು ಅರಸಿಕೊಂಡು ಬರುತ್ತಾರೆ. ಒಂದೇ, ಅವರ ದೇಶದಲ್ಲಿ ಆಧುನಿಕ ರೋಬೋಟಿಕ್ ಶಸ್ತ್ರಚಿಕಿತ್ಸೆ ವ್ಯವಸ್ಥೆಗಳಿರುವುದಿಲ್ಲ, ಇದ್ದರೂ ಬಲು ದುಬಾರಿಯಾಗಿರುವುದು ಅವರನ್ನು ಭಾರತದತ್ತ ಮುಖ ಮಾಡುವಂತೆ ಮಾಡಿದೆ.
ಸಾಮಾನ್ಯವಾಗಿ ಮಕ್ಕಳಿಗೆ ಈ ವಿಧಾನ ಬಳಸುವುದಿಲ್ಲ. ಮಕ್ಕಳ ಚಿಕ್ಕ ದೇಹದೊಳಗೆ ರೋಬೋಟ್‌ನ ದೊಡ್ಡ ಕೈಗಳು ತೂರಿದರೆ ಚಿಕಿತ್ಸೆ ನಡೆಸಲು ಜಾಗ ಸಾಲುವುದಿಲ್ಲ. ಆದರೆ, ಹೊಸದಿಲ್ಲಿಯ ಗಂಗಾರಾಮ್ ಆಸ್ಪತ್ರೆಯ ಡಾ.ವಿಪಿನ್ ತ್ಯಾಗಿ ಇತ್ತೀಚೆಗಷ್ಟೇ ವೆಸಿಕೋ ಯುರೆಟೆರಿಕ್ ರಿಫ್ಲೆಕ್ಸ್‌ನಿಂದ ಬಳಲುತ್ತಿದ್ದ ನಾಲ್ಕು ವರ್ಷದ ಬಾಲಕಿಗೆ ರೋಬೋಟಿಕ್ ಶಸ್ತ್ರಚಿಕಿತ್ಸೆ ನಡೆಸಿ ಯಶಸ್ವಿಯಾಗಿದ್ದಾರೆ . ಇದಕ್ಕಾಗಿ ಅವರು ರೋಬೋಟ್‌ನ ಕೈಗಳಿಗೆ ಕೆಲವೊಂದು ಮಾರ್ಪಾಡುಗಳನ್ನು ತಂದಿದ್ದರು.
''ಎಂಡೋಸ್ಕೋಪಿಯಿಂದ ದೇಹದೊಳಗನ್ನು ಅತ್ಯುತ್ತಮ 3ಡಿ ವಿಡಿಯೋದಲ್ಲಿ ನೋಡಬಹುದು. ಇದರಿಂದ ಸಣ್ಣ ಚಲನೆಯೂ ಸ್ಪಷ್ಟವಾಗಿ ಕಾಣುತ್ತದೆ. ರೋಬೋಟ್ ಶಸ್ತ್ರಚಿಕಿತ್ಸೆ ನಡೆಸುವಾಗ ವೈದ್ಯರೇ ತಮ್ಮ ಕೈಯ್ಯನ್ನು ರೋಗಿಯ ಹೊಟ್ಟೆಯೊಳಗೆ ಹಾಕಿದಂತಿರುತ್ತದೆ'' ಎನ್ನುತ್ತಾರೆ ಡಾ. ತ್ಯಾಗಿ.
ಎಲ್ಲ ಆಸ್ಪತ್ರೆಗೂ ಬೇಕು: ಬೈಪಾಸ್ ಶಸ್ತ್ರಚಿಕಿತ್ಸೆ, ಟ್ರಾನ್ಸ್‌ಪ್ಲ್ಯಾಂಟ್‌ಗಳು, ಕ್ಯಾನ್ಸರ್ ಚಿಕಿತ್ಸೆ ಹಾಗೂ ಹೆರಿಗೆ ವಿಧಾನಗಳಿಗೆ ರೋಬೋಟಿಕ್ ಸರ್ಜರಿ ಅತ್ಯುತ್ತಮ. ''ಕಡಿಮೆ ಸಮಯದಲ್ಲಿ ಆಗುವುದಲ್ಲದೆ, ಶಸ್ತ್ರಚಿಕಿತ್ಸೆ ಸಂದರ್ಭದಲ್ಲಿ ಯಾವುದೇ ತಪ್ಪುಗಳಾಗದಂತೆ ನೋಡಿಕೊಳ್ಳಬಹುದು. ಜೊತೆಗೆ ಸಾಮಾನ್ಯ ಶಸ್ತ್ರಚಿಕಿತ್ಸೆಗಿಂತ ಬಹಳ ದುಬಾರಿಯೇನಲ್ಲ. ಹೀಗಾಗಿ ಎಲ್ಲ ಆಸ್ಪತ್ರೆಗಳಲ್ಲಿ ರೋಬೋಟಿಕ್ ಸರ್ಜರಿ ಸೆಟಪ್ ಅಳವಡಿಸಬೇಕಿದೆ'' ಎನ್ನುವುದು ವೋಕ್‌ಹಾರ್ಟ್ ಆಸ್ಪತ್ರೆಯ ಕ್ಯಾನ್ಸರ್‌ತಜ್ಞ ಡಾ.ಮೇಘಲ್ ಸಾಂಘ್ವಿಯವರ ಅಭಿಮತ.
ಭಾರತವು ತಲೆ ಮತ್ತು ಕತ್ತು ಕ್ಯಾನ್ಸರ್ ಶಸ್ತ್ರಚಿಕಿತ್ಸೆಯನ್ನು ರೋಬೋಟಿಕ್ ವಿಧಾನದಿಂದ ನಡೆಸುವಂಥ ಬಹಳಷ್ಟು ಪ್ರತಿಭೆ ಹಾಗೂ ತಜ್ಞರನ್ನು ಹೊಂದಿದೆ ಎಂದು ಸ್ಟ್ಯಾನ್ಫೋರ್ಡ್ ಕ್ಯಾನ್ಸರ್ ಸೆಂಟರ್‌ನ ಮುಖ್ಯಸ್ಥ ಡಾ. ಕ್ರಿಸ್ ಹೋಲ್ಸಿಂಗರ್ ವಾರದ ಹಿಂದಷ್ಟೇ ಮೆಚ್ಚುಗೆ ವ್ಯಕ್ತಪಡಿಸಿದ್ದರು.
ತಲೆ ಮತ್ತು ಕತ್ತು ಕ್ಯಾನ್ಸರ್ ಶಸ್ತ್ರಚಿಕಿತ್ಸೆಯನ್ನು ರೋಬೋಟಿಕ್ ವಿಧಾನದ ಮೂಲಕ ಕೈಗೊಂಡರೆ ಬಾಯಿಯ ಮೂಲಕವೇ ಗಡ್ಡೆ ತೆಗೆದು ಹಾಕಬಹುದು. ಹೀಗಾಗಿ ನೋವು, ರಕ್ತನಷ್ಟ ಕಡಿಮೆ. ಜೊತೆಗೆ ಮುಖ ಇಲ್ಲವೇ ಕತ್ತಿನಲ್ಲಿ ಯಾವುದೇ ಕಲೆಯೂ ಉಳಿಯುವುದಿಲ್ಲ ಎಂಬುದು ಈ ವಿಧಾನದ ಹೆಗ್ಗಳಿಕೆ.
ಏನಿದು ರೋಬೋಟಿಕ್ ಸರ್ಜರಿ?
ಇಲ್ಲಿ ದೇಹದ ನಿಗದಿತ ಭಾಗವನ್ನು ಕತ್ತರಿಸಿ ಶಸ್ತ್ರಚಿಕಿತ್ಸೆ ಅಗತ್ಯವಿರುವ ಭಾಗವನ್ನು ಸ್ಪಷ್ಟವಾಗಿ ತೋರುವಂತೆ 3ಡಿ ಕ್ಯಾಮೆರಾ ಹೊಂದಿರುವ ತೆಳು ಟ್ಯೂಬನ್ನು(ಎಂಡೋಸ್ಕೋಪ್) ದೇಹದೊಳಗೆ ತೂರಿಸುತ್ತಾರೆ.
ಬಳಿಕ ವೈದ್ಯರು ಕುಳಿತಲ್ಲೇ ಕಂಪ್ಯೂಟರ್‌ನ ಮೂಲಕ ರೋಬೋಟನ್ನು ನಿಯಂತ್ರಿಸುತ್ತಾರೆ. ಚಿಕ್ಕ ಚಿಕ್ಕ ವೈದ್ಯಕೀಯ ಸಲಕರಣೆಗಳನ್ನು ಹಿಡಿದ ರೋಬೋಟ್‌ಗಳು ಶಸ್ತ್ರಚಿಕಿತ್ಸೆ ನಡೆಸುತ್ತವೆ. ವೈದ್ಯರ ಕೈ ಚಲನೆಯನ್ನು ರೋಬೋಟ್ ಅನುಕರಿಸುತ್ತದೆ.
ಹೊಸದಿಲ್ಲಿ: ದುಬಾರಿಯಲ್ಲದ ವೆಚ್ಚ, ಕಡಿಮೆ ನೋವು, ಬೇಗ ಗುಣಹೊಂದುವಿಕೆ ಹಾಗೂ ಹೆಚ್ಚುತ್ತಿರುವ ಅರಿವಿನಿಂದಾಗಿ ರೋಬೋಟಿಕ್ ಶಸ್ತ್ರಚಿಕಿತ್ಸೆಗೆ ಬೇಡಿಕೆ ಹೆಚ್ಚಿದೆ. ಅದರಲ್ಲೂ ಈ ವಿಧಾನದಲ್ಲಿ ಭಾರತದ ತಜ್ಞವೈದ್ಯರು ಜಾಗತಿಕವಾಗಿ ಹೆಸರು ಮಾಡುತ್ತಿದ್ದು, ರೋಬೋಟಿಕ್ ಶಸ್ತ್ರಚಿಕಿತ್ಸೆ ಯಲ್ಲಿ ನಂ.1 ಎನಿಸಿಕೊಳ್ಳುವತ್ತ ಭಾರತ ದಾಪುಗಾಲಿಡುತ್ತಿದೆ.