ಬೀಜಿಂಗ್‌: ವಿವಾದಿತ ದಕ್ಷಿಣ ಚೀನಾ ಸಮುದ್ರದ ಮೇಲಿನ ಹಿಡಿತ ಬಿಗಿಗೊಳಿಸಲು ಸಂಚು ಹೂಡಿರುವ ಚೀನಾ, ಎರಡನೇ ವಿಮಾನವಾಹಕ ಸಮರ ನೌಕೆಯನ್ನು ಈ ಭಾಗಕ್ಕೆ ರವಾನಿಸಲು ಸಿದ್ಧತೆ ನಡೆಸುತ್ತಿದೆ. ಡಾಲಿಯನ್‌ ಬಂದರಿನಲ್ಲಿ ವಿಮಾನವಾಹಕ ಸಮರನೌಕೆಯ ನಿರ್ಮಾಣ ಕಳೆದ ಎರಡೂವರೆ ವರ್ಷಗಳಿಂದ ನಡೆಯುತ್ತಿದೆ. ದಕ್ಷಿಣ ಚೀನಾ ಸಮುದ್ರದಲ್ಲಿ ಉದ್ವಿಗ್ನತೆ ಹೆಚ್ಚಿರುವ ಹಿನ್ನೆಲೆಯಲ್ಲಿ ಸಾಗರ ಪ್ರದೇಶದ ಭದ್ರತೆಯನ್ನು ಬಿಗಿಪಡಿಸಲು ಎರಡನೇ ಯುದ್ಧ ನಾವೆಯನ್ನೂ ರವಾನಿಸಲಾಗುವುದು. ಸಮರನಾವೆಯ ನಿರ್ಮಾಣ ಕಾರ‍್ಯವೀಗ ಒಂದು ನಿರ್ಣಾಯಕ ಹಂತಕ್ಕೆ ಬಂದಿದೆ ಎಂದು ಚೀನಾದ ಅಧಿಕೃತ ಸುದ್ದಿವಾಹಿನಿ ಶಾಂಡಂಗ್‌ ವರದಿ ಮಾಡಿದೆ. ತರಾತುರಿ ನಿರ್ಮಾಣ ಸಾಮಾನ್ಯವಾಗಿ ಯುದ್ಧನೌಕೆಗಳನ್ನು ಸಮಗ್ರವಾಗಿ ಮತ್ತು ಸುದೀರ್ಘ ಪರೀಕ್ಷೆಗೊಳಪಡಿಸದೇ ಸೇವೆಗೆ ನಿಯೋಜಿಸುವುದಿಲ್ಲ. ಆದರೆ, ಅಮೆರಿಕದ ವಿರುದ್ಧ ಜಿದ್ದಿಗೆ ಬಿದ್ದಿರುವ ಚೀನಾ ಎರಡನೇ ವಿಮಾನವಾಹಕ ಸಮರ ನೌಕೆಯನ್ನು ತರಾತುರಿಯಲ್ಲಿ ಸಿದ್ಧಪಡಿಸುತ್ತಿದೆ. ಪರೀಕ್ಷೆ ಮೊದಲೇ ಗಸ್ತಿಗೆ ನಿಯೋಜಿಸಲು ಉದ್ದೇಶಿಸಿದೆ ಎಂದು ಮೂಲಗಳು ತಿಳಿಸಿವೆ. ಮೊದಲ ಸಮರ ನೌಕೆ ಈಗಾಗಲೇ ದಕ್ಷಿಣ ಚೀನಾ ಸಮುದ್ರ ಪ್ರವೇಶ ಪ್ರವೇಶಿಸಿ ಅಲ್ಲಿಂದ ಜಪಾನ್‌ ಮತ್ತು ದಕ್ಷಿಣ ಕೊರಿಯಾ ಕೊಲ್ಲಿಯತ್ತ ಪಯಣ ಮುಂದುವರಿಸಿದೆ. ಬಲ್ಲ ಮೂಲಗಳ ಪ್ರಕಾರ ಎರಡನೇ ಸಮರನೌಕೆಯನ್ನು ವಿವಾದಿತ ಪ್ರದೇಶದಲ್ಲೇ ಶಾಶ್ವತವಾಗಿ ನಿಯೋಜಿಸುವ ಸಾಧ್ಯತೆ ಇದೆ. ಮೂರನೇ ವಿಮಾನವಾಹಕ ಸಮರನೌಕೆ ಎರಡು ವಿಮಾನವಾಹಕ ಸಮರ ನೌಕೆಗಳನ್ನು ಪೂರ್ಣಗೊಳಿಸಿರುವ ಚೀನಾ ಈಗ ಮೂರನೇ ವಿಮಾನ ವಾಹಕ ಸಮರನೌಕೆ ನಿರ್ಮಾಣ ಕಾರ‍್ಯದಲ್ಲಿ ಮಗ್ನವಾಗಿದೆ. ಭೂಸೇನೆ ಮತ್ತು ವಾಯುಪಡೆಯನ್ನು ಸಾಕಷ್ಟು ಪ್ರಮಾಣದಲ್ಲಿ ಆಧುನೀಕರಿಸಿರುವ ಚೀನಾ, ನೌಕಾಪಡೆಯ ಸಾಮರ್ಥ್ಯ‌ದಲ್ಲೂ ದೊಡ್ಡಣ ಅಮೆರಿಕವನ್ನು ಮೀರಿಸುವ ಇರಾದೆ ಹೊಂದಿದೆ.
↧
ವಿವಾದಿತ ಸಮುದ್ರದ ಮೇಲೆ ಹಿಡಿತಕ್ಕೆ ಚೀನಾ ಯತ್ನ
↧