ಕರಾಚಿ: ಭಾರತ-ಪಾಕಿಸ್ತಾನ ನಡುವೆ ಹೆಚ್ಚುತ್ತಿರುವ ಉದ್ವಿಗ್ನತೆಯ ನಡುವೆ ಉಭಯ ರಾಷ್ಟ್ರಗಳ ಸೌಹಾರ್ದಯುತ ಒಪ್ಪಂದದ ಸಂಕೇತವಾಗಿ ಪಾಕಿಸ್ತಾನ ಗುರುವಾರ 219 ಭಾರತೀಯ ಮೀನುಗಾರರನ್ನು ಬಿಡುಗಡೆ ಮಾಡಿದೆ. ಇದರೊಂದಿಗೆ ಕಳೆದ 10 ದಿನಗಳಲ್ಲಿ ಒಟ್ಟು 439 ಮೀನುಗಾರರನ್ನು ಬಿಡುಗಡೆ ಮಾಡಿದಂತಾಗಿದೆ. ಜಲಗಡಿ ಉಲ್ಲಂಘಿಸಿದ ಆರೋಪದಲ್ಲಿ ಪಾಕಿಸ್ತಾನ ಭಾರತೀಯ ಮೀನುಗಾರರನ್ನು ನಾನಾ ಕಾರಾಗೃಹಗಳಲ್ಲಿ ಬಂಧಿಸಿತ್ತು. ಪಾಕಿಸ್ತಾನ ಒಳಾಡಳಿತ ಸಚಿವಾಲಯದ ಸೂಚನೆಯ ಮೇರೆಗೆ ಮಲಿರ್‌ ಜೈಲಿನಲ್ಲಿದ್ದ 219 ಭಾರತೀಯ ಮೀನುಗಾರರನ್ನು ಬಿಡುಗಡೆ ಮಾಡಲಾಗಿದೆ ಎಂದು ಕಾರಾಗೃಹ ಅಧೀಕ್ಷಕ ಹಸನ್‌ ಸೆಹತೊ ತಿಳಿಸಿದ್ದಾರೆ. ಪಾಕಿಸ್ತಾನ ಸರಕಾರ ಡಿಸೆಂಬರ್‌ 25ರಂದು ಭಾರತದ 220 ಮೀನುಗಾರರನ್ನು ಬಿಡುಗಡೆ ಮಾಡಿತ್ತು. ಬಿಡುಗಡೆಯಾಗಿರುವ ಮೀನುಗಾರರನ್ನು ವಾಘಾ ಗಡಿಯಲ್ಲಿ ಭಾರತದ ಅಧಿಕಾರಿಗಳಿಗೆ ಹಸ್ತಾಂತರಿಸಲಾಗುತ್ತದೆ. ಕರಾಚಿಯ ಲಂಧಿ ಕಾರಾಗೃಹದಲ್ಲಿ ಇನ್ನೂ 110 ಭಾರತೀಯ ಮೀನುಗಾರರು ಬಂಧಿತರಾಗಿದ್ದಾರೆ ಎಂದು ಸೆಹತೊ ತಿಳಿಸಿದ್ದಾರೆ.
↧
ಪಾಕ್‌ನಿಂದ 219 ಮೀನುಗಾರರ ಬಿಡುಗಡೆ
↧