ಪದವಿ ಮತ್ತು ಸರ್ಟಿಫಿಕೇಟ್‌ಗಳನ್ನು ಡಿಜಿಟಲ್‌ ಮಾದರಿಯಲ್ಲಿ ವಿದ್ಯಾರ್ಥಿಗಳಿಗೆ ನೀಡಲು ಕೇಂದ್ರ ಮಾನವ ಸಂಪನ್ಮೂಲ ಸಚಿವಾಲಯ ಚಿಂತನೆ ನಡೆಸಿದೆ. 2017ರ ಬಳಿಕ ಈ ಯೋಜನೆ ಜಾರಿಗೆ ಬರಲಿದೆ ಎಂದು ಸಚಿವ ಪ್ರಕಾಶ್‌ ಜಾವೇಡ್ಕರ್‌ ಹೇಳಿದ್ದಾರೆ. 'ಪ್ರತಿ ವಿದ್ಯಾರ್ಥಿ ಸೂಕ್ತ ಖಾತರಿಯ ಬಳಿಕ ಪ್ರತಿಯೊಬ್ಬ ವಿದ್ಯಾರ್ಥಿಯೂ ತನ್ನ ಪದವಿಯ ಪ್ರಮಾಣ ಪತ್ರವನ್ನು ಅಪ್‌ಲೋಡ್‌ ಮಾಡಲು ಅವಕಾಶ ನೀಡಲಾಗುತ್ತದೆ. ಈ ಮೂಲಕ ಒಂದು ಕ್ಲಿಕ್‌ ಮೂಲಕ ಅವರ ಸಂಪೂರ್ಣ ಶೈಕ್ಷಣಿಕ ವಿವರ ಸಿಗುವಂತೆ ಮಾಡುವ ಉದ್ದೇಶವನ್ನು ಸಚಿವಾಲಯ ಹೊಂದಿದೆ' ಎಂದು ಜಾವೇಡ್ಕರ್‌ ತಿಳಿಸಿದರು. ಡಿಜಿಟಲ್‌ ಇಂಡಿಯಾ ಆಂದೋಲನದ ಅಡಿಯಲ್ಲಿ ಈ ಕ್ರಮ ಕೈಗೊಳ್ಳಲಾಗುತ್ತಿದೆ. ಇದಕ್ಕಾಗಿ ಎಲ್ಲಾ ಶೈಕ್ಷಣಿಕ ದಾಖಲೆಗಳನ್ನು ಡಿಜಿಟಲೀಕರಣ ಮಾಡಲು ಅವಶ್ಯಕವಾದ ವರ್ಚುವಲ್‌ ಡೇಟಾಬೇಸ್‌ ಸ್ಥಾಪಿಸಲಾಗುತ್ತದೆ. ಇದರಿಂದ ನಕಲಿ ಡಿಗ್ರಿ, ಅಂಕ ಪಟ್ಟಿ ಅವ್ಯವಹಾರಕ್ಕೆ ತಡೆಯೊಡ್ಡಲು ಸಾಧ್ಯವಾಗಲಿದೆ. ಇನ್ನು ಉದ್ಯೋಗದಾತರಿಗೆ ಕೂಡ ಇಂತಹ ಡಿಜಿಟಲ್‌ ಡೇಟಾಬೇಸ್‌ ತುಂಬಾ ಅನುಕೂಲಕರವಾಗಲಿದೆ. ವಿಶ್ವವಿದ್ಯಾಲಯ ಅಥವಾ ಶಿಕ್ಷಣ ಸಂಸ್ಥೆಗಳಿಗೆ ವೈಯಕ್ತಿಕವಾಗಿ ಭೇಟಿ ನೀಡುವ ಬದಲಾಗಿ ಆನ್‌ಲೈನ್‌ನಲ್ಲೇ ಅರ್ಹ ಅಭ್ಯರ್ಥಿಗಳನ್ನು ಕಂಡು ಹಿಡಿಯಲು ಸಾಧ್ಯವಾಗಲಿದೆ ಎಂದವರು ವಿವರಿಸಿದರು.
↧
ಶೀಘ್ರ ಡಿಜಿಟಲ್‌ ಸರ್ಟಿಫಿಕೇಟ್‌
↧