ತ್ಯಾಜ್ಯ ಆಹಾರ ತಿಂದು ಹಸು ಸಾವು

ಶಿರಸಿ:ಯಾರೋ ಬೇಕಾಬಿಟ್ಟಿಯಾಗಿ ಬೀಸಾಕಿ ಹೋಗಿದ್ದ ತ್ಯಾಜ್ಯ ಆಹಾರವನ್ನು ತಿಂದು ಒಂದು ಹಸು ಮೃತಪಟ್ಟು ನಾಲ್ಕು ಹಸುಗಳು ಅಸ್ವಸ್ಥಗೊಂಡ ಘಟನೆ ನಗರದ ಬಳಿಯ ಸುಬ್ರಾಯಕೊಡ್ಲಿಯಲ್ಲಿ ಮಂಗಳವಾರ ನಡೆದಿದೆ.

ಹೆಚ್ಚಾಗಿ ಉಳಿದ ತ್ಯಾಜ್ಯ ಆಹಾರವನ್ನು ಸೋಮವಾರ ರಸ್ತೆಯಂಚಿನಲ್ಲಿ ಯಾರೋ ಎಸೆದಿದ್ದರು. ಎಂದಿನಂತೆ ಮೇವಿಗೆ ತೆರಳಿದ್ದ ಮೂಕ ಪ್ರಾಣಿಗಳು ಅವುಗಳನ್ನು ತಿಂದಿವೆ. ಇದನ್ನು ಅರಗಿಸಿಕೊಳ್ಳಲಾಗದೇ ಸ್ಥಳೀಯ ಸುಬ್ರಾಯಕೊಡ್ಲಿನ ಕೃಷ್ಣ ಶಿವು ಭಟ್ಟ ಎನ್ನುವವರಿಗೆ ಸೇರಿದ ಹಸು ಮೃತಪಟ್ಟಿದೆ. ಇದೇ ರೀತಿಯಲ್ಲಿ ಪರಮೇಶ್ವರ ರಾಮನಾಥ ಭಟ್‌ ಮತ್ತಿತರರಿಗೆ ಸೇರಿದ ನಾಲ್ಕು ಹಸುಗಳು ಅಸ್ವಸ್ಥಗೊಂಡಿದೆ. ವಿಷಯ ತಿಳಿದ ಪಶು ಇಲಾಖೆ ಸಹಾಯಕ ನಿರ್ದೇಶಕ ಡಾ.ನರಸಿಂಹ ಮಾರ್ಕಂಡೆ ಅವರು ಅಸ್ವಸ್ಥಗೊಂಡ ಹಸುಗಳಿಗೆ ಚಿಕಿತ್ಸೆ ನೀಡಿದ್ದಾರೆ. ಮನುಷ್ಯ ತಿನ್ನುವ ಆಹಾರ ಜೀರ್ಣೀಸಿಕೊಳ್ಳುವ ಶಕ್ತಿ ಹಸುಗಳಿಗೆ ಇರುವುದಿಲ್ಲ. ಅಗತ್ಯಕ್ಕಿಂತ ಹೆಚ್ಚಿಗೆ ತಿಂದಲ್ಲಿ ಅವುಗಳ ಆರೋಗ್ಯ ಹೀಗೆ ಹದಗೆಡುವ ಸಾಧ್ಯತೆ ಇರುತ್ತದೆ ಎಂದು ಅವರು ಅಭಿಪ್ರಾಯಪಟ್ಟರು.

ಯಾರೋ ರಾತ್ರಿಯ ಸಂದರ್ಭದಲ್ಲಿ ನಗರಕ್ಕೆ ಹೊಂದಿಕೊಂಡಿರುವ ಸುಬ್ರಾಯಕೊಡ್ಲು ಮತ್ತು ದೇವನಿಲಯ ಪ್ರದೇಶದಲ್ಲಿ ಉಳಿದ ಆಹಾರವನ್ನು ತಂದು ಎಸೆದುಹೋಗುತ್ತಿರುವುದು ಇಂಥ ಅವಘಡಗಳಿಗೆ ಕಾರಣವಾಗುತ್ತಿದೆ. ಈ ಬಗ್ಗೆ ನಿಗಾ ವಹಿಸಬೇಕು ಎಂದು ಸ್ಥಳೀಯರು ಆಗ್ರಹಿಸಿದ್ದಾರೆ.