ಐಬಿಎಸ್‌ಎಫ್‌ ವಿಶ್ವ ಬಿಲಿಯರ್ಡ್ಸ್ ಚಾಂಪಿಯನ್‌ಷಿಪ್‌ | ಹಾಲಿ ಚಾಂಪಿಯನ್‌ ಪಂಕಜ್‌ ಶುಭಾರಂಭ ಬೆಂಗಳೂರು: ಸ್ಥಿರ ಪ್ರದರ್ಶನ ನೀಡಿದ ಭಾರತದ ಸಿದ್ಧಾರ್ಥ್‌ ಪಾರಿಖ್‌, ಐಬಿಎಸ್‌ಎಫ್‌ ವಿಶ್ವ ಬಿಲಿಯರ್ಡ್ಸ್ ಚಾಂಪಿಯನ್‌ಷಿಪ್‌ನ 500 ಲಾಂಗ್‌ಅಪ್‌ ಮಾದರಿಯಲ್ಲಿ ಹಲವು ಬಾರಿ ವಿಶ್ವ ಚಾಂಪಿಯನ್‌ ಪಟ್ಟ ಗೆದ್ದಿರುವ ಪೀಟರ್‌ ಗಿಲ್‌ಕ್ರಿಸ್ಟ್‌ಗೆ ಆಘಾತ ನೀಡಿ ಟೂರ್ನಿಯಲ್ಲಿ ಶುಭಾರಂಭ ಮಾಡಿದ್ದಾರೆ. ಇಲ್ಲಿನ ಕೆಎಸ್‌ಬಿಎಯಲ್ಲಿ ನಡೆಯುತ್ತಿರುವ ಟೂರ್ನಿಯಲ್ಲಿ ಸಿದ್ಧಾರ್ಥ್‌ 17 ಅಂಕಗಳ ಅಂತರದಿಂದ ಕಳೆದ ಬಾರಿಯ ರನ್ನರ್‌ಅಪ್‌ ಗಿಲ್‌ಕ್ರಿಸ್ಟ್‌ಗೆ ಅಚ್ಚರಿಯ ಸೋಲುಣಿಸಿದರು. ಟೂರ್ನಿಯಲ್ಲಿ ಮೊದಲ ಶತಕ ಬಾರಿಸಿದ ಸಿದ್ಧಾರ್ಥ್‌ 500-483 ಅಂಕಗಳ ಅಂತರದಿಂದ ಪೀಟರ್‌ ಸವಾಲನ್ನು ಹತ್ತಿಕ್ಕಿದರು. ಮತ್ತೊಂದು ಪಂದ್ಯದಲ್ಲಿ ಹಾಲಿ ಚಾಂಪಿಯನ್‌ ಹಾಗೂ ಟೂರ್ನಿಯ ಫೇವರಿಟ್‌ ಎನಿಸಿರುವ ಪಂಕಜ್‌ ಆಡ್ವಾಣಿ 390 ಪಾಯಿಂಟ್‌ಗಳಿಂದ ಎಸ್‌.ಶಂಕರ್‌ ರಾವ್‌ ಅವರನ್ನು ಸೋಲಿಸಿ ಪ್ರಶಸ್ತಿ ಉಳಿಸಿಕೊಳ್ಳುವತ್ತ ಮೊದಲ ಹೆಜ್ಜೆಯಿಟ್ಟರು. ಒಂದೇ ಫ್ರೇಮ್‌ನಲ್ಲಿ 208 ಅಂಕ ಕಲೆಹಾಕಿದ ಬೆಂಗಳೂರಿನ ಪಂಕಜ್‌, ಸ್ನೂಕರ್‌ನಿಂದ ನಿಧಾನವಾಗಿ ಬಿಲಿಯರ್ಡ್ಸ್ನತ್ತ ವಾಲಿದರು. ಭಾಸ್ಕರ್‌ಗೆ ಸೋಲು ದಿನದ ಇನ್ನೊಂದು ಪಂದ್ಯದಲ್ಲಿ ಇಂಗ್ಲೆಂಡ್‌ನ ರಾಬರ್ಟ್‌ ಹಾಲ್‌ 500-287 ಅಂಕಗಳ ಅಂತರದಲ್ಲಿ ಭಾರತದ ಬಿ.ಭಾಸ್ಕರ್‌ ವಿರುದ್ಧ ಸುಲಭವಾಗಿ ಗೆದ್ದು ಮುನ್ನಡೆದರು. ಅದರಲ್ಲೂ ಸತತ ಎರಡು ಶತಕ ಗಳಿಸಿ, ಆತಿಥೇಯ ಆಟಗಾರನ ಮೇಲೆ ಒತ್ತಡ ಹೇರಿದರು. ಹಾಲ್‌ ಶತಕಗಳಿಸುವ ಮುನ್ನ ಭಾಸ್ಕರ್‌ ಮುನ್ನಡೆ ಕಾಯ್ದುಕೊಂಡಿದ್ದರು. ಆದರೆ ತಿರುಗೇಟು ನೀಡಿದ ಇಂಗ್ಲೆಂಡ್‌ ಆಟಗಾರ ಸ್ಥಿರತೆ ಕಾಯ್ದುಕೊಳ್ಳುವ ಮೂಲಕ ಸತತವಾಗಿ 116 ಮತ್ತು 113 ಅಂಕ ಗಿಟ್ಟಿಸಿದರು. ಈ ಮಧ್ಯೆಭಾರತದ ರಾಷ್ಟ್ರೀಯ ಚಾಂಪಿಯನ್‌ ಸೌರವ್‌ ಕೊಠಾರಿ 502-364 ಅಂಕಗಳಿಂದ ಮ್ಯಾನ್ಮಾರ್‌ನ ಅವುಂಗ್‌ ಹಟಾಯ್‌ ವಿರುದ್ಧ ಭರ್ಜರಿ ಜಯ ದಾಖಲಿಸಿದರು. ನೇರ ಪ್ರಸಾರ ಉತ್ತಮ ಬೆಳವಣಿಗೆ: ಪಂಕಜ್‌ ವಿಶ್ವ ಬಿಲಿಯರ್ಡ್ಸ್ ಚಾಂಪಿಯನ್‌ಷಿಪ್‌ ಆನ್‌ಲೈನ್‌ನಲ್ಲಿ ಪ್ರಸಾರವಾಗುತ್ತಿರುವುದಕ್ಕೆ ಭಾರತದ ಅಗ್ರಮಾನ್ಯ ಸ್ನೂಕರ್‌ ಮತ್ತು ಬಿಲಿಯರ್ಡ್ಸ್ ಪಟು ಪಂಕಜ್‌ ಆಡ್ವಾಣಿ ಮೆಚ್ಚುಗೆ ವ್ಯಕ್ತಪಡಿಸಿದ್ದು, ಇದೊಂದು ಉತ್ತಮ ಬೆಳವಣಿಗೆ ಎಂದಿದ್ದಾರೆ. ''ನೇರ ಪ್ರಸಾರದಿಂದ ದೇಶಾದ್ಯಂತ ಇರುವ ಲಕ್ಷ ಕ್ಕೂ ಅಧಿಕ ಬಿಲಿಯರ್ಡ್ಸ್ ಅಭಿಮಾನಿಗಳಿಗೆ ಇದು ತಲುಪಲಿದೆ. ಅಗ್ರಮಾನ್ಯ ಆಟಗಾರರ ಆಟವನ್ನು ನೋಡುವುದರಿಂದ ಕಲಿಗೆ ಅತ್ಯುತ್ತಮ ದಾರಿಯಾಗಲಿದೆ. ನೇರ ಪ್ರಸಾರ ಖಂಡಿತವಾಗಿಯೂ ಕ್ರೀಡೆಯನ್ನು ಉತ್ತೇಜಿಸುವುದಲ್ಲದೆ ಯುವ ಆಟಗಾರರ ಪ್ರೋತ್ಸಾಹಕ್ಕೆ ಸಹಕಾರಿಯಾಗಲಿದೆ,'' ಎಂದು 15 ಬಾರಿ ವಿಶ್ವ ಕಿರೀಟ ಜಯಿಸಿರುವ ಪಂಕಜ್‌ ತಿಳಿಸಿದ್ದಾರೆ.
↧
ಗಿಲ್‌ಕ್ರಿಸ್ಟ್‌ಗೆ ಆಘಾತ ನೀಡಿದ ಭಾರತದ ಪಾರಿಖ್‌
↧