ಡಿವೊಸ್ಟಾಕ್‌ (ರಷ್ಯಾ) ರಷ್ಯಾ ಓಪನ್‌ ಗ್ರ್ಯಾನ್‌ ಪ್ರಿ ಬ್ಯಾಡ್ಮಿಂಟನ್‌ ಚಾಂಪಿಯನ್‌ಷಿಪ್‌ನ ಸೆಮಿಫೈನಲ್‌ ಪಂದ್ಯದಲ್ಲಿ ಜಯ ಗಳಿಸಿದ ಭಾರತದ ಹೃತ್ವಿಕಾ ಶಿವಾನಿ ಹಾಗೂ ಸಿರಿಲ್‌ ವರ್ಮಾ ಫೈನಲ್‌ಗೆ ಲಗ್ಗೆ ಇಟ್ಟಿದ್ದಾರೆ. ನಾಲ್ಕನೇ ಶ್ರೇಯಾಂಕಿತೆ ಹೃತ್ವಿಕಾ ಸ್ಥಳೀಯ ಆಟಗಾರ್ತಿ ಕ್ಸೇನಿಯಾ ಪೊಲಿಕಾರ್ಪೊವಾ ವಿರುದ್ಧ 22-20, 21-13 ಅಂತರದಲ್ಲಿ ಜಯ ಗಳಿಸಿದರು. ಎಸ್‌ಎಎಫ್‌ ಗೇಮ್ಸ್‌ನಲ್ಲಿ ಚಿನ್ನ ಗೆದ್ದಿರುವ ಹೃತ್ವಿಕಾ, ಫೈನಲ್‌ ಪಂದ್ಯದಲ್ಲಿ ರಷ್ಯಾದವರೇ ಆದ ಎವೆಗ್ನಿಯಾ ಕೊಸೆತ್ಸಾಯಾ ವಿರುದ್ಧ ಸೆಣಸಲಿದ್ದಾರೆ. ಸೆಮಿಫೈನಲ್‌ ಪಂದ್ಯದಲ್ಲಿ ಕೊಸೆತ್ಸಾಯಾ ರಷ್ಯಾದವರೇ ಆದ ನತಾಲಿಯಾ ಪೆರ್ಮಿನೋವಾ ವಿರುದ್ಧ 19-21, 21-16, 21-8 ಅಂತರದಲ್ಲಿ ಜಯ ಗಳಿಸಿದರು. ಪುರುಷರ ಸಿಂಗಲ್ಸ್‌ನಲ್ಲಿ ಸಿರಿಲ್‌ ವರ್ಮಾ ರಷ್ಯಾದ ಅನಾಟೊಲಿ ಯಾರ್ಸೆವ್‌ ವಿರುದ್ಧ 32 ನಿಮಿಷಗಳ ಹೋರಾಟದಲ್ಲಿ ಜಯ ಗಳಿಸಿ ಫೈನಲ್‌ ಪ್ರವೇಶಿಸಿದರು. ಮಿಶ್ರ ಡಬಲ್ಸ್‌ನಲ್ಲಿ ಎನ್‌.ನಿಕ್ಕಿ ರೆಡ್ಡಿ ಹಾಗೂ ಜೆರ್ರಿ ಚೋಪ್ರಾ ಜೋಡಿ 21-11, 21-17 ಅಂತರದಲ್ಲಿ ಅನಾಟೋಲಿ ಯಾರ್ಸೆವ್‌ ಹಾಗೂ ಎವೆಗ್ನಿಯಾ ಕೊಸೆಸ್ಕಾಯಾ ವಿರುದ್ಧ ಜಯ ಗಳಿಸಿ ಫೈನಲ್‌ ಪ್ರವೇಶಿಸಿದರು.
↧
ಬ್ಯಾಡ್ಮಿಂಟನ್‌: ಹೃತ್ವಿಕಾ, ಸಿರಿಲ್‌ ಫೈನಲ್‌ಗೆ
↧