ತಮಿಳರ ಅಮ್ಮನಿಂದ ಚಿನ್ನ ವಿತರಣೆ

ಚೆನೈ: ತಮಿಳುನಾಡು ಮುಖ್ಯಮಂತ್ರಿ ಜಯಲಲಿತ ಮತ್ತೊಂದು ಜನಪ್ರಿಯ ಯೋಜನೆಗೆ ಚಾಲನೆ ನೀಡಿದ್ದಾರೆ. ಹೆಣ್ಣು ಮಕ್ಕಳ ಶಿಕ್ಷಣವನ್ನು ಉತ್ತೇಜಿಸುವ ದೃಷ್ಟಿಯಿಂದ ಜಯಾ ಸರಕಾರ 'ಮದುವೆ ಸಹಾಯ ಯೋಜನೆ' ಚಾಲ್ತಿಗೆ ತಂದಿದ್ದು, ಇದರ ಅನ್ವಯ ಪದವಿ ಕಲಿತ ಹೆಣ್ಣು ಮಕ್ಕಳಿಗೆ 8 ಗ್ರಾಂ ಚಿನ್ನದ ನಾಣ್ಯ ಮತ್ತು 50 ಸಾವಿರ ರೂ.ಗಳ ಧನ ಸಹಾಯ ಮಾಡಲಾಗುತ್ತಿದೆ. ತಮ್ಮ ಕ್ಷೇತ್ರ ರಾಧಾಕೃಷ್ಣ ನಗರದಲ್ಲಿ ಐದು ಹೆಣ್ಣು ಮಕ್ಕಳಿಗೆ ತಲಾ 8 ಗ್ರಾಂ ಚಿನ್ನದ ನಾಣ್ಯ ವಿತರಿಸುವ ಮೂಲಕ ಯೋಜನೆಗೆ ಸಾಂಕೇತಿಕ ಚಾಲನೆ ನೀಡಿದರು. ಮುಂದಿನ ದಿನಗಳಲ್ಲಿ 12,500 ಫಲಾನುಭವಿಗಳು ಈ ಯೋಜನೆಯ ಲಾಭ ಪಡೆಯಲಿದ್ದಾರೆ.

ಈ ಯೋಜನೆಗಾಗಿ ಸರಕಾರ 204 ಕೋಟಿ ವ್ಯಯಿಸುತ್ತಿದ್ದು, ಮೇ 23 ರ ನಂತರ ನೋಂದಣಿ ಮಾಡಿಕೊಂಡ ಒಟ್ಟು 12,500 ಫಲಾನುಭವಿಗಳಿಗೆ ನಾಣ್ಯವನ್ನು ವಿತರಿಸಲಾಗುವುದು. ಅದಕ್ಕೂ ಮೊದಲು ನೋಂದಣಿಯಾದ 1.4 ಲಕ್ಷ ಫಲಾನುಭವಿಗಳಿಗೆ 4 ಗ್ರಾಂ ತೂಕದ ನಾಣ್ಯವನ್ನು ವಿತರಿಸಲಾಗಿತ್ತು ಎಂದು ತಿಳಿದುಬಂದಿದೆ.

2011 ರಿಂದ ಎಐಡಿಎಂಕೆ ಸರಕಾರ ಹತ್ತನೆ ತರಗತಿಯ ವರೆಗೆ ಓದಿದ ಹೆಣ್ಣು ಮಕ್ಕಳ ಮದುವೆಗೆ 25,000 ಸಹಾಯಧನ ಮತ್ತು 4 ಗ್ರಾಂ ಚಿನ್ನದ ನಾಣ್ಯ ಹಾಗೂ ಪದವಿ ಮತ್ತು ಡಿಪ್ಲೋಮಾ ಓದಿದವರಿಗೆ 50,000 ಹಣ ಮತ್ತು ಚಿನ್ನದ ನಾಣ್ಯವನ್ನು ನೀಡುತ್ತಿತ್ತು. ಕಳೆದ ಮೇನಲ್ಲಿ ಸತತ ಎರಡನೇ ಬಾರಿಗೆ ಅಧಿಕಾರಕ್ಕೆ ಬಂದ ಜಯಲಲಿತ ಕೊಟ್ಟ ಆಶ್ವಾಸನೆಯಂತೆ ನಾಣ್ಯದ ತೂಕವನ್ನು 8 ಗ್ರಾಂಗೆ ಏರಿಸಿದ್ದಾರೆ ಸಹಾಯಧನದ ಮೊತ್ತ ಹಾಗೆ ಮುಂದುವರೆದಿದೆ.