ಭಾರತ-ಪಾಕ್‌ ವ್ಯೂಹ ಸಮರ

ಹೊಸದಿಲ್ಲಿ/ನ್ಯೂಯಾರ್ಕ್‌: ಉರಿ ಸೇನಾ ನೆಲೆಗಳ ಮೇಲಿನ ದಾಳಿಯ ಬಳಿಕ ಭಾರತ-ಪಾಕಿಸ್ತಾನ ಮಧ್ಯೆ ನಡುವೆ ಭುಗಿಲೆದ್ದಿರುವ 'ಸಮರ ಸ್ಥಿತಿ' ರಾಷ್ಟ್ರಾಂತರಗಳಿಗೆ ವಿಸ್ತರಿಸಿದೆ. ಭಾರತವು ಪಾಕನ್ನು 'ಭಯೋತ್ಪಾದಕ ರಾಷ್ಟ್ರ' ಎಂದು ವಿಶ್ವಸಂಸ್ಥೆಯಲ್ಲೇ ತರಾಟೆಗೆ ತೆಗೆದುಕೊಂಡಿದ್ದಲ್ಲದೆ ಅದರ ಸುತ್ತ ಚಕ್ರವ್ಯೂಹ ಬಲಿಯಲು ಸಜ್ಜಾಗಿದೆ. ಇತ್ತ ಪಾಕಿಸ್ತಾನವೂ ಚೀನಾದ ಬೆಂಬಲ ಪಡೆದು ಸಮರಕ್ಕೇ ಸಿದ್ಧವಾಗುವಂತೆ ಕಾಣುತ್ತಿದೆ.

ಭಯೋತ್ಪಾದಕ ಪಾಕ್‌

ಪಾಕಿಸ್ತಾನ ಜಗತ್ತಿನ ಅತಿ ದೊಡ್ಡ ಭಯೋತ್ಪಾದಕ ರಾಷ್ಟ್ರ ಎಂದು ಭಾರತ ಗುರುವಾರ ವಿಶ್ವಸಂಸ್ಥೆಯಲ್ಲೇ ತನ್ನ ಆಕ್ರೋಶ ಹೊರಗೆಡವಿದೆ. ಪಾಕ್‌ ಪ್ರಧಾನಿ ನವಾಜ್‌ ಶರೀಫ್‌ ಅವರು ಹಿಜ್ಬುಲ್‌ ಉಗ್ರ ಬುರ್ಹಾನ್‌ ವಾನಿಯನ್ನು ವೈಭವೀಕರಿಸಿದ ಅದೇ ವೇದಿಕೆಯಲ್ಲಿ ಭಾರತ ತಿರುಗೇಟು ನೀಡಿದೆ.

ಸಿಂಧೂ ನದಿ ನೀರು ಬಂದ್‌?

ಪಾಕಿಸ್ತಾನ ಬಳಸುತ್ತಿರುವ ಶೇ. 80 ನೀರು ಭಾರತದ ನದಿಗಳಿಂದಲೇ ಹರಿದು ಹೋಗುತ್ತಿದೆ. ಇದೀಗ ಭಾರತ 1960ರಲ್ಲಿ ಏರ್ಪಟ್ಟಿರುವ ಸಿಂಧೂನದಿ ನೀರು ಹಂಚಿಕೆ ಒಪ್ಪಂದವನ್ನು ಮರುಪರಿಶೀಲಿಸಲು ಭಾರತ ಮುಂದಾಗಿದೆ.

ನುಗ್ಗಿ ಹೊಡೆಯಿತೇ ಸೇನೆ?

ಉರಿ ದಾಳಿಗೆ ಪ್ರತಿಯಾಗಿ ಮಂಗಳವಾರ ರಾತ್ರಿಯೇ ಸೇನೆ ಪಿಒಕೆಗೆ ನುಗ್ಗಿ ಉಗ್ರರ ಮೂರು ಶಿಬಿರಗಳನ್ನು ಧ್ವಂಸಗೊಳಿಸಿ, 20 ಉಗ್ರರನ್ನು ಕೊಂದು ಹಾಕಿದೆ ಎಂಬ ವರದಿಗಳು ಹರಿದಾಡುತ್ತಿವೆ.

ಪಾಕ್‌-ಚೀನಾ ಸ್ನೇಹ ಅಮರ

ಪಾಕಿಸ್ತಾನಕ್ಕೆ ಎಲ್ಲ ರೀತಿಯ ಸಾಥ್‌ ನೀಡುತ್ತಿರುವ ಚೀನಾ, ಉಭಯ ರಾಷ್ಟ್ರಗಳ ನಡುವಿನ ಸಂಬಂಧವನ್ನು ಯಾರೂ ಮುರಿಯಲು ಸಾಧ್ಯವಿಲ್ಲ ಎಂದು ಹೇಳಿದೆ. ನವಾಜ್‌ ಷರೀಫ್‌ ಮತ್ತು ಚೀನಾ ಪ್ರಧಾನಿ ಲಿ ಕ್ಲಿಯಾಂಗ್‌ ವಿಶ್ವ ಸಂಸ್ಥೆ ಅಧಿವೇಶನದ ವೇಳೆ ಭೇಟಿಯಾದರು.

ಸಮರಕ್ಕೆ ಸಜ್ಜಾಗಿದೆಯೇ?

ಭಾರತದ ಪ್ರತೀಕಾರದ ಭೀತಿಯಲ್ಲಿರುವ ಪಾಕಿಸ್ತಾನ ಪೂರ್ಣ ಪ್ರಮಾಣದ ಯುದ್ಧ ಸಿದ್ಧತೆ ನಡೆಸುವಂತಿದೆ. ಪೇಶಾವರ-ರಾವಲ್ಪಿಂಡಿ ಸಂಪರ್ಕಿಸುವ ಹೆದ್ದಾರಿಯಲ್ಲಿ ವಾಯುಪಡೆಯ ಎಫ್‌-7 ಮತ್ತು ಮಿರಾಜ್‌ ಫೈಟರ್‌ ಜೆಟ್‌ಗಳು ಸಮರಾಭ್ಯಾಸ ನಡೆಸಿವೆ.