ನೇರಮಾತು: ಕನ್ನಡದ ಅಭಿಮಾನಿಯಾದ ಕುಡ್ಲದ ಬೆಡಗಿ ಸಂಚಿತಾ ಹರೀಶ್‌ ಬಸವರಾಜ್‌ ತನ್ನ ಹಾಡುಗಳು ಮತ್ತು ಟ್ರೇಲರ್‌ಗಳ ಮೂಲಕ ಗಾಂಧೀನಗರದಲ್ಲಿ ಸದ್ದು ಮಾಡುತ್ತಿರುವ ಕನ್ನಡದ ಬಹು ನಿರೀಕ್ಷಿತ ಸಿನಿಮಾ 'ಬದ್ಮಾಶ್‌'. ಸ್ಪೆಷಲ್‌ ಸ್ಟಾರ್‌ ಧನಂಜಯ ಅಭಿನಯದ ಈ ಸಿನಿಮಾದಲ್ಲಿ ಸಂಚಿತಾ ಶೆಟ್ಟಿ ನಾಯಕಿ. ಕನ್ನಡದ ಹುಡುಗಿಯಾದರೂ ತಮಿಳು ಮತ್ತು ತೆಲುಗಿನಲ್ಲಿ ಹೆಚ್ಚಾಗಿ ಗುರುತಿಸಿಕೊಂಡಿದ್ದ ಇವರು 'ಬದ್ಮಾಶ್‌' ಮೂಲಕ ಸಿನಿಮಾ ಮೂಲಕ ಕನ್ನಡಕ್ಕೆ ಮತ್ತೆ ಬರುತ್ತಿದ್ದಾರೆ. ಸಂಚಿತಾ ಶೆಟ್ಟಿ ಲವಲವಿಕೆಯೊಂದಿಗೆ ತಮ್ಮ ಬದ್ಮಾಶ್‌ ಸಿನಿಮಾ ಬಗ್ಗೆ ಮಾತನಾಡಿದ್ದಾರೆ. ಕನ್ನಡದ ಹುಡುಗಿಯಾಗಿ ಮತ್ತೆ ಕನ್ನಡಕ್ಕೆ ಮರಳುತ್ತಿದ್ದೀರಿ, ಹೇಗನಿಸುತ್ತಿದೆ? ಕನ್ನಡದಲ್ಲಿ ನಟಿಸಲು ಮತ್ತು ಒಂದೊಳ್ಳೆ ಕಥೆಗಾಗಿ ಬಹಳ ದಿನಗಳಿಂದ ಕಾಯುತ್ತಿದ್ದೆ. ಆಕಾಶ್‌ ಶ್ರೀವತ್ಸ ಅವರು ಕಥೆ ಹೇಳಿದಾಗ ಖುಷಿಯಾಯ್ತು. ಎರಡು ಸಲದ ಭೇಟಿಯಿಂದಲೇ ಕಥೆ ಓಕೆ ಮಾಡಿ ಚಿತ್ರತಂಡ ಸೇರಿಕೊಂಡೆ. ಸ್ಯಾಂಡಲ್‌ವುಡ್‌ ಬಿಟ್ಟು ತಮಿಳು ಮತ್ತು ತೆಲುಗಿಗೆ ಹೋಗಿದ್ಯಾಕೆ? ನಾನು ಕನ್ನಡ ಬಿಟ್ಟು ಹೋಗಿರಲಿಲ್ಲ. ಬೆಂಗಳೂರಿನಂದಲೇ ಎಲ್ಲವನ್ನೂ ಮ್ಯಾನೇಜ್‌ ಮಾಡುತ್ತಿದ್ದೇನೆ. ಇಲ್ಲೂ ಸಾಕಷ್ಟು ಕಥೆಗಳನ್ನು ಕೇಳಿದ್ದೆ, ಆದರೆ ಯಾವುದೂ ಹಿಡಿಸಿರಲಿಲ್ಲ. ಬದ್ಮಾಶ್‌ ಕಥೆ ಕೇಳಿದ ತಕ್ಷಣ ಇಷ್ಟವಾಯಿತು, ಒಪ್ಪಿಕೊಂಡೆ. ಒಳ್ಳೆ ಪಾತ್ರ ಸಿಕ್ಕರೆ ನಟಿಸಲು ಯಾವ ಭಾಷೆಯಾದರೇನು? ನನಗೆ ಕೆಲಸ ಇಂಪಾರ್ಟೆಂಟ್‌, ಭಾಷೆಯಲ್ಲ. ಬದ್ಮಾಶ್‌ ಸಿನಿಮಾ ಬಗ್ಗೆ ಹೇಳಿ? ಬದ್ಮಾಶ್‌ ಸಿನಿಮಾ ಒಂದು ಪಕ್ಕಾ ಮಾಸ್‌ ಎಂಟರ್‌ಟೈನಿಂಗ್‌ ಮೂವಿ. ಎಲ್ಲ ವರ್ಗದ ಪ್ರೇಕ್ಷಕರು ಇಷ್ಟಪಡೋ ಸಿನಿಮಾ. ಬದ್ಮಾಶ್‌ ಎಂದರೆ ಒಂದು 'ಗೇಮ್‌', ಈ ಸಿನಿಮಾದ ಒಂದೊಂದು ದೃಶ್ಯವೂ ಕ್ರಿಕೆಟ್‌ ಆಟದಲ್ಲಿ ಬಾಲ್‌ ಓಡುವಂತೆ ರೋಚಕವಾಗಿ ಸಾಗುತ್ತದೆ. ಲವ್‌ ಇದೆ, ಥ್ರಿಲ್‌ ಇದೆ, ಆ್ಯಕ್ಷನ್‌ ಇದೆ, ಎಲ್ಲವೂ ಇದೆ. ಈ ಸಿನಿಮಾದಲ್ಲಿ ನೀವು ಯಾವ ರೀತಿಯ ಪಾತ್ರ ಮಾಡಿದ್ದೀರಾ? ಈ ಸಿನಿಮಾದಲ್ಲಿ ನಾನು ಅಪ್ಪಟ ಕನ್ನಡಾಭಿಮಾನಿ ಹುಡುಗಿಯಾಗಿ ಕಾಣಿಸಿಕೊಂಡಿದ್ದೇನೆ. ಯಾರಾದರೂ ಕನ್ನಡ ಬರುವುದಿಲ್ಲ ಎಂದರೆ ಅವರಿಗೆ ಕನ್ನಡ ಕಲಿಸುವ ಯುವತಿಯ ಪಾತ್ರ. ಈ ಸಿನಿಮಾದ ನಾಯಕಿ ಆರ್‌ಜೆಯಾಗಿ ಕನ್ನಡದ ಕಟ್ಟಾಳಾಗಿರುತ್ತಾಳೆ. ನಾಯಕ ಧನಂಜಯ ಅವರ ಜತೆ ಕೆಲಸ ಮಾಡಿದ ಅನುಭವದ ಬಗ್ಗೆ... ಅವರ ಜೊತೆ ನಟಿಸುವಾಗ ನನಗೆ ಸಖತ್‌ ಕಂಫರ್ಟಬಲ್‌ ಆಗಿರುತ್ತದೆ. ಒಳ್ಳೆ ಸೆನ್ಸಿಬಲ್‌ ನಟ. ಸ್ನೇಹಜೀವಿ. ಬದ್ಮಾಶ್‌ ಶೂಟಿಂಗ್‌ ಸಮಯದಲ್ಲಿನ ಒಂದು ಮರೆಯಲಾಗದ ಅನುಭವ? 'ಮಾಯಾವಿ ಕನಸೇ' ಹಾಡಿನ ಶೂಟಿಂಗ್‌ ಸಮಯದಲ್ಲಿ ಒಂದು ಸಣ್ಣ ಬೋಟ್‌ನಲ್ಲಿ ನನ್ನನ್ನು ಮತ್ತು ಧನಂಜಯ ಅವರಿಬ್ಬರನ್ನು ಬಿಟ್ಟು ಇಡೀ ಚಿತ್ರತಂಡ ಸಾಕಷ್ಟು ದೂರದಲ್ಲಿತ್ತು. ಒಂದು ಕಡೆ ಭಯ ಇನ್ನೊಂದು ಕಡೆ ಖುಷಿ ಎಲ್ಲವೂ ಆಗುತ್ತಿತ್ತು. ಇದು 'ಬದ್ಮಾಶ್‌' ಶೂಟಿಂಗ್‌ನಲ್ಲಿ ನಾನು ಮರೆಯಲಾಗದ ಸನ್ನಿವೇಶ. ಚೆನ್ನೈ ಮತ್ತು ಬೆಂಗಳೂರು ಎರಡನ್ನೂ ಹೇಗೆ ಮ್ಯಾನೇಜ್‌ ಮಾಡ್ತಾ ಇದ್ದೀರಾ? ಸ್ವಲ್ಪ ಕಷ್ಟವಾಗಿದೆ. ಟ್ರಾವೆಲಿಂಗ್‌ ಜಾಸ್ತಿ ಆಗಿದೆ, ಆದರೆ ಅದನ್ನು ಎಂಜಾಯ್‌ ಮಾಡ್ತಾ ಇದೀನಿ, ಹಗಲು ರಾತ್ರಿ ಎನ್ನದೆ ಓಡಾಡುತ್ತಿದ್ದೇನೆ. ಕಮಿಟ್‌ಮೆಂಟ್‌ ಅಂದಮೇಲೆ ಅಷ್ಟೆಲ್ಲಾ ಕಷ್ಟ ಪಡಬೇಕಾಗುತ್ತದೆ. ಈ ಸಿನಿಮಾದಲ್ಲಿ ನಿಮ್ಮನ್ನು ಬಹಳ ಸುಂದರವಾಗಿ ಚಿತ್ರಿಸಿದ್ದಾರೆ ಎಂಬ ಮಾತಿದೆ? ಹೌದು, ಈ ಸಿನಿಮಾದಲ್ಲಿ ನನ್ನನ್ನು ನೋಡಿದ ಹುಡುಗರು, 'ಇದ್ದರೆ ಈ ತರಹ ಹುಡುಗಿ ನನಗೆ ಪ್ರೇಮಿಯಾಗಿರಬೇಕು' ಅನ್ನಬೇಕು, ಅಷ್ಟೊಂದು ಬ್ಯೂಟಿಫುಲ್‌ ಆಗಿ ನನ್ನನ್ನು ತೋರಿಸಿದ್ದಾರೆ.
↧
ಭಾಷೆ ಕಲಿಸುವ ಹುಡುಗಿ
↧