ಎಕನಾಮಿಕ್‌ ಟೈಮ್ಸ್‌ ಹೊಸದಿಲ್ಲಿ ಸ್ಟಾರ್ಟಪ್‌ ಮತ್ತು ಐಟಿ ವಲಯದಲ್ಲಿ ಪಿಂಕ್‌ ಸ್ಲಿಪ್‌ಗಳ ಬಗ್ಗೆ ವರದಿಯಾಗುತ್ತಿದ್ದರೂ, ಪರಿಸ್ಥಿತಿ ತೀರಾ ಬಿಗಡಾಯಿಸಿಲ್ಲ. ಈಗಲೂ ಉದ್ಯೋಗಾಕಾಂಕ್ಷಿಗಳಿಗೆ ಈ ಕ್ಷೇತ್ರವೇ ಆಕರ್ಷಣೆಯನ್ನು ಉಳಿಸಿಕೊಂಡಿದೆ. ಉತ್ತಮವಾಗಿ ಕೆಲಸ ಮಾಡದವರಿಗೆ ಐಟಿ ಕಂಪನಿಗಳು ಗೇಟ್‌ ಪಾಸ್‌ ನೀಡಿರಬಹುದು. ಲಾಭಾಂಶದ ಮೇಲೆ ಒತ್ತಡವಿರುವುದರಿಂದಲೂ ಕೆಲವರು ಉದ್ಯೋಗ ಕಳೆದುಕೊಳ್ಳಬೇಕಾಗಿ ಬಂದಿರಬಹುದು. ಆದರೆ ಮಧ್ಯಮ ಮತ್ತು ಹೆಚ್ಚಿನ ಕೌಶಲ್ಯ ಅಗತ್ಯ ಇರುವ ಉದ್ಯೋಗಗಳಿಗೆ ಬೇಡಿಕೆ ಮುಂದುವರಿಯಲಿದೆ ಎಂದು ಮಾನವ ಸಂಪನ್ಮೂಲ (ಎಚ್‌ಆರ್‌) ತಜ್ಞರು ಹೇಳಿದ್ದಾರೆ. ಉದ್ಯೋಗ ಕಡಿತಗಳು ಇತ್ತಿಚಿನ ದಿನಗಳಲ್ಲಿ ಸಾಮಾನ್ಯವಾಗುತ್ತಿವೆ. ಫ್ಲಿಪ್‌ಕಾರ್ಟ್‌, ಆಸ್ಕ್‌ಮೀ, ಓಲಾ ಮತ್ತು ಇನ್ಫೋಸಿಸ್‌ ಹಾಗೂ ಇತರ ಕಂಪನಿಗಳಲ್ಲೂ ಇದನ್ನು ಕಾಣಬಹುದು. ಆದರೆ ಇಂಥ ಉದ್ಯೋಗ ಕಡಿತದಿಂದ ಕಂಪನಿಗಳಿಗೆ ವೆಚ್ಚ ಕಡಿಮೆ ಮಾಡಲು ಹಾಗೂ ಕಾರ್ಯ ಕ್ಷಮತೆಯನ್ನು ಹೆಚ್ಚಿಸಲು ಸಹಕಾರಿಯಾಗುತ್ತದೆ ಎನ್ನುತ್ತಾರೆ ವಿಶ್ಲೇಷಕರು. '' ಉದ್ಯೋಗಿಗಳು ತಮ್ಮ ಕೌಶಲ್ಯಗಳನ್ನು ಹೆಚ್ಚಿಸಿಕೊಳ್ಳಬೇಕು. ನಿಯಮಿತವಾಗಿ ಪರಿಷ್ಕರಣೆ ಮಾಡಬೇಕು. ಸಾಮಾನ್ಯವಾಗಿ ಮೂರು ಕಾರಣಗಳೊಗಾಗಿ ಉದ್ಯೋಗ ಕಡಿತ ಆಗುತ್ತದೆ. ಅದಕ್ಷರ ಸಂಖ್ಯೆಯನ್ನು ಕಡಿಮೆ ಮಾಡುವುದು, ಯೋಜನೆಗಳು ಮುಕ್ತಾಯವಾದಾಗ ಮತ್ತು ಆಟೊಮೇಶನ್‌ ಪರಿಣಾಮ ಉದ್ಯೋಗ ಕಡಿತಕ್ಕೆ ಕಂಪನಿಗಳು ಮುಂದಾಗಬಹುದು. ಯಾವುದೇ ದೇಶದ ಆರ್ಥಿಕತೆಯ ಅಭ್ಯುದಯಕ್ಕೆ ಕಡಿಮೆ ಕೌಶಲ್ಯದ ಉದ್ಯೋಗಿಗಳಿಂದ ಪ್ರಯೋಜನವಿಲ್ಲ'' ಎನ್ನುತ್ತಾರೆ ನೇಮಕಾತಿ ವಲಯದ ಟೀಮ್‌ಲೀಸ್‌ ಸವೀರ್‍ಸ್‌ನ ಹಿರಿಯ ಉಪಾಧ್ಯಕ್ಷೆ ಋುತುಪರ್ಣ ಚಕ್ರವರ್ತಿ. ಐಟಿ ಮತ್ತು ಸ್ಟಾರ್ಟಪ್‌ ಕ್ಷೇತ್ರದಲ್ಲಿ ಕಂಪನಿಗಳ ಲಾಭಾಂಶದ ಮೇಲೆ ಒತ್ತಡ ಉಂಟಾಗುತ್ತಿದೆ. ಜತೆಗೆ ಆಟೊಮೆಶನ್‌ ಹಾಗೂ ಕೃತಕ ಬುದ್ಧಿಮತ್ತೆಯ ಸಾಧನಗಳ ಬಳಕೆ ಹೆಚ್ಚುತ್ತಿದೆ. ಹೀಗಾಗಿ ಉದ್ಯೋಗಗಳ ಕಡಿತಕ್ಕೆ ದಾರಿಯಾಗುತ್ತಿದೆ ಎನ್ನುತ್ತಾರೆ ಅವರು. '' ಮಧ್ಯಮ ಮತ್ತು ಉನ್ನತ ಮಟ್ಟದ ಕೌಶಲ್ಯದ ಅಗತ್ಯವಿರುವ ಐಟಿ ಹುದ್ದೆಗಳು ಬೇಡಿಕೆಯನ್ನು ಮುಂದುವರಿಸಲಿವೆ. ಆದ್ದರಿಂದ ಹಾಲಿ ಉದ್ಯೋಗಿಗಳು ತಮ್ಮ ವೃತ್ತಿಪರ ಕೌಶಲ್ಯಗಳನ್ನು ಹೆಚ್ಚಿಸಿಕೊಳ್ಳಲು ಗಮನ ನೀಡಬೇಕು'' ಎನ್ನುತ್ತಾರೆ ಎಸ್‌ಎಚ್‌ಆರ್‌ಎಂ ಇಂಡಿಯಾದ ಸಲಹೆಗಾರ ನಿಶ್ಚಿತ್‌ ಉಪಾಧ್ಯಾಯ. ಯೋಜನೆಯ ವೆಚ್ಚಗಳಲ್ಲಿ 70 ಪರ್ಸೆಂಟ್‌ನಷ್ಟು ವೇತನ ವೆಚ್ಚದ ಪಾಲಾಗುತ್ತಿದೆ. ಮತ್ತೊಂದು ಕಡೆ ಲಾಭಾಂಶ ಕಡಿಮೆಯಾಗುತ್ತಿದೆ. ಆದರೆ ಒಟ್ಟಾರೆಯಾಗಿ ಉದ್ಯೋಗಾವಕಾಶಗಳು ಆಶಾದಾಯಕವಾಗಿದೆ. ಮುಖ್ಯವಾಗಿ 5-12 ವರ್ಷ ಅನುಭವಿ ಉದ್ಯೋಗಿಗಳಿಗೆ ಬೇಡಿಕೆ ಉಂಟಾಗಿದೆ ಎನ್ನುತ್ತಾರೆ ಅಂಟಾಲ್‌ ಇಂಟರ್‌ನ್ಯಾಷನಲ್‌ ನೆಟ್‌ವರ್ಕ್‌ನ ಪಾಲುದಾರರಾದ ವಿನು ನಾಯರ್‌. ಭಾರತದ ಐಟಿ ಮತ್ತು ಐಟಿ ಸಂಬಂಧಿತ ಕಂಪನಿಗಳಿಗೆ ಬಿಸಿನೆಸ್‌ ಹೆಚ್ಚುವ ಎಲ್ಲ ಸಾಧ್ಯತೆಗಳೂ ಇವೆ. ಆದರೆ ಅವುಗಳು ತಮ್ಮ ಸೇವೆಯ ಗುಣಮಟ್ಟವನ್ನು ಸುಧಾರಿಸಬೇಕು ಎನ್ನುತ್ತಾರೆ ಗ್ಲೋಬಲ್‌ ಹಂಟ್‌ನ ವ್ಯವಸ್ಥಾಪಕ ನಿರ್ದೇಶಕ ಸುನಿಲ್‌ ಗೋಯೆಲ್‌.
↧
ಐಟಿ, ಸ್ಟಾರ್ಟಪ್‌ಗಳಲ್ಲಿ ಪಿಂಕ್‌ ಸ್ಲಿಪ್‌ ಹೊರತಾಗಿಯೂ ಉದ್ಯೋಗ
↧