ನಾನು ರಾಜಕೀಯ ಕೈಗೊಂಬೆಯಾದೆ: ವಾಧ್ರಾ

ಹೊಸದಿಲ್ಲಿ: 'ತಾನು ರಾಜಕೀಯ ಕುತಂತ್ರಕ್ಕೆ ದಾಳವಾಗಿ ಬಳಕೆಯಾದೆ' ಎಂದು ಭೂಹಗರಣ ವಿವಾದದಲ್ಲಿ ಸಿಲುಕಿಕೊಂಡಿರುವ, ಸೋನಿಯಾ ಅಳಿಯ ರಾಬರ್ಟ್ ವಾಧ್ರಾ ಭಾನುವಾರ ಆರೋಪಿಸಿದರು.

'ತಮ್ಮ ಕುಟುಂಬದ ರಾಜಕಾರಣವನ್ನೂ, ತಮ್ಮ ವ್ಯವಹಾರವನ್ನೂ ಬೇರೆಯಾಗಿಯೇ ನೋಡಬೇಕು. ಸದಾ ಕಾಲ ಈ ಎರಡು ವಿಷಯಗಳಿಗೆ ಕೊಂಡಿ ಕಲ್ಪಿಸುವುದು ಬಿಡಬೇಕು. ಬಿಜೆಪಿಗೆ ಜನರ ಗಮನವನ್ನು ಬೇರೆಡೆ ತಿರುಗಿಸಬೇಕೆಂದಾಗಲೆಲ್ಲ ನನ್ನನ್ನು ರಾಜಕೀಯ ಕೈಗೊಂಬೆಯಂತೆ ಬಳಸುತ್ತದೆ' ಎಂದು 46 ವರ್ಷದ ವಾಧ್ರಾ ಅಸಮಾಧಾನ ವ್ಯಕ್ತಪಡಿಸಿದರು .

'ನಾನು ಸದಾ ಕಾಲ ಪಾರದರ್ಶಕವಾಗಿ, ಕಾನೂನು ಪ್ರಕಾರವೇ ವ್ಯವಹಾರ ನಡೆಸಿದ್ದೇನೆ .ಆದರೆ ನನ್ನ ವಿರುದ್ಧ ಸುಳ್ಳು ಆರೋಪಗಳನ್ನು ಹೊರಿಸಲಾಯಿತು. ಅದನ್ನು ಎಷ್ಟು ಪ್ರಬಲವಾಗಿ ಜನರ ಮನಸ್ಸಿನಲ್ಲಿ ಭಿತ್ತಲಾಯಿತೆಂದರೆ, ಈಗ ಸತ್ಯ ಯಾರಿಗೂ ಬೇಕಾಗಿಲ್ಲ' ಎಂದು ಅವರು ಪಿಟಿಐಗೆ ಹೇಳಿದರು.

ವಾಧ್ರಾ ಅವರ ಅವ್ಯವಹಾರ ಆರೋಪ ಸಂಬಂಧ ಹರಿಯಾಣಾ ಹಾಗೂ ರಾಜಸ್ಥಾನಗಳಲ್ಲಿ ತನಿಖೆ ನಡೆಯುತ್ತಿದ್ದು, ಅವರ ಕಂಪನಿಗೆ ನೋಟೀಸನ್ನೂ ಜಾರಿ ಮಾಡಲಾಗಿದೆ . ಆದರೆ ತಮಗೆ ಯಾವುದೇ ನೋಟೀಸ್ ಬಂದಿಲ್ಲವಾದರೂ, ಮಾಧ್ಯಮಗಳು ಹೀಗೆ ವರದಿ ಮಾಡಿರುವುದು ಆಶ್ಚರ್ಯ ತಂದಿದೆ ಎಂದು ಅವರು ಪ್ರತಿಕ್ರಿಯಿಸಿದ್ದಾರೆ.