ಆನ್‌ಲೈನ್ ವಹಿವಾಟು ದಿಗ್ಗಜ ಫ್ಲಿಪ್‌ಕಾರ್ಟ್ ಇನ್ನು ಮುಂದೆ ಆಫ್‌ಲೈನ್ ಮಾರಾಟವನ್ನೂ ಆರಂಭಿಸಲಿದೆ.
ಈಗಲೂ ಇಂಟರ್‌ನೆಟ್‌ನಲ್ಲಿ ಫ್ಲಿಪ್‌ಕಾರ್ಟ್ ಮೂಲಕ ಉತ್ಪನ್ನಗಳನ್ನು ಖರೀದಿಸಲು ಹಿಂದೆ ಮುಂದೆ ನೋಡುವ ವರ್ಗವಿದೆ. ಅಂತಹ ಗ್ರಾಹಕರನ್ನು ಸೆಳೆದುಕೊಳ್ಳಲು ಫ್ಲಿಪ್‌ಕಾರ್ಟ್ ಆಫ್‌ಲೈನ್ ಮಾರಾಟ ತಂತ್ರವನ್ನು ಅನುಸರಿಸಲಿದೆ.
ಇ-ಕಾಮರ್ಸ್ ವಹಿವಾಟಿಗೆ ಸಹಕಾರಿಯಾಗಿ ಈ ಆಫ್‌ಲೈನ್ ಮಾರಾಟ ವ್ಯವಸ್ಥೆ ಮಾಡಲಾಗುವುದು. ಆರಂಭದಲ್ಲಿ ಸ್ಮಾರ್ಟ್ ಫೋನ್‌ಗಳನ್ನು ಫ್ಲಿಪ್‌ಕಾರ್ಟ್ ನಿರ್ದಿಷ್ಟ ಮಳಿಗೆಗಳಲ್ಲಿ ಗ್ರಾಹಕರ ಮುಂದಿಡಲಿದೆ. ಬಳಕೆದಾರರು ಈ ಮಳಿಗೆಗಳಿಗೆ ತೆರಳಿ ಸ್ಮಾರ್ಟ್‌ಫೋನ್‌ಗಳನ್ನು ಬಳಸಿ ನೋಡಿಕೊಳ್ಳಬಹುದು. ನಂತರ ಫ್ಲಿಪ್‌ಕಾರ್ಟ್ ಆ್ಯಪ್ ಮೂಲಕ ಖರೀದಿಸಬಹುದು. ಗ್ರಾಹಕರು ಭೇಟಿ ನೀಡಿದ ಮಳಿಗೆ ಅಥವಾ ಮನೆಗೆ ಉತ್ಪನ್ನವನ್ನು ತರಿಸಿಕೊಳ್ಳಬಹುದು. ತಂತ್ರಜ್ಞಾನದ ಬಳಕೆಯಲ್ಲಿ ಅಷ್ಟಾಗಿ ಕೌಶಲ್ಯವಿರದ ಗ್ರಾಹಕರಿಗೆ ಮಳಿಗೆಯಲ್ಲಿನ ಸಿಬ್ಬಂದಿ ಸಹಕರಿಸಲಿದ್ದಾರೆ. ದೊಡ್ಡ ನಗರಗಳಲ್ಲಿ ಮೊದಲಿಗೆ ಇಂತಹ ಮಳಿಗೆಗಳನ್ನು ಹೊಂದಲಿದೆ.
ಈಗಾಗಲೇ ಫ್ಲಿಪ್‌ಕಾರ್ಟ್ 19 ನಗರಗಳಲ್ಲಿ ರಿಟೇಲ್ ಸರಣಿ ಸ್ಪೈಸ್ ಹಾಟ್‌ಸ್ಪಾಟ್ ಜತೆಗೆ ಒಪ್ಪಂದ ಮಾಡಿಕೊಂಡು, ಅದರ ಮಳಿಗೆಗಳಲ್ಲಿ ಸ್ಮಾರ್ಟ್‌ಫೋನ್‌ಗಳ ಖರೀದಿದಾರರ ಅನುಕೂಲಕ್ಕೆ ಫ್ಲಿಪ್‌ಕಾರ್ಟ್ ಎಕ್ಸ್‌ಪೀರಿಯನ್ಸ್ ಸೆಂಟರ್‌ಗಳನ್ನು ಆರಂಭಿಸಿದೆ. ಕಂಪನಿ ಇಂತಹ 8-10 ಆಫ್‌ಲೈನ್ ಮೊಬೈಲ್ ರಿಟೇಲ್ ಸರಣಿಗಳ ಜತೆ ಮಾತುಕತೆ ನಡೆಸುತ್ತಿದೆ.'
ಎಕನಾಮಿಕ್ ಟೈಮ್ಸ್ ಬೆಂಗಳೂರು