* ಪದ್ಮಾ ಶಿವಮೊಗ್ಗ ಪವರ್‌ ಸ್ಟಾರ್‌ ಪುನೀತ್‌ ರಾಜ್‌ಕುಮಾರ್‌ ಮತ್ತು ನಿರ್ದೇಶಕ ಸಂತೋಷ್‌ ಆನಂದ್‌ರಾಮ್‌ ಕಾಂಬಿನೇಷನ್‌ನಲ್ಲಿ ಸೆಟ್ಟೇರಿರುವ 'ರಾಜಕುಮಾರ' ಚಿತ್ರ ಕುತೂಹಲ ಕೆರಳಿಸಿದೆ. ಇದಕ್ಕೆ ಕಾರಣ ಈ ನಿರ್ದೇಶಕರ ಚೊಚ್ಚಲ ಚಿತ್ರ ಮಿಸ್ಟರ್‌ ಆ್ಯಂಡ್‌ ಮಿಸೆಸ್‌ ರಾಮಾಚಾರಿಯ ಯಶಸ್ಸು. ಈ ಮೂಲಕ ಭರವಸೆಯ ಡೈರೆಕ್ಟರ್‌ ಎನಿಸಿಕೊಂಡ ಸಂತೋಷ್‌,ಪುನೀತ್‌ಗಾಗಿ ಹೊಸ ರೀತಿಯ ಕತೆಯನ್ನು ತೆರೆಯ ಮೇಲೆ ತರುತ್ತಿದ್ದಾರೆ. ಚಿತ್ರಕ್ಕೆ ರಾಜಕುಮಾರ ಎಂಬ ಹೆಸರನ್ನಿಟ್ಟಿರುವುದೂ ಕುತೂಹಲಕ್ಕೆ ಇನ್ನೊಂದು ಕಾರಣ. 'ಈ ಚಿತ್ರದ ಕತೆಯನ್ನು ರಾಮಾಚಾರಿ ಚಿತ್ರಕ್ಕಿಂತ ಮೊದಲೇ ಬರೆದಿದ್ದೆ. ಆದರೆ, ಮೊದಲ ಚಿತ್ರದಲ್ಲೇ ಇಂಥದ್ದೊಂದು ಸ್ಟೋರಿ ತೆಗೆದುಕೊಳ್ಳೋದು ಬೇಡ ಅನ್ನಿಸಿತು. ರಾಮಾಚಾರಿ ಶೂಟಿಂಗ್‌ ಟೈಮಲ್ಲಿ ಪುನೀತ್‌ ಅವರಿಗೆ ಒನ್‌ ಲೈನ್‌ ಕತೆ ಹೇಳಿದೆ. ಅವರಿಗೆ ಇಷ್ಟವಾಯಿತು. ಆಗಲೇ ಈ ಚಿತ್ರ ಮಾಡೋದು ನಿರ್ಧಾರವಾಗಿತ್ತು' ಎನ್ನುತ್ತಾರೆ ಆನಂದ್‌ ರಾಮ್. ಚಿತ್ರದಲ್ಲಿ ಎರಡು ಕತೆಗಳನ್ನು ಹೇಳಲಿದ್ದಾರೆ ನಿರ್ದೇಶಕರು. ಬೇರೆ ಬೇರೆ ಕತೆಗಳು ಕೊನೆಯಲ್ಲಿ ಒಂದುಗೂಡುತ್ತವೆ. 'ಹೊಸ ರೀತಿಯಲ್ಲಿ ಕತೆ ಬರೆದಿದ್ದೇನೆ. ಎರಡು ಕತೆಗಳೂ ಇಂಟರ್‌ಲಿಂಕ್‌ ಆಗಿರುತ್ತವೆ. ಪುನೀತ್‌ ಇಮೇಜ್‌ಗೆ ಹೊಂದುವಂತೆ ಕತೆ ಡೆವಲಪ್‌ ಮಾಡಿದೆ. ಮಾಸ್‌ ಚಿತ್ರ ಇದು. ಆ್ಯಕ್ಷನ್‌, ರೋಮ್ಯಾನ್ಸ್‌ ಇದೆ' ಎನ್ನುತ್ತಾರೆ ಸಂತೋಷ್‌. ರಾಮಾಚಾರಿ ಚಿತ್ರದಲ್ಲಿದ್ದ ಮನರಂಜನೆ ಈ ಚಿತ್ರದಲ್ಲಿ ಇನ್ನಷ್ಟು ಬೂಸ್ಟಪ್‌ ಆಗಿದೆ ಅನ್ನೋದು ಅವರ ಅಭಿಪ್ರಾಯ. ದಕ್ಷಿಣ ಭಾರತದ ಜನಪ್ರಿಯ ನಟಿ ಪ್ರಿಯಾ ಆನಂದ್‌ ಪುನೀತ್‌ಗೆ ನಾಯಕಿಯಾಗಿ ನಟಿಸುತ್ತಿದ್ದಾರೆ. ಈಗಾಗಲೇ ಶೇ. 40ರಷ್ಟು ಚಿತ್ರೀಕರಣ ಮುಗಿಸಿದ್ದಾರೆ. ಆಸ್ಪ್ರೇಲಿಯಾದಲ್ಲಿ ರೋಮ್ಯಾಂಟಿಕ್‌ ಸಾಂಗ್‌ ಮತ್ತು ಸೀನ್‌ಗಳ ಚಿತ್ರೀಕರಣ ಮಾಡಲಾಗಿದೆ. ಈಗ ಕರ್ನಾಟಕದಲ್ಲಿ ಶೂಟಿಂಗ್‌ ಭರದಿಂದ ಸಾಗಿದೆ. ಈ ಚಿತ್ರದ ಫಸ್ಟ್‌ ಲುಕ್‌ ಈಗಾಗಲೇ ಬಿಡುಗಡೆ ಆಗಿದ್ದು, ಇದರಲ್ಲಿ ಕಸ್ತೂರಿ ನಿವಾಸ ಸಿನಿಮಾದಲ್ಲಿನ ಡಾ.ರಾಜ್‌ಕುಮಾರ್‌ ಅವರನ್ನು ಹೋಲುವ ಪೋಸ್ಟರ್‌ ಇದೆ.
↧
ರಾಮಾಚಾರಿಗಿಂತ ಮೊದಲೇ ರಾಜಕುಮಾರ ಕತೆ ಹೊಳೆದಿತ್ತು
↧