ಕಿರಗೂರಿನ ಗಯ್ಯಾಳಿಗಳ ಜತೆ ಮಿಂಚಿದ್ದ ಸೋನು ಈಗ ಶರಾವತಿ ತೀರಕ್ಕೆ ಶಿಫ್ಟ್‌ ಆಗಿದ್ದಾರೆ. ಹೌದು, ಸೋನು ಹೊಸ ಚಿತ್ರವೊಂದರ ಶೂಟಿಂಗ್‌ನಲ್ಲಿ ತೊಡಗಿಸಿಕೊಂಡಿದ್ದಾರೆ. ಪುನೀತ್‌ ನಿರ್ದೇಸನದ 'ಶರಾವತಿ ತೀರದಲ್ಲಿ' ಚಿತ್ರದಲ್ಲಿ ಸೋನು ನಾಯಕಿಯಾಗಿ ನಟಿಸುತ್ತಿದ್ದು, ಶೂಟಿಂಗ್‌ ನಿಮಿತ್ತ ಚಿತ್ರತಂಡ ಸದ್ಯ ಶರಾವತಿ ನದಿ ತೀರದಲ್ಲಿ ಬೀಡುಬಿಟ್ಟಿದೆ. 'ಚಿತ್ರದಲ್ಲಿ ನನಗೆ ಡಬಲ್‌ ಶೇಡ್‌ ಪಾತ್ರ ಇದೆ. ಒಂದು ಪಾತ್ರ 1930ರ ಕಾಲದ್ದು. ಆಗಿನ ಕಾಲದ ಯುವತಿಯರ ಕಾಸ್ಟ್ಯೂಮ್‌, ನಡೆ-ನುಡಿಯನ್ನು ಬಿಂಬಿಸಬೇಕು. ಇನ್ನೊಂದು ಪಾತ್ರ ಈಗಿನ ಕಾಲದ ಮಾಡ್ರನ್‌ ಹುಡುಗಿಯದ್ದು. ಎರಡು ವಿಭಿನ್ನ ರೀತಿಯ ಪಾತ್ರಗಳಲ್ಲಿ ನಾನು ಕಾಣಿಸಿಕೊಳ್ಳುತ್ತಿದ್ದೇನೆ' ಎನ್ನುತ್ತಾರೆ ಸೋನು. ಸುಮನಾ ಕಿತ್ತೂರ್‌ ನಿರ್ದೇಶನದ 'ಕಿರಗೂರಿನ ಗಯ್ಯಾಳಿಗಳು' ಚಿತ್ರದಲ್ಲಿ ಪ್ರೇಕ್ಷ ಕರು ಸೋನು ಪಾತ್ರವನ್ನು ಗುರುತಿಸಿದ್ದರು. ಈಗ 'ಶರಾವತಿ ತೀರದಲ್ಲಿ' ಚಿತ್ರದಲ್ಲಿಯೂ ತಮಗೆ ಅಭಿನಯಕ್ಕೆ ಸ್ಕೋಪ್‌ ಇರುವಂತಹ ಪಾತ್ರವಿದೆ ಎನ್ನುವ ಖುಷಿಯಲ್ಲಿದ್ದಾರವರು. ಕುಮುಟಾ, ಮುರುಡೇಶ್ವರ, ಶರಾವತಿ ನದಿ ತೀರದಲ್ಲಿ ಚಿತ್ರೀಕರಣ ನಡೆಸಲಾಗಿದೆ. ಕನ್ನಡ ಚಿತ್ರದ ಜತೆ ಸೋನು ತಮಿಳು ಚಿತ್ರಗಳಲ್ಲಿಯೂ ಬಿಝಿಯಾಗಿದ್ದಾರಂತೆ. ಜೀವಾ ಮತ್ತು ತೇಜು ರಾಮನ್‌ ಹೀರೋಗಳಾಗಿ ನಟಿಸುತ್ತಿರುವ ಚಿತ್ರಗಳಲ್ಲಿ ಸೋನು ನಾಯಕಿಯಾಗಿ ನಟಿಸುತ್ತಿದ್ದಾರೆ. ** ಕರ್ವ ಮೆಚ್ಚಿದ ಪುನೀತ್‌ ನವನೀತ್‌ ನಿರ್ದೇಶನದಲ್ಲಿ ಮೂಡಿ ಬಂದಿರುವ 'ಕರ್ವ' ಸಿನಿಮಾ ಹೌಸ್‌ಫುಲ್‌ ಪ್ರದರ್ಶನ ಕಾಣುತ್ತಿದೆ. ಈ ಚಿತ್ರದ ಕುರಿತು ಪ್ರೇಕ್ಷಕರಷ್ಟೇ ಅಲ್ಲ, ಸಿನಿಮಾರಂಗದವರೂ ಕೂಡ ಮೆಚ್ಚುಗೆ ವ್ಯಕ್ತಪಡಿಸುತ್ತಿದ್ದಾರೆ. ಮೊನ್ನೆಯಷ್ಟೇ ಈ ಸಿನಿಮಾ ವೀಕ್ಷಿಸಿದ ಪುನೀತ್‌ ರಾಜ್‌ಕುಮಾರ್‌, ಮೇಕಿಂಗ್‌ ಮತ್ತು ಕತೆ ಕುರಿತಾಗಿ ಖುಷಿಯಿಂದ ಮಾತನಾಡಿದ್ದಾರೆ. 'ಕರ್ವ ಸಿನಿಮಾ ನೋಡಿ ಸಖತ್‌ ಥ್ರಿಲ್‌ ಆದೆ. ಚಿತ್ರಕತೆ ಮತ್ತು ಅದನ್ನು ಕಟ್ಟಿಕೊಟ್ಟ ರೀತಿ ನನಗೆ ಖುಷಿ ಕೊಟ್ಟಿತು. ಎಲ್ಲಾ ಕಲಾವಿದರು ಉತ್ತಮವಾಗಿ ನಟಿಸಿದ್ದಾರೆ. ಪ್ರೇಕ್ಷಕರು ಕೂಡ ಚಿತ್ರತಂಡಕ್ಕೆ ಬೆನ್ನು ತಟ್ಟಿದ್ದಾರೆ. ಈಗ ನಾನು ಕರ್ವ ಸರಣಿ ಸಿನಿಮಾ ನಿರೀಕ್ಷಿಸುತ್ತಿದ್ದು, ಈ ತಂಡದಿಂದ ಇಂತಹ ಮತ್ತಷ್ಟು ಉತ್ತಮ ಪ್ರಯೋಗಗಳು ಸೆಟ್ಟೇರಲಿ' ಎಂದಿದ್ದಾರೆ ಪುನೀತ್‌. 'ಕರ್ವ' ಹಾರರ್‌ ಮತ್ತು ಥ್ರಿಲ್ಲರ್‌ ಸಿನಿಮಾ. '6-5=2' ನಿರ್ಮಾಪಕ ಕೃಷ್ಣ ಚೈತನ್ಯ ಚಿತ್ರಕ್ಕೆ ಬಂಡವಾಳ ಹೂಡಿದ್ದಾರೆ. ತಿಲಕ್‌, ಆರ್‌ಜೆ ರೋಹಿತ್‌, ಪೂನಂ, ಅನು ಮುಂತಾದವರ ತಾರಾಗಣವಿದೆ. ಎರಡು ವಾರದ ಹಿಂದೆ ತೆರೆಕಂಡ ಚಿತ್ರಕ್ಕೆ ಬಾಕ್ಸ್‌ ಆಫೀಸ್‌ನಲ್ಲಿ ಉತ್ತಮ ಪ್ರತಿಕ್ರಿಯೆ ಸಿಕ್ಕಿದೆ.
↧
ಡಬಲ್‌ ಶೇಡ್‌ನಲ್ಲಿ ಸೋನು
↧