ಜರ್ನಾ ಜೋಶಿ ಹಿಮಂತ್‌ ನಗರ ಕಾಲೇಜಿನಲ್ಲಿ ಬಿಬಿಎ ವಿದ್ಯಾರ್ಥಿನಿ. ರಹಸ್ಯ ಕಾರ್ಯಾಚರಣೆ ನಡೆಸಿ ಮೊರ್ಬಿಯಲ್ಲಿರುವ ಅತಿ ದೊಡ್ಡ ಸೆರಾಮಿಕ್ ಘಟಕದಲ್ಲಿ ಕೆಲಸ ಮಾಡುತ್ತಿದ್ದ 111 ಮಕ್ಕಳನ್ನು ಜೀತಮುಕ್ತಿಗೊಳಿಸಿದ್ದಾರೆ. ಈ 111 ಮಕ್ಕಳಲ್ಲಿ 100 ಹೆಣ್ಣು ಮಕ್ಕಳು.
ಸೌರಾಷ್ಟ್ರದಲ್ಲಿ ಇದು ಅತಿ ದೊಡ್ಡ ಬಾಲಕಾರ್ಮಿಕರ ಬಿಡುಗಡೆ ಕಾರ್ಯಾಚರಣೆ ಎಂದು ಅಧಿಕಾರಿಗಳು ಹೇಳಿದ್ದಾರೆ. 'ಏಪ್ರಿಲ್‌ನಲ್ಲಿ ಮೊರ್ಬಿಯಲ್ಲಿರುವ ಸಂಬಂಧಿಕರ ಮನೆಗೆ ಹೋಗಿದ್ದೆ. ಅಲ್ಲಿ ಬೆಳಗ್ಗೆ ಬಸ್ಸುಗಳಲ್ಲಿ ಮಕ್ಕಳು ಹೋಗುತ್ತಿದ್ದರು. ಆದರೆ ಅದು ಶಾಲಾ ಬಸ್ಸುಗಳು ಆಗಿರಲಿಲ್ಲ. ಹೀಗಾಗಿ ಅನುಮಾನಗೊಂಡು ಅವುಗಳನ್ನು ಹಿಂಬಾಲಿಸಿಕೊಂಡು ಹೋದಾಗ ಮಕ್ಕಳನ್ನು ಫ್ಯಾಕ್ಟರಿ ಕೆಲಸಗಳಿಗೆ ಬಳಸಿಕೊಳ್ಳುತ್ತಿರುವುದು ತಿಳಿಯಿತು.ಬಳಿಕ ಈ ಮಕ್ಕಳ ವಯಸ್ಸು ಮತ್ತು ಕೆಲಸದ ಸ್ಥಿತಿ ಗತಿ ತಿಳಿಯಲು ಅಲ್ಲಿ ಕೆಲಸಕ್ಕಾಗಿ ಅರ್ಜಿ ಸಲ್ಲಿಸಿದೆ,'ಎಂದು ಕಾರ್ಯಾಚರಣೆಯನ್ನು ಜರ್ನಾ ವಿವರಿಸಿದ್ದಾರೆ.
ಅಲ್ಲಿ ನನಗೆ ಪೇಸ್ಟಿಂಗ್, ಕಪ್ ಡಿಸೈನಿಂಗ್ ಕೆಲಸ ದೊರೆಯಿತು. ಅಲ್ಲಿ ಕೆಲಸ ಮಾಡುತ್ತಿರುವ ಹೆಚ್ಚಿನ ಮಕ್ಕಳು 18 ವರ್ಷಕ್ಕಿಂತ ಕೆಳಗಿನವರು, ಒತ್ತೆಯಾಳುಗಳಂತೆ ಅವರನ್ನು ಬೆಳಗ್ಗೆ 8-6ರವರೆಗೆ ಅತಿ ಉಷ್ಣತೆಯ ಜಾಗಗಳಲ್ಲಿ ನೀರೂ ನೀಡದೆ ಕೆಲಸ ಮಾಡಿಸಲಾಗುತ್ತಿತ್ತು ಎಂಬುದು ಗೊತ್ತಾಯಿತು. ಇದಾದ ಬಳಿಕ ಸಂಬಂಧಿಸಿದ ಇಲಾಖೆಯನ್ನು ಸಂಪರ್ಕಿಸಿದರೂ ಪ್ರತಿಕ್ರಿಯೆ ನಿರಾಶದಾಯಕವಾಗಿತ್ತು. ಹೀಗಾಗಿ ನೇರವಾಗಿ ಮುಖ್ಯಮಂತ್ರಿಯನ್ನು ಸಂಪರ್ಕಿಸಿದೆ,'ಎಂದು ಜರ್ನಾ ಹೇಳಿದ್ದಾರೆ. ಸಾಮಾಜಿಕ ರಕ್ಷಣೆ, ಪೊಲೀಸ್‌, ಕಾರ್ಮಿಕ ಮತ್ತು ಉದ್ಯೋಗ, ಮಕ್ಕಳ ರಕ್ಷಣಾ ಇಲಾಖೆಗಳು ಬಾಲ ಕಾರ್ಮಿಕರನ್ನು ಮುಕ್ತಗೊಳಿಸುವ ಕಾರ್ಯಾಚರಣೆಯಲ್ಲಿ ಭಾಗವಹಿಸಿವೆ.
ರಾಜ್‌ಕೋಟ್‌: ಸಂಬಂಧಿಸಿದ ಸರಕಾರಿ ಇಲಾಖೆಗಳು ಕಣ್ಮುಚ್ಚಿ ಕುಳಿತಿರುವಾಗ ಕಾಲೇಜು ವಿದ್ಯಾರ್ಥಿನಿಯೊಬ್ಬರು ರಹಸ್ಯ ಕಾರ್ಯಾಚರಣೆ ನಡೆಸಿ 111 ಬಾಲ ಕಾರ್ಮಿಕರನ್ನು ಮುಕ್ತಗೊಳಿಸಿದ್ದಾರೆ.