ಮೋದಿ ಅವರು ಪರಮಾಣು ಪೂರೈಕೆದಾರರ ಗ್ರೂಪ್‌ (ಎನ್‌ಎಸ್‌ಜಿ)ಗೆ ಭಾರತದ ಸದಸ್ಯತ್ವವನ್ನು ಬೆಂಬಲಿಸಲು ಹಾಲಿ ಸದಸ್ಯರಾಗಿರುವ ಸ್ವಿಜರ್ಲೆಂಡ್‌ ಮತ್ತು ಮೆಕ್ಸಿಕೋವನ್ನು ಕೋರಲಿದ್ದಾರೆ. ಭಾರತೀಯರು ಸ್ವಿಸ್‌ ಬ್ಯಾಂಕ್‌ನಲ್ಲಿ ಇಟ್ಟಿರುವ ಕಪ್ಪು ಹಣದ ವಿಷಯ ಸ್ವಿಜರ್ಲೆಂಡ್‌ ಪ್ರಧಾನಿ ಜತೆಗಿನ ಮಾತುಕತೆಯ ವೇಳೆ ಪ್ರಧಾನವಾಗಿ ಚರ್ಚೆಯಾಗಲಿದೆ.
ಮೊದಲು ಅಪಫಾನಿಸ್ತಾನಕ್ಕೆ ಭೇಟಿ ನೀಡುವ ಮೋದಿ ಅವರು ಅಲ್ಲಿ ಅಫ್ಘಾನ್‌-ಭಾರತ ಸ್ನೇಹದ ಅಣೆಕಟ್ಟನ್ನು ಉದ್ಘಾಟಿಸಲಿದ್ದಾರೆ. ಶನಿವಾರವೇ ಕತಾರ್‌ಗೆ ಭೇಟಿ ನೀಡಿ, ಅಲ್ಲಿಂದ ಎರಡು ದಿನಗಳ ಭೇಟಿಗಾಗಿ ಸ್ವಿಜರ್ಲೆಂಡ್‌ಗೆ ಹಾರುವರು. ಕಪ್ಪು ಹಣ ಮತ್ತು ಎನ್‌ಎಸ್‌ಜಿ ಸೇರ್ಪಡೆ ಚರ್ಚೆ ನಡೆಸಿ ಅವರು ಜೂ. 6ರಂದು ವಾಷಿಂಗ್ಟನ್‌ಗೆ ಪಯಣಿಸುವ ಅವರು, ಜೂ. 7ರಂದು ಅಧ್ಯಕ್ಷ ಬರಾಕ್‌ ಒಬಾಮಾ ಅವರ ಜತೆಗೆ ದ್ವಿಪಕ್ಷೀಯ ಒಪ್ಪಂದಗಳ ಚರ್ಚೆ ನಡೆಸುವರು. ಜೂ. 8ರಂದು ಅಮೆರಿಕ ಕಾಂಗ್ರೆಸ್‌ನ ಜಂಟಿ ಅಧಿವೇಶನಲ್ಲಿ ಭಾಷಣ ಮಾಡುವರು. ಬಳಿಕ ಅವರು ಮೆಕ್ಸಿಕೋಗೆ ಭೇಟಿ ನೀಡುವರು.
ಮಹತ್ವ ಯಾಕೆ?
ಅಫಘಾನಿಸ್ತಾನ: ಹೇರಾತ್‌ ಪ್ರಾಂತ್ಯದಲ್ಲಿ 75000 ಹೆಕ್ಟೇರ್‌ ಪ್ರದೇಶಕ್ಕೆ ನೀರುಣಿಸಬಲ್ಲ 1700 ಕೋಟಿ ರೂ. ವೆಚ್ಚದ ಅಣೆಕಟ್ಟು ಲೋಕಾರ್ಪಣೆ. ಇದನ್ನು ಭಾರತವೇ ಅಫಘಾನಿಸ್ತಾನ ಜತೆಗಿನ ಸಹಕಾರದ ಭಾಗವಾಗಿ ಕಟ್ಟಿದೆ.
ಕತಾರ್‌: ಭಾರತಕ್ಕೆ ಬೇಕಾಗುವ ಒಟ್ಟು ದ್ರವೀಕೃತ ನೈಸರ್ಗಿಕ ಅನಿಲ ಪ್ರಮಾಣದಲ್ಲಿ ಶೇ. 60ನ್ನು ಕತಾರ್‌ ಪೂರೈಸುತ್ತಿದೆ.
ಸ್ವಿಜರ್ಲೆಂಡ್‌: ಭಾರತದ ಐದನೇ ಅತಿದೊಡ್ಡ ವ್ಯಾಪಾರಿ ಪಾಲುದಾರ ದೇಶ. 11ನೇ ಅತಿದೊಡ್ಡ ಹೂಡಿಕೆದಾರ. ಕಪ್ಪು ಹಣದ ರಕ್ಷಕನೂ ಹೌದು.
ಮೆಕ್ಸಿಕೋ: 1986ರಲ್ಲಿ ರಾಜೀವ್‌ ಗಾಂಧಿ ಮೆಕ್ಸಿಕೋಗೆ ಹೋದ ಮೊದಲ ಭಾರತದ ಪ್ರಧಾನಿ. ಎನ್‌ಎಸ್‌ಜಿ ಗುಂಪು ಸೇರಲು ಮೆಕ್ಸಿಕೋ ಬೆಂಬಲ ಭಾರತಕ್ಕೆ ಅಗತ್ಯ.
ಹೊಸದಿಲ್ಲಿ: ದೇಶದ ವ್ಯಾಪಾರ, ಇಂಧನ ಮತ್ತು ಭದ್ರತಾ ಸಹಕಾರ ವಲಯವನ್ನು ವಿಸ್ತರಿಸುವ ಹಾಗೂ ಸಂಬಂಧಗಳಿಗೆ ಹೊಸ ಸ್ಪರ್ಶ ನೀಡುವ ಉದ್ದೇಶ ಹೊತ್ತ ಪ್ರಧಾನಿ ನರೇಂದ್ರ ಮೋದಿ ಅವರ ಪಂಚ ರಾಷ್ಟ್ರ-ಅಫಘಾನಿಸ್ತಾನ, ಕತಾರ್‌, ಸ್ವಿಜರ್ಲೆಂಡ್‌, ಅಮೆರಿಕ ಮತ್ತು ಮೆಕ್ಸಿಕೋ-ಪ್ರವಾಸ ಶುಕ್ರವಾರ ಆರಂಭವಾಗಲಿದೆ.