ಆದಾಯ ತೆರಿಗೆ ಇಲಾಖೆಯು ಟಿಡಿಎಸ್ ಸರ್ಟಿಫಿಕೇಟ್‌ಗಳನ್ನು ನೀಡಲು (ಫಾರ್ಮ್ 16 ಮತ್ತು 16 ಎ) ಕಾಲ ಮಿತಿ ನಿಗದಿಪಡಿಸಿದೆ. ವಿಳಂಬವಾದರೆ ಪ್ರತಿ ದಿನಕ್ಕೆ 100 ರೂ. ದಂಡವನ್ನೂ ಕೊಡಬೇಕಾಗುತ್ತದೆ. ಹಾಗೂ ದಂಡವು ಕಡಿತಗೊಳಿಸಿದ ತೆರಿಗೆಗಿಂತ ಜಾಸ್ತಿಯಾಗುವಂತಿಲ್ಲ ಎನ್ನುತ್ತಾರೆ ಇವೈ ಕಂಪನಿಯ ಪೀಪಲ್ ಅಡ್ವೈಸರಿ ಸರ್ವೀಸಸ್‌ನ ಪಾಲುದಾರರಾದ ಸೋನು ಐಯರ್.
ಉದ್ಯೋಗದಾತರು ಮೂಲದಲ್ಲಿಯೇ ತೆರಿಗೆ ಕಡಿತಗೊಳಿಸಿದ ನಂತರ ಉದ್ಯೋಗಿಗಳಿಗೆ ಟಿಡಿಎಸ್ ಸರ್ಟಿಫಿಕೇಟ್ ಕೊಡಬೇಕಾಗುತ್ತದೆ. ಬ್ಯಾಂಕ್‌ಗಳೂ ಠೇವಣಿದಾರರ ಠೇವಣಿಯ ಬಡ್ಡಿಗೆ ಸಂಬಂಧಿಸಿ ಟಿಡಿಎಸ್ ಕಡಿತದ ನಂತರ ಫಾರ್ಮ್ 16 ಎನಲ್ಲಿ ಟಿಡಿಎಸ್ ಸರ್ಟಿಫಿಕೇಟ್ ಅನ್ನು ಕೊಡಬೇಕು.
ಟಿಡಿಎಸ್ ಯಾಕೆ ?
ಆದಾಯ ತೆರಿಗೆ ಕಾನೂನು ಪ್ರಕಾರ ಪ್ರತಿಯೊಬ್ಬ ಉದ್ಯೋಗದಾತರೂ ತಮ್ಮ ಉದ್ಯೋಗಿಗಳ ಪರವಾಗಿ, ಉದ್ಯೋಗಿಗಳ ವೇತನದಲ್ಲಿ ತೆರಿಗೆ ಕಡಿತ ಮಾಡಬಹುದು. ಮಾಸಿಕ ಆಧಾರದಲ್ಲಿ ಇದು ನಡೆಯುತ್ತದೆ. ಇದೇ ವೇಳೆ ಉದ್ಯೋಗಿ ಕೂಡ ತೆರಿಗೆ ಕಡಿತಕ್ಕೆ ಅರ್ಹವೆನಿಸಬಲ್ಲ ಹೂಡಿಕೆಗಳ ವಿವರಗಳನ್ನು ಉದ್ಯೋಗದಾತರಿಗೆ ನೀಡಬೇಕು. ಇತರ ಆದಾಯ ಮೂಲಗಳ ವಿವರಗಳನ್ನೂ ಸಲ್ಲಿಸಬೇಕು. ಮತ್ತೊಂದು ಕಡೆ ಬ್ಯಾಂಕ್‌ಗಳು, ಸಹಕಾರಿ ಸೊಸೈಟಿಗಳು, ಕಂಪನಿಗಳು ವಾಣಿಜ್ಯೋದ್ದೇಶದ ಪೇಮೆಂಟ್‌ಗಳಲ್ಲಿ ತೆರಿಗೆಯನ್ನು ಆದಾಯ ತೆರಿಗೆ ಕಾನೂನು ಪ್ರಕಾರ ಕಡಿತಗೊಳಿಸುತ್ತವೆ. ಹೀಗೆ ಮೂಲದಲ್ಲಿಯೇ ತೆರಿಗೆ ಕಡಿತ ಮಾಡುವವರು ಅದರ ವಿವರಗಳನ್ನು ಟಿಡಿಎಸ್ ಸರ್ಟಿಫಿಕೇಟ್ ನೀಡುವ ಮೂಲಕ ಒದಗಿಸಬೇಕು.
ಹೊಸದಿಲ್ಲಿ: ತೆರಿಗೆದಾರರು ತಮ್ಮ ಟಿಡಿಎಸ್ ಸರ್ಟಿಫಿಕೇಟ್‌ಗಳನ್ನು ಇದೀಗ ಪಡೆಯಲು ಸಕಾಲ. ಎಲ್ಲ ವಿಧದ ಟಿಡಿಎಸ್ ಪ್ರಕ್ರಿಯೆಗಳನ್ನು ಮುಕ್ತಾಯಗೊಳಿಸಲು ಕೊನೆಯ ದಿನಾಂಕ ಮೇ 31 ಆಗಿತ್ತು. ಅಂದರೆ 2016 ಜೂನ್ 1ರಿಂದ ತೆರಿಗೆದಾರರು ತಮ್ಮ ಟಿಡಿಎಸ್ ಸರ್ಟಿಫಿಕೇಟ್‌ಗಳನ್ನು ಪಡೆಯಬಹುದು. ತೆರಿಗೆದಾರರಿಗೆ ಟಿಡಿಎಸ್ ಸರ್ಟಿಫಿಕೇಟ್ ಅನ್ನು ಕಡ್ಡಾಯವಾಗಿ ಕೊಡಬೇಕಾಗುತ್ತದೆ.
