ಎಕನಾಮಿಕ್‌ ಟೈಮ್ಸ್‌ ಹೊಸದಿಲ್ಲಿ ಆಹಾರ ಪದಾರ್ಥಗಳ ದರ ಏರುಮುಖವಾಗುವುದು ಹೊಸತೇನಲ್ಲವಾದರೂ, ಕಳೆದ ಒಂದು ತಿಂಗಳಲ್ಲಿ ಈ ಪ್ರಮಾಣ ಶೇ.20ರ ತನಕ ಹೆಚ್ಚಳವಾಗಿದೆ. ಅಕ್ಟೋಬರ್‌-ನವೆಂಬರ್‌ನಲ್ಲಿ ಹೊಸ ಬೆಳೆಗಳು ಬರುವ ತನಕ ಪರಿಸ್ಥಿತಿ ಹೀಗೆಯೇ ಇರುವ ಸಾಧ್ಯತೆ ಇದೆ ಎಂದು ತಜ್ಞರು ಅಂದಾಜು ಮಾಡಿದ್ದಾರೆ. ಧವಸ ಧಾನ್ಯಗಳು, ಬೇಳೆಕಾಳು, ಟೀ, ಮೀನು ಮತ್ತು ಕೋಳಿಯ(ಚಿಕನ್‌) ಸಗಟು ದರಗಳು ಕಳೆದ ಒಂದು ತಿಂಗಳಲ್ಲಿ ಶೇ.8ರಿಂದ 20ರಷ್ಟು ಏರಿಕೆಯಾಗಿವೆ. ಇದು ಸಹಜವಾಗಿ ಚಿಲ್ಲರೆ ದರಗಳ ಮೇಲೂ ಪರಿಣಾಮವಾಗಿದ್ದು ಗ್ರಾಹಕರ ಜೇಬುಗಳು ಹಗುರಾಗಿವೆ. ಸಗಟು ದರ ಸೂಚ್ಯಂಕವು ಏಪ್ರಿಲ್‌ನಲ್ಲಿ ಶೇ.4.23ರಷ್ಟು ಹೆಚ್ಚಳವಾಗಿದೆ. ಆಹಾರ ಹಣದುಬ್ಬರವನ್ನು ನಿಯಂತ್ರಿಸಲು ಸರಕಾರ ಮುಂದಾಗದಿದ್ದರೆ, ಮುಂದಿನ ಕೆಲವು ತಿಂಗಳು ಇದೇ ಪರಿಸ್ಥಿತಿ ಮುಂದುವರಿಯಲಿದೆ ಎಂದು ವಿತ್ತ ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ. ಗೋಧಿ ಮತ್ತು ಸಕ್ಕರೆ ಮೇಲಿನ ಆಮದು ಸುಂಕವನ್ನು ಸರಕಾರ ತೆರವುಗೊಳಿಸಿದರೆ ಆಹಾರ ಹಣದುಬ್ಬರ ನಿಯಂತ್ರಣಕ್ಕೆ ಬರುತ್ತದೆ. ಮಧ್ಯಪ್ರದೇಶ, ಉತ್ತರಪ್ರದೇಶ, ರಾಜಸ್ಥಾನದಲ್ಲಿ ಗೋಧಿ ಇಳುವರಿಯು ಸರಕಾರದ ಲೆಕ್ಕಾಚಾರಕ್ಕಿಂತಲೂ ಕಡಿಮೆ ಇರಲಿದೆ ಎಂದೂ ತಜ್ಞರು ಹೇಳಿದ್ದಾರೆ. ''ಗೋಧಿಯ ಸಗಟು ದರಗಳು ಕಳೆದ ಒಂದು ತಿಂಗಳಲ್ಲಿ ಶೇ.10ರಷ್ಟು ಹೆಚ್ಚಳವಾಗಿದ್ದು, ಆಮದು ಸುಂಕದಿಂದ ವಿನಾಯಿತಿ ನೀಡದೇ ಹೋದರೆ, ದರಗಳು ಕ್ವಿಂಟಾಲ್‌ಗೆ 200ರಿಂದ 300 ರೂಪಾಯಿ ಜಾಸ್ತಿಯಾಗಲಿದೆ,'' ಎಂದು ಮಧ್ಯಪ್ರದೇಶದ ಗೋಧಿ ವ್ಯಾಪಾರಿ ಪ್ರಿವೇಶ್‌ ಹೇಳಿದ್ದಾರೆ.
↧
ಅಹಾರ ಪದಾರ್ಥಗಳ ದರ ಶೇ.20ರಷ್ಟು ಹೆಚ್ಚಳ
↧