ಬ್ರಿಟನ್ ವೀಸಾ ಶುಲ್ಕ ಹೆಚ್ಚಳ

* ಮಾ.18ರಿಂದ ವೀಸಾ ಶುಲ್ಕ ಹೆಚ್ಚಳ

* ಭಾರತೀಯ ಸಮುದಾಯದ ಮೇಲೆ ನೇರ ಪರಿಣಾಮ

ಲಂಡನ್ : ಮಾ.18ರಿಂದ ಅನ್ವಯವಾಗುವಂತೆ ವೀಸಾ ಶುಲ್ಕ ಹೆಚ್ಚಳ ಮಾಡಲು ಬ್ರಿಟನ್ ಸರಕಾರ ಸಜ್ಜಾಗಿದೆ. ಇದು ಭಾರತೀಯರ ಮೇಲೆ ನಕಾರಾತ್ಮಕ ಪರಿಣಾಮ ಬೀರಲಿದೆ.

ಕಳೆದ ವರ್ಷ ಬ್ರಿಟನ್‌ಗೆ ತೆರಳಲು ಹೆಚ್ಚಿನ ವೀಸಾ ಪಡೆದ ನಾನಾ ದೇಶಗಳ ನಾಗರಿಕರ ಪೈಕಿ ಭಾರತೀಯರ ಸಂಖ್ಯೆಯೇ ಹೆಚ್ಚು. ಕೆಲಸ ಮತ್ತು ಅಲ್ಲಿ ನೆಲೆಸುವುದಕ್ಕಾಗಿ ಹೆಚ್ಚಿನ ಭಾರತೀಯರು ಬ್ರಿಟನ್‌ಗೆ ತೆರಳಿದ್ದಾರೆ.

ವೀಸಾ ಶುಲ್ಕವನ್ನು ಹೆಚ್ಚಳ ಮಾಡುವ ಸಂಬಂಧ ಜನವರಿಯಲ್ಲಿ ಪ್ರಸ್ತಾಪಗಳು ಕೇಳಿಬಂದಿದ್ದವು. ಅಲ್ಪಾವಧಿಯ ವಿಸಿಟರ್ ವೀಸಾಗಳು, ಕೆಲಸ ಅಥವಾ ವಿದ್ಯಾಭ್ಯಾಸದ ವೀಸಾಗಳ ಶುಲ್ಕ ಶೇ.2ರಷ್ಟು ಹೆಚ್ಚಳವಾಗಲಿದೆ. ಅಲ್ಲದೇ ಬ್ರಿಟನ್‌ನಲ್ಲಿ ನೆಲೆಸುವ ಕುರಿತಾದ ವೀಸಾ ಶುಲ್ಕವು ಶೇ.25ರಷ್ಟು ಏರಿಕೆಯಾಗಲಿದೆ.

''ವೀಸಾ ಶುಲ್ಕಗಳ ಹೆಚ್ಚಳದಿಂದ ಬ್ರಿಟನ್‌ನ ತೆರಿಗೆದಾರರ ಮೇಲಿನ ಹೊರೆ ಇಳಿಕೆಯಾಗಲಿದೆ. ಶುಲ್ಕ ಹೆಚ್ಚಳವಾದರೂ ಮೊದಲಿನಂತೆಯೇ ಸ್ಪರ್ಧಾತ್ಮಕ ಮಟ್ಟದಲ್ಲಿ ಸೇವೆಗಳು ಮುಂದುವರಿಯಲಿವೆ,'' ಎಂದು ಗೃಹ ಕಚೇರಿ ಪ್ರಕಟಣೆ ತಿಳಿಸಿದೆ.

ರಾಷ್ಟ್ರೀಯ ಅಂಕಿಅಂಶ ಕಾರ್ಯಾಲಯದ ಮಾಹಿತಿ ಪ್ರಕಾರ - 2015ರಲ್ಲಿ 92,062 ವಿದೇಶಿಯರು ಬ್ರಿಟನ್ ವೀಸಾ ಪಡೆದಿದ್ದಾರೆ. ಈ ಪೈಕಿ ಭಾರತೀಯ ಸಮುದಾಯ ದೊಡ್ಡ ಪ್ರಮಾಣದಲ್ಲಿದೆ. ಶೇ.57ರಷ್ಟು, ಅಂದರೆ 52,360 ಭಾರತೀಯ ನಾಗರಿಕರು ಬ್ರಿಟನ್‌ಗೆ ತೆರಳಲು ವೀಸಾ ಪಡೆದಿದ್ದರು. ಭಾರತ ಬಿಟ್ಟರೆ ಎರಡನೇ ಸ್ಥಾನದಲ್ಲಿ ಅಮೆರಿಕ ನಿಂತಿದೆ. ಇಲ್ಲಿನ ಶೇ.11 ಅಂದರೆ 10,130 ಮಂದಿ ಬ್ರಿಟನ್‌ಗೆ ವಲಸೆ ಹೋಗಿದ್ದಾರೆ.