ವಿಶ್ವಸಂಸ್ಥೆ ತೀರ್ಪು ಹೊರಬಂದ ನಂತರ ಈಕ್ವೆಡಾರ್ ಎಂಬೆಸಿ ಒಳಗಿಂದಲೇ ಸ್ಕೈಪ್ ಮೂಲಕ ಸುದ್ದಿಗೋಷ್ಠಿ ನಡೆಸಿದ ಅಸಾಂಜ್,''ಇದು ಮಹತ್ತರ ವಿಜಯ. ತೀರ್ಪನ್ನು ಪಾಲಿಸುವುದು ಬ್ರಿಟನ್ ಮತ್ತು ಸ್ವೀಡನ್ ಸರಕಾರಗಳ ಹೊಣೆ,'' ಎಂದು ಪ್ರತಿಕ್ರಿಯಿಸಿದರು.
ಈಕ್ವೆಡಾರ್ ಎಂಬೆಸಿಯಲ್ಲಿ ಬಂಧಿತನಾಗಿರುವ ಜೂಲಿಯನ್ ಅಸಾಂಜ್ ಮುಕ್ತವಾಗಿ ಓಡಾಡಿಕೊಂಡಿರಲು ಬಿಡಬೇಕು ಮತ್ತು ಮೂರು ವರ್ಷಗಳ ಯಾತನೆಗೆ ಪರಿಹಾರ ಕಟ್ಟಿಕೊಡಬೇಕು ಎಂದು ವಿಶ್ವಸಂಸ್ಥೆಯ ಸಮಿತಿ ಶುಕ್ರವಾರ ತೀರ್ಪು ಪ್ರಕಟಿಸಿತು.
ಶುಕ್ರವಾರ 'ಕಟ್ಟುಪಾಡುಗಳಿಲ್ಲದ ತೀರ್ಪು' ಪ್ರಕಟಿಸಿದ ವಿಶ್ವಸಂಸ್ಥೆಯ ಸಮಿತಿ, ಅಸಾಂಜ್ ಕಟ್ಟಡದಲ್ಲಿ ಬಂಧಿತನಾಗುವಂತೆ ಮಾಡಿರುವುದು ಅಕ್ರಮ ಎಂದು ಘೋಷಿಸಿದೆ. ಅಲ್ಲದೆ ಆತನಿಗಾಗಿರುವ ಅನ್ಯಾಯಕ್ಕೆ ನಷ್ಟತುಂಬಿಕೊಡಬೇಕು ಎಂದೂ ಆದೇಶಿಸಿದೆ. ಸಮಿತಿಯಲ್ಲಿದ್ದ ಐವರು ಸದಸ್ಯರಲ್ಲಿ ಮೂವರು ಅಸಾಂಜ್ ಪರ ತೀರ್ಪು ನೀಡಿದ್ದಾರೆ. ''ಅಕ್ರಮವಾಗಿ ವಶದಲ್ಲಿರುವವರ ಕುರಿತ ಕ್ರಿಯಾ ಸಮಿತಿ, ಅಸಾಂಜ್ ಅವರ ಸ್ವಾಂತಂತ್ರ್ಯ ಹರಣವನ್ನು ಅಕ್ರಮ ವಶ ಎಂದು ಪರಿಗಣಿಸುತ್ತದೆ,'' ಎಂದು ಸಮಿತಿಯ ಅಧ್ಯಕ್ಷ ಸಿಯೋಂಗ್-ಪಿಲ್ ಹೊಂಗ್ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.
''ಅಸಾಂಜ್ ಅಕ್ರಮ ಬಂಧನ ಕೊನೆಯಾಗಬೇಕು. ಮುಕ್ತವಾಗಿ ತಿರುಗಾಡುವ ಆತರ ಸ್ವಾತಂತ್ರ್ಯವನ್ನು ಗೌರವಿಸಬೇಕು. ಅಲ್ಲದೆ ಬಲವಂತದ ಬಂಧನಕ್ಕೊಳಗಾದ ಅವರು ಪರಿಹಾರಕ್ಕೆ ಯೋಗ್ಯರಾಗಿದ್ದಾರೆ,'' ಎಂದು ಪ್ರಕಟಣೆ ತಿಳಿಸಿದೆ.
ತೀರ್ಪಿನಿಂದ ಏನೂ ಪ್ರಯೋಜನವಿಲ್ಲ
ವಿಶ್ವಸಂಸ್ಥೆ ತೀರ್ಪನ್ನು ಅಲ್ಲಗಳೆದಿರುವ ಸ್ವೀಡನ್ ಮತ್ತು ಬ್ರಿಟನ್, ಈ ತೀರ್ಪಿನಿಂದ ಏನೂ ಪ್ರಯೋಜನವಿಲ್ಲ ಎಂದಿವೆ. ತೀರ್ಪನ್ನು ''ಹಾಸ್ಯಾಸ್ಪದ'' ಎಂದು ಮೂದಲಿಸಿರುವ ಬ್ರಿಟೀಷ್ ವಿದೇಶಾಂಗ ಕಾರ್ಯದರ್ಶಿ, ''ಕ್ರಿಯಾ ಸಮಿತಿ ತೀರ್ಪು ನಿಜವಾಗಿಯೂ ಹಾಸ್ಯಾಸ್ಪದ. ನಾವಿದನ್ನು ತಿರಸ್ಕರಿಸುತ್ತೇವೆ,'' ಎಂದು ಹೇಳಿದ್ದಾರೆ. ವಿಶ್ವಸಂಸ್ಥೆ ''ಮೂಗು ತೂರಿಸುತ್ತಿದೆ'' ಎಂದು ಸ್ವೀಡನ್ ವಿದೇಶಾಂಗ ಸಚಿವಾಲಯ ದೂರಿದೆ.
''ನಾವು ಈ ವಿಚಾರದಲ್ಲಿ ಸ್ಪಷ್ಟಪಡಿಸಿದ್ದೇವೆ. ಅಸಾಂಜ್ ಅವರನ್ನು ಇಂಗ್ಲೆಂಡ್ ಅಕ್ರಮವಾಗಿ ಬಂಧಿಸಿಲ್ಲ. ಕಾನೂನು ಹಿಡಿತ ತಪ್ಪಿಸಿಕೊಳ್ಳಲು ಅವರೇ ಸ್ವ ಇಚ್ಛೆಯಿಂದ ಈಕ್ವೆಡಾರ್ ಎಂಬೆಸಿ ಕಟ್ಟಡದೊಳಗೆ ಅಡಗಿರಲು ಬಯಸಿದ್ದಾರೆ,'' ಎಂದು ಬ್ರಿಟೀಷ್ ಸರಕಾರದ ವಕ್ತಾರರು ಹೇಳಿದ್ದಾರೆ.
ಮತ್ತೊಂದೆಡೆ, ''ವಿಶ್ವಸಂಸ್ಥೆ ಸಮಿತಿಯ ತೀರ್ಪು ಅತ್ಯಾಚಾರ ಪ್ರಕರಣದ ತನಿಖೆ ಮೇಲೆ ಯಾವ ಪರಿಣಾಮವನ್ನೂ ಉಂಟುಮಾಡುವುದಿಲ್ಲ,'' ಎಂದು ಸ್ವೀಡನ್ ಅಧಿಕಾರಿಗಳು ಸ್ಪಷ್ಟವಾಗಿ ಹೇಳಿದ್ದಾರೆ.
ಅಮೆರಿಕವೂ ಈ ತೀರ್ಪಿನ ಕುರಿತು ಪ್ರತಿಕ್ರಿಯೆ ನೀಡಿದ್ದು, ''ವಿಶ್ವಸಂಸ್ಥೆ ಸಮಿತಿ ನೀಡಿರುವ ತೀರ್ಪು ಯಾವ ರೀತಿ ಪರಿಣಾಮ ಬೀರುತ್ತದೆ ಎನ್ನುವುದು ಸ್ಪಷ್ಟವಿಲ್ಲ,'' ಎಂದು ಶ್ವೇತಭವನದ ವಕ್ತಾರರು ಹೇಳಿದ್ದಾರೆ.
ತೀರ್ಪು ಬಂದಾಯ್ತು; ಮುಂದೇನು?
ವಿಶ್ವಸಂಸ್ಥೆಯ ಸಮಿತಿಯ ಅಸಾಂಜ್ ಗೃಹಬಂಧನ ಅಕ್ರಮ ಎಂದು ತೀರ್ಪು ನೀಡಿದೆ. ಸದ್ಯದಲ್ಲೆ ಅಸಾಂಜ್ ಕಟ್ಟಡದಿಂದ ಹೊರಬಹುದು ಎಂದು ಎಲ್ಲರೂ ನಿರೀಕ್ಷಿಸಿದ್ದಾರೆ. ಆದರೆ ಪರಿಸ್ಥಿತಿ ಅಷ್ಟು ಸುಲಭವಿಲ್ಲ. ವಿಶ್ವಸಂಸ್ಥೆಯ ಸಮಿತಿ ನೀಡಿರುವ ತೀರ್ಪನ್ನು ಇಂಗ್ಲೆಂಡ್ ಮತ್ತು ಸ್ವೀಡನ್ ಪಾಲಿಸಲೇಬೇಕು ಎಂಬ ನಿಯಮವಿಲ್ಲ. ಈ ತೀರ್ಪು ಏನಿದ್ದರೂ ಅಸಾಂಜ್‌ಗೆ ನೈತಿಕ ಸ್ಥೈರ್ಯ ತುಂಬಬಹುದು ಅಷ್ಟೆ. ಈ ಸಮಿತಿಯ ತೀರ್ಪು ಉಲ್ಲಂಘಿಸಿದ ಇತಿಹಾಸವೇ ನಮ್ಮ ಮುಂದಿದೆ. ಮ್ಯಾನ್ಮಾರ್‌ನ ಔನ್ ಸಾನ್ ಸೂಚಿ ಅವರ ಗೃಹಬಂಧನ ಅಕ್ರಮ ಎಂದು ಸಮಿತಿ ತೀರ್ಪು ನೀಡಿದರೂ ಅಲ್ಲಿನ ಸರಕಾರ ಅವರನ್ನು ಹೊರಬಿಡಲಿಲ್ಲ. ಹೀಗಾಗಿ ಅಸಾಂಜ್ ಬಂಧನ ತಪ್ಪುತ್ತದೆ ಎಂದು ಹೇಳಲು ಬರುವುದಿಲ್ಲ. ಯಾಕೆಂದರೆ, ತೀರ್ಪು ಏನೇ ಇದ್ದರೂ ಅಸಾಂಜ್ ಅವರ ಮೇಲಿರುವ ಪ್ರಕರಣಗಳನ್ನು ಕೈಬಿಡುವುದಿಲ್ಲ ಎಂದು ಸ್ವೀಡನ್ ಪ್ರಕಟಿಸಿದೆ. ಈ ತೀರ್ಪಿನಿಂದ ಏನೂ ಪ್ರಯೋಜವಿಲ್ಲ ಎಂದು ಇಂಗ್ಲೆಂಡ್ ಈಗಾಗಲೇ ಹೇಳಿಬಿಟ್ಟಿದೆ. ಅಲ್ಲದೆ ಅಸಾಂಜ್ ಹೊರಬಂದರೆ ಬಂಧಿಸಿ ಎಂದು ಲಂಡನ್ ಪೊಲೀಸರಿಗೆ ಬ್ರಿಟನ್ ಸರಕಾರ ಸೂಚನೆ ಇದೆ ಎಂದು ವರದಿಯಾಗಿದೆ. ಒಟ್ಟಾರೆ ಅಸಾಂಜ್ ಪ್ರಕರಣದಲ್ಲಿ ಮುಂದೇನು ಎನ್ನುವುದು ಸದ್ಯಕ್ಕಂತೂ ಸ್ಪಷ್ಟವಿಲ್ಲ.
---
ನನ್ನ ಕಕ್ಷಿದಾರಳಿಗೆ ಮಾಡಿದ ಅವಮಾನ
ವಿಶ್ವಸಂಸ್ಥೆ ತೀರ್ಪು ತಮ್ಮ ಕಕ್ಷಿದಾರಳಿಗೆ ಅಮಾನ ಮಾಡಿದಂತೆ ಎಂದು ಅಸಾಂಜ್ ಮೇಲೆ ಅತ್ಯಾಚಾರ ಪ್ರಕರಣ ದಾಖಲಿಸಿರುವ ಮಹಿಳೆಯ ಪರ ಲಾಯರ್ ಎಲಿಜೆಬೆತ್ ಫ್ರಿಟ್ಜ್ ಹೇಳಿದ್ದಾರೆ. ''ಅತ್ಯಾಚಾರ ಪ್ರಕರಣದಲ್ಲಿ ಅರೆಸ್ಟ್ ವಾರಂಟ್ ಎದುರಿಸುತ್ತಿರುವ ವ್ಯಕ್ತಿಗೆ ಪರಿಹಾರ ನೀಡಬೇಕು. ಐದು ವರ್ಷಗಳಿಗೂ ಹೆಚ್ಚು ಕಾಲ ನ್ಯಾಯ ವ್ಯವಸ್ಥೆಯ ಕಣ್ಣಿಗೆ ಮಣ್ಣೆರಚುತ್ತಿರುವುದು ನನ್ನ ಕಕ್ಷಿದಾರಳಿಗೆ ಮಾಡಿದ ಅವಮಾನ. ಅಷ್ಟು ಮಾತ್ರವಲ್ಲ ಇದೇ ರೀತಿಯ ಎಲ್ಲ ಸಂತ್ರಸ್ತರಿಗೂ ಮಾಡುವ ಅವಮಾನ,'' ಎಂದಿದ್ದಾರೆ.
---
ಬೆಂಬಲಿಗರ ಹೀರೋ
ಬೆಂಬಲಿಗರಿಗೆ ಅಸಾಂಜ್ ಹೀರೋ. ಸರಕಾರಗಳಿಗೆ ಇವರು ಅಪಾಯಕಾರಿ. ಸರಕಾರದ ರಹಸ್ಯಗಳನ್ನು ಕದ್ದು ಬಟಾಬಯಲು ಮಾಡಬಲ್ಲ ಹ್ಯಾಕರ್.್ ಇವರ ಅಭಿಮಾನಿಗಳಲ್ಲಿ ಫ್ಯಾಷನ್ ಡಿಸೈನರ್ ವಿವಿನ್ ವೆಸ್ಟ್‌ವುಡ್, ಸಿಂಗರ್ ಲೇಡಿ ಗಾಗ ಕೂಡ ಸೇರಿದ್ದಾರೆ. ''ಫಿಫ್ತ್ ಎಸ್ಟೇಟ್'' ಸೇರಿದಂತೆ ಅಸಾಂಜ್ ಬದುಕಿನ ಕುರಿತು ಎರಡು ಚಿತ್ರಗಳು ತೆರೆ ಕಂಡಿವೆ.
100 ಕೋಟಿ ರೂ ಖರ್ಚು
ಅಸಾಂಜ್ ಈಕ್ವೆಡಾರ ಎಂಬೆಸಿ ಕಟ್ಟಡದೊಳಗೆ ಓದಾಗಿನಿಂದ ಬ್ರಿಟನ್ ದಿನದ 24 ಗಂಟೆ ಪೊಲೀಸರನ್ನು ಕಾವಲಿಗಿಟ್ಟಿದೆ. ಅವನು ಒಂದೊಮ್ಮೆ ಕಟ್ಟಡದ ಹೊರಗೆ ಹೆಜ್ಜೆ ಇಟ್ಟರೆ ಕೂಡಲೇ ಬಂಧಿಸಲು ಈ ಕ್ರಮ. ಇದಕ್ಕಾಗಿ ಬ್ರಟನ್ ಮೂರು ವರ್ಷಗಳಲ್ಲಿ ಸುಮಾರು 100 ಕೋಟಿ ರೂ.ಗಳಿಗೂ ಹೆಚ್ಚು ಹಣ ವ್ಯಯಿಸಿದೆ.
ಪುಟ್ಟ ರೂಮಲ್ಲೇ ಮೂರು ವರ್ಷ ವಾಸ
ಈಕ್ವೆಡಾರ್ ಎಂಬೆಸಿ ಕಟ್ಟಡದೊಳಗೆ ಅಸಾಂಜ್‌ಗೆ ಸಿಕ್ಕಿರುವುದು ಒಂದು ಪ್ಟುಟ ರೂಂ ಮಾತ್ರ. ಅದರಲ್ಲಿ ಒಂದು ಕಂಪ್ಯೂಟರ್, ಟೇಬಲ್, ಬೆಡ್, ಬೆಡ್ ಲ್ಯಾಂಪ್ ಮಾತ್ರ. ಇನ್ನು ಹೊರಗೆಲ್ಲೂ ತಿರುಗಾಡಲು ಅವಕಾಶ ಇಲ್ಲದ ಇವರಿಗೆ ವ್ಯಾಯಾಮ ಮಾಡಲು ಒಂದು ಟ್ರೆಡ್ ಮಿಲ್ ಒದಗಿಸಲಾಗಿದೆ. ಬಿಸಿಲಿಗೆ ಮೈಯೊಡ್ಡಲು ಆತನಿಗಿರುವುದು ಒಂದೇ ಒಂದು ಪುಟ್ಟ ಬಾಲ್ಕನಿ.
ಲಂಡನ್/ಜಿನೀವಾ : ವಿಕಿಲೀಕ್ಸ್ ಸಂಸ್ಥಾಪಕ, ಸೊಲ್ಲಿಗ ಜೂಲಿಯನ್ ಅಸಾಂಜ್ ಗೃಹ ಬಂಧನ ಅಕ್ರಮ, ಅಕ್ರಮ ಬಂಧನಕ್ಕೆ ಸಂಬಂಧಿಸಿದ ದೇಶಗಳು ಪರಿಹಾರ ತುಂಬಿಕೊಡಬೇಕು ಎಂದು ವಿಶ್ವಸಂಸ್ಥೆ ಆಯೋಗ ತೀರ್ಪು ನೀಡಿದೆ. ತೀರ್ಪು ಹೊರಬಿದ್ದ ಬೆನ್ನಿಗೆ ರಾಯಭಾರ ಕಚೇರಿಯಿಂದ ಹೊರಹೋಗಲು ಬ್ರಿಟನ್ ಮತ್ತು ಸ್ವೀಡನ್ ಅವಕಾಶ ನೀಡಬೇಕು ಎಂದು ಅಸಾಂಜ್ ಆಗ್ರಹಿಸಿದ್ದಾರೆ.
