ಜೋಧಪುರದ ಜೈನಾರಾಯಣ ವ್ಯಾಸ್‌ ವಿಶ್ವವಿದ್ಯಾಲಯದ ಭೂ ವಿಜ್ಞಾನಿಗಳ ತಂಡ, ಸುಮಾರು 15 ಕೋಟಿ ವರ್ಷಗಳ ಹಿಂದಿನ ಡೈನೋಸಾರ್‌ಗಳ ಪಾದದ ಗುರುತು ಪತ್ತೆ ಮಾಡಿದೆ. ಮಾಂಸಾಹಾರಿಗಳಾದ ಈ ಡೈನೋಸಾರ್‌ಗಳು 1-3 ಮೀಟರ್‌ ಎತ್ತರವಿದ್ದು, ಕಡಲ ಕಿನಾರೆಯಲ್ಲಿ ವಾಸವಿದ್ದವು ಎಂದು ಹೇಳಲಾಗಿದೆ.
ಡೈನೋಸಾರ್‌ಗಳ ಪಳಿಯುಳಿಕೆಗಳು ಫ್ರಾನ್ಸ್‌, ಪೊಲೆಂಡ್‌, ಸ್ಲೊವಾಕಿಯಾ, ಇಟಲಿ, ಸ್ಪೇನ್‌, ಸ್ವೀಡನ್‌, ಆಸ್ಟ್ರೇಲಿಯಾ ಹಾಗೂ ಅಮೆರಿಕ ಸೇರಿದಂತೆ ವಿಶ್ವಾದ್ಯಂತ ಪತ್ತೆ ಆಗಿವೆ. ಡೈನೋಸಾರ್‌ಗಳ ಮೊಟ್ಟೆ, ಎಲುಬು, ಹಲ್ಲುಗಳು ಭಾರತದಲ್ಲಿ ಈಗಾಗಲೇ ಪತ್ತೆಯಾಗಿದ್ದವು. ಈಗ ಮೊದಲ ಬಾರಿಗೆ ಅವುಗಳ ಹೆಜ್ಜೆ ಗುರುತು ಪತ್ತೆಯಾಗಿದೆ.
'ಈ ಡೈನೋಸಾರ್‌ಗಳ ಹೆಜ್ಜೆ ಗುರುತು 30 ಸೆಂ.ಮೀ. ಉದ್ದವಿದೆ. ಇದನ್ನು ಆಧರಿಸಿ ಅದರ ದೇಹದ ಎತ್ತರ 1-3 ಮೀಟರ್‌ ಹಾಗೂ 5-7 ಮೀಟರ್‌ ಅಗಲ ಇರಬಹುದು ಎಂದು ಅಂದಾಜಿಸಲಾಗಿದೆ,'ಎಂದು ಭೂವಿಜ್ಞಾನಿ ಡಾ.ವಿರೇಂದ್ರ ಸಿಂಗ್‌ ಪರಿಹಾರ್‌ ಹೇಳಿದ್ದಾರೆ.
'ಡೈನೋಸಾರ್‌ಗಳು ಕಡಲ ತೀರದಲ್ಲಿ ವಾಸಿಸುತ್ತಿದ್ದವು, ಈ ಬಗ್ಗೆ ಮತ್ತಷ್ಟು ಅಧ್ಯಯನಗಳು ಆಗಬೇಕಿವೆ,' ಎಂದು ಜೆಎನ್‌ವಿ ವಿಶ್ವವಿದ್ಯಾಲಯದ ಭೂವಿಜ್ಞಾನಿ ವಿಭಾಗದ ಮಾಜಿ ಮುಖ್ಯಸ್ಥ ಎಸ್‌.ಸಿ ಮಾಥುರ್‌ ಹೇಳಿದ್ದಾರೆ.
ಜೈಸಲ್ಮೇರ್‌: ಜೈಸಲ್ಮೇರ್‌ ಜಿಲ್ಲೆಯ ತೈಯಾಟ್‌ ಪ್ರದೇಶದಲ್ಲಿ ಡೈನೋಸಾರ್‌ಗಳ ಪಾದದ ಗುರುತುಗಳು ಪತ್ತೆಯಾಗಿವೆ.
