ಬಂಡವಾಳ ಸರಕು ನೀತಿಗೆ ಗ್ರೀನ್‌ ಸಿಗ್ನಲ್‌

2025ರ ಹೊತ್ತಿಗೆ 2 ಕೋಟಿ ಉದ್ಯೋಗ ಸೃಷ್ಟಿಸುವ ಗುರಿ

ಹೊಸದಿಲ್ಲಿ: ದೇಶದ ಉತ್ಪಾದನಾ ಕ್ಷೇತ್ರ ಮತ್ತು ಸರಕು ವಲಯವನ್ನು ಉತ್ತೇಜಿಸಿ, 2025ರ ಹೊತ್ತಿಗೆ 2.1 ಕೋಟಿ ಹೊಸ ಉದ್ಯೋಗ ಸೃಷ್ಟಿಸುವ ಗುರಿ ಹೊಂದಿರುವ ನೂತನ 'ಬಂಡವಾಳ ಸರಕು ನೀತಿ'ಗೆ ಕೇಂದ್ರ ಸರಕಾರವು ಹಸಿರುನಿಶಾನೆ ತೋರಿಸಿದೆ.

ಪ್ರಧಾನಿ ನರೇಂದ್ರ ಮೋದಿ ನೇತೃತ್ವದಲ್ಲಿ ಬುಧವಾರ ನಡೆದ ಸಂಪುಟ ಸಭೆಯು ಸರಕು ನೀತಿಗೆ ಅನುಮೋದನೆ ನೀಡಿತು. ''ಮೇಕ್‌ ಇನ್‌ ಇಂಡಿಯಾ ಯೋಜನೆಗೆ ಪೂರಕವಾಗಿ ಉತ್ಪಾದನಾ ಕ್ಷೇತ್ರಕ್ಕೆ ಉತ್ತೇಜನ ನೀಡುವ ಸರಕು ನೀತಿಯು ದೇಶದಲ್ಲಿ ಉದ್ಯೋಗ ಸೃಷ್ಟಿಗೆ ನೆರವಾಗಲಿದೆ. ವಿಶ್ವದಲ್ಲಿ ಬಂಡವಾಳ ಸರಕುಗಳು ನೆಲೆಯಾಗಿ ಭಾರತ ರೂಪುಗೊಳ್ಳಲು ಸಹಾಯಕವಾಗಲಿದೆ,'' ಎಂದು ಸರಕಾರ ಹೇಳಿದೆ.

ಬಂಡವಾಳ ಸರಕುಗಳ ವಲಯಕ್ಕೆ ಸಂಬಂಧಿಸಿದಂತೆ ಇದು ಮೋದಿ ಸರಕಾರದ ಮೊದಲ ನೀತಿಯಾಗಿದ್ದು, ಇದರಿಂದ ಬಂಡವಾಳ ಸರಕುಗಳ ಉತ್ಪಾದನೆ 2,30,000 ಕೋಟಿ ರೂ.ಗಳಿಂದ(2014-15ನೇ ಸಾಲಿನಲ್ಲಿನ ಪ್ರಮಾಣ) 7,50,000 ಕೋಟಿ ರೂ.ಗಳಿಗೆ 2025ರ ಹೊತ್ತಿಗೆ ಏರಿಕೆಯಾಗಲಿದೆ. ಉದ್ಯೋಗಗಳು ಈಗಿನ 84 ಲಕ್ಷದಿಂದ 3 ಕೋಟಿಗೆ ವೃದ್ಧಿಯಾಗಲಿವೆ ಎನ್ನುವ ನಿರೀಕ್ಷೆಯನ್ನು ಕೇಂದ್ರ ಸರಕಾರ ಹೊಂದಿದೆ.

ಒಟ್ಟಾರೆ ಉತ್ಪಾದನಾ ವಲಯದಲ್ಲಿನ ಬಂಡವಾಳ ಸರಕುಗಳ ಪಾಲು ಪ್ರಸ್ತುತ ಶೇ.12ರಷ್ಟಿದ್ದು, ಅದು ಇನ್ನು ಹತ್ತು ವರ್ಷಗಳಲ್ಲಿ ಶೇ.20ಕ್ಕೆ ಏರಿಕೆಯಾಗಲಿದೆ. ''ಬಂಡವಾಳ ಸರಕುಗಳ ತಯಾರಿಕೆ ನಿರೀಕ್ಷಿತ ಪ್ರಮಾಣದಲ್ಲಿ ಸಾಧ್ಯವಾದರೆ, ದೇಶದ ಒಟ್ಟಾರೆ ಆರ್ಥಿಕ ವ್ಯವಸ್ಥೆ ಸದೃಢಗೊಳ್ಳಲಿದೆ,'' ಎಂಬುದು ಕೇಂದ್ರ ರೈಲ್ವೆ ಸಚಿವ ಸುರೇಶ್‌ ಪ್ರಭು ಅವರು ಅಭಿಪ್ರಾಯ.

=======

ಹೊಸ ನೀತಿಯಿಂದ ಏನು ಪ್ರಯೋಜನ?

2025ರ ಹೊತ್ತಿಗೆ ಬಂಡವಾಳ ಸರಕುಗಳ ವಲಯವನ್ನು ವಿಸ್ತರಿಸಿ, ಕೋಟ್ಯಂತರ ಉದ್ಯೋಗ ಸೃಷ್ಟಿಸುವ ಗುರಿಯನ್ನು ಹೊಸ ನೀತಿಯು ಹೊಂದಿದೆ.

ದೇಶೀಯ ನೇರ ಉದ್ಯೋಗಗಳ ಪ್ರಮಾಣವನ್ನು ಈಗಿನ 14 ಲಕ್ಷದಿಂದ ಕನಿಷ್ಠ 50 ಲಕ್ಷಕ್ಕೆ, ಪರೋಕ್ಷ ಉದ್ಯೋಗಗಳನ್ನು 70 ಲಕ್ಷದಿಂದ (ಹಾಲಿ ಇರುವ ಉದ್ಯೋಗಗಳು) 2.5 ಕೋಟಿಗೆ ಹೆಚ್ಚಿಸುವುದು ಬಂಡವಾಳ ಸರಕು ನೀತಿಯ ಗುರಿ.

ದೇಶೀಯ ಉತ್ಪಾದನಾ ವಲಯದಲ್ಲಿನ ಬಂಡವಾಳ ಸರಕುಗಳ ಪಾಲನ್ನು ಹೆಚ್ಚಿಸುವುದು ಸಾಧ್ಯವಾಗುತ್ತದೆ.

=========

ಏನಿದು ಸರಕು ಬಂಡವಾಳ ನೀತಿ?

ಉತ್ಪಾದನಾ ವಲಯವನ್ನು ಉತ್ತೇಜಿಸಲು ಮೂಲ ಸರಕುಗಳ ಉತ್ಪಾದನೆಗೆ ಸಂಬಂಧಿಸಿದ ಯೋಜನೆಗಳಿಗೆ ತ್ವರಿತವಾಗಿ ಅನುಮೋದನೆ ನೀಡುವುದು ಹೊಸ ನೀತಿಯ ಉದ್ದೇಶ. ನೀತಿ ಜಾರಿಗೆ ಬಂದರೆ ಉತ್ಪಾದನಾ ರಫ್ತು ಪ್ರಮಾಣವನ್ನು ಈಗಿನ ಶೇ.27ರಿಂದ 40ಕ್ಕೆ ಏರಿಕೆ ಮಾಡುವುದು ಸಾಧ್ಯವಾಗುತ್ತದೆ ಎಂದು ಅಂದಾಜು ಮಾಡಲಾಗಿದೆ. ಬಂಡವಾಳ ಸರಕು ಉತ್ಪಾದನೆಗೆ ಸಂಬಂಧಿಸಿದ ಹಣಕಾಸು, ಕಚ್ಚಾ ವಸ್ತುಗಳು, ಸಂಶೋಧನೆ, ತಂತ್ರಜ್ಞಾನ, ಗುಣಮಟ್ಟ, ಉತ್ಪಾದಕತೆ, ಪರಿಸರಸ್ನೇಹಿ ಉತ್ಪಾದನಾ ಪದ್ಧತಿ, ರಫ್ತು ಉತ್ತೇಜನ ಮತ್ತಿತರ ಸಂಗತಿಗಳನ್ನು ಹೊಸ ನೀತಿಯು ಒಳಗೊಂಡಿದೆ.

======

ಬಂಡವಾಳ ಸರಕುಗಳು ಎಂದರೇನು?

ಗ್ರಾಹಕ ಸರಕುಗಳು ಮತ್ತು ಬಂಡವಾಳ ಸರಕುಗಳು ಎಂಬುದಾಗಿ ಸರಕುಗಳಲ್ಲಿ ವಿಂಗಡಿಸಬಹುದು. ಗ್ರಾಹಕ ಸರಕುಗಳ ತಯಾರಿಕೆಗೆ ಮೂಲವಾದ ಸರಕುಗಳನ್ನು ಬಂಡವಾಳ ಸರಕು ಅಥವಾ ಮೂಲ ಸರಕುಗಳು ಎಂದು ಕರೆಯುತ್ತೇವೆ. ಯಂತ್ರೋಪಕರಣಗಳು, ಕಚ್ಚಾ ವಸ್ತುಗಳು ಬಂಡವಾಳ ಸರಕುಗಳ ವ್ಯಾಪ್ತಿಯಲ್ಲಿ ಬರುತ್ತವೆ.

====

ಉತ್ಪಾದನೆಗೆ ನೆರವಾಗುವ ಮೂಲ ಸರಕುಗಳು